ខេត្តព្រៃវែង ៖ ចាត់ទុកថាជាសំណាងមួយក្នុងមួយពាន់គ្រោះថ្នាក់ ដែលបើករថយន្តទៅបុកមាត់លូ ធ្វើឲ្យរថយន្តហោះប្លោងរំលងប្រឡាយជាង៤០ម៉ែត្រ ក្រឡាប់ផ្ងារជើងឡើងលើ ធ្លាក់ទៅទើលើភ្លឺស្រែ តែអ្នកបើករថយន្តមិនមានរងរបួសសោះនោះ ។ ហេតុការណ៍គ្រោះថ្នាក់ចរាចរនេះ…
ខេត្តព្រៃវែង ៖ ចាត់ទុកថាជាសំណាងមួយក្នុងមួយពាន់គ្រោះថ្នាក់ ដែលបើករថយន្តទៅបុកមាត់លូ ធ្វើឲ្យរថយន្តហោះប្លោងរំលងប្រឡាយជាង៤០ម៉ែត្រ ក្រឡាប់ផ្ងារជើងឡើងលើ ធ្លាក់ទៅទើលើភ្លឺស្រែ តែអ្នកបើករថយន្តមិនមានរងរបួសសោះនោះ ។
ហេតុការណ៍គ្រោះថ្នាក់ចរាចរនេះ បានកើតឡើងនៅលើផ្លូវលំក្រួសក្រហមមួយកន្លែង ដែលស្ថិតក្នុងភូមិអន្លុងស ឃុំរំលេច ស្រុកស៊ីធរកណ្ដាល ខេត្តព្រៃវែង កាលពីវេលាម៉ោង០២រសៀល ថ្ងៃទី១៨ ខែកុម្ភៈ ឆ្នាំ២០១៨ ដែលមូលហេតុបង្កឡើងដោយសារតែបើកលឿនខ្លាំងពេក ធ្វើឲ្យអ្នកបើកបរមិនអាចគ្រប់គ្រងរថយន្តបាន ។
សាក្សីនៅកន្លែងកើតហេតុបាននិយាយថា នៅមុនពេលកើតហេតុ គេឃើញរថយន្តមួយគ្រឿងម៉ាក LEXUS RX៣០០ ពណ៌ស្ករ មិនចាំស្លាកលេខ បើកក្នុងទិសដៅពីជើងទៅត្បូង ពីផ្សារព្រែកសណ្ដែកឆ្ពោះទៅឃុំព្រៃព្នៅ ក្នុងល្បឿនយ៉ាងលឿន លុះមកដល់កន្លែងកើតហេតុ រថយន្តបានរេចង្កូតទៅបុកមាត់លូដែលនៅចិញ្ចើមថ្នល់ផ្នែកខាងលិច ធ្វើឲ្យរថយន្តហោះចេញពីថ្នល់ប្លោងរំលងប្រឡាយ និងក្រឡាប់២-៣ត្រឡប់ ទើបធ្លាក់ទៅលើភ្លឺស្រែបះជើងឡើងលើ នៅនឹងថ្នល់មួយកន្លែង ។
ក្រោយពេលកើតហេតុ អ្នកបើកបររថយន្តបានវាយបំបែកកញ្ចក់ ហើយលូនចេញក្រៅរថយន្តដោយខ្លួនឯង បន្ទាប់មកក្រុមគ្រួសារមកជួយ និងហាមមិនឲ្យអ្នកធ្វើដំណើរ ថតរូបឡានដែលក្រឡាប់នោះទេ ព្រមទាំងបានយកក្រណាត់មកបិទបាំងស្លាកលេខថែមទៀតផង ។
ដោយឡែកខាងសមត្ថកិច្ច នៃអធិការដ្ឋាននគរបាលស្រុកស៊ីធរកណ្តាល បានឲ្យដឹងថា រថយន្តខាងលើនេះ ម៉ាក LEXUS RX៣០០ ពណ៌ស្ករ ពាក់ស្លាកលេខ ២AS-០១២៤ បើកបរដោយឈ្មោះ យិន ចាន់ធារិទ្ធ ភេទប្រុស អាយុ២៨ឆ្នាំ មានទីលំនៅភូមិជ្រោយអំពិល សង្កាត់ក្បាលកោះ ខណ្ឌក្បាលកោះ រាជធានីភ្នំពេញ ។ ចំណែកមូលហេតុដែលបណ្តាលឲ្យមានគ្រោះថ្នាក់នេះ គឺមកពីអ្នកបើកបរបើកលឿនខ្លាំងពេក រហូតគ្រប់គ្រងរថយន្តមិនបាន ទើបកើតទៅជាគ្រោះថ្នាក់បែបនេះ ហើយក្រោយកើតហេតុម្ចាស់រថយន្ត បានហៅរថយន្តស្ទូចមកស្ទូចយករថយន្តទៅជួសជុលដោយខ្លួនឯង ៕
ចែករំលែកព័តមាននេះ