ខេត្តពោធិ៍សាត់ ៖ រយៈពេល០៣ថ្ងៃ ក្នុងឪកាសបុណ្យចូលឆ្នាំចិន- វៀតណាម នៅខេត្តពោធិ៍សាត់មានមនុស្សស្លាប់ចំនួន០៤នាក់ និងរបួសធ្ងន់ស្រាល១៧នាក់ ដោយគ្រោះថ្នាក់ចរាចរណ៍ក្នុងឪកាសដើរលេងកម្សាន្តនៅតាមរមណីយដ្ឋាននានា ។
តាមរបាយការណ៍របស់ស្នងការដ្ឋាននគរបាលខេត្តបានឲ្យដឹងថា រយៈពេល០៣ថ្ងៃ គិតពីថ្ងៃទី១៥ ដល់ថ្ងៃទី១៨ ខែកុម្ភៈ ឆ្នាំ២០១៨ មានគ្រោះថ្នាក់ចរាចរណ៍កើតឡើងចំនួន០៥លើក បណ្ដាលឲ្យមនុស្សស្លាប់ចំនួន០៤នាក់ប្រុស របួសធ្ងន់០៦នាក់ ស្រីម្នាក់ និងរបួសស្រាល១១នាក់ ស្រី០៦នាក់ ។ របាយការណ៍បានបញ្ជាក់ទៀតថា ដោយជិះម៉ូតូដួលខ្លួនឯងស្លាប់ម្នាក់ របួសធ្ងន់ម្នាក់នៅនៅភូមិត្រាំ ឃុំត្នោតជុំ ស្រុកក្រគរ ។ មួយវិញទៀតរថយន្ដបុកម៉ូតូរបួសធ្ងន់០២នាក់ នៅឃុំឈើតុំ ស្រុកក្រគរដែរ ។មានកណីរថយន្ដបុកម៉ូតូស្លាប់០២នាក់ នៅភូមិព្រៃផ្ដៅ ឃុំបឹងខ្នារ ស្រុកបាកាន ។ ករណីម៉ូតូបុកម៉ូតូរបួសធ្ងន់០២នាក់ ស្រាល០២នាក់ នៅភូមិត្រពាំងជង ឃុំត្រពាំងជង ស្រុកបាកាន ។ ករណីរថយន្ដបុកបង្កាន់ដៃស្ពានស្លាប់ម្នាក់ របួសធ្ងន់ម្នាក់ និងរបួសស្រាល០៩នាក់ ។
ដោយឡែកលទ្ធផលរបស់អនុកម្មការត្រួតពិនិត្យលក្ខណៈបច្ចេកទេសយានយន្ដ សម្រេចបាន យានចូលគោលដៅសរុបចំនួន១៧៩៤គ្រឿង ម៉ូតូចំនួន៦១៣គ្រឿង រថយន្ដចំនួន១១៨១គ្រឿង ។ បន្ទាបមកធ្វើការអប់រំ និងត្រួតពិនិត្យរថយន្ដសរុបបានចំនួន៩៨គ្រឿង (ត្រឹមត្រូវ និងពុំបានរកឃើញរថយន្ដ កែច្នៃខុសលក្ខណៈបច្ចេកទេសឡើយ) ៕
ចែករំលែកព័តមាននេះ