រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា ក្នុងរយៈពេល២០ខែទៀត តំបន់រង្វង់មូលចោមចៅ និងតំបន់មុខអាកាសយានដ្ឋានអន្តរជាតិភ្នំពេញ នឹងមិនមានការកកស្ទះចរាចរណ៍ទៀតទេ បន្ទាប់ពីស្ពានអាកាសនិងផ្លូវក្រោមដីចោមចៅស្ថាបនារួច ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា បច្ចុប្បន្នស្ថានភាពចរាចរណ៍ក្នុងរាជធានីភ្នំពេញ ជាពិសេសនៅចំណុចរង្វង់មូលចោមចៅ មានការកកស្ទះចរាចរណ៍ស្ទើររាល់ថ្ងៃ ។ ម្យ៉ាងទៀត ចរាចរណ៍នៅផ្លូវជាតិលេខ៤ លេខ៣ និងមហាវិថីសហព័ន្ធរុស្ស៊ី ចូលមករាជធានីភ្នំពេញ ក៏មានការកកស្ទះច្រើនដែរ ។ អាជ្ញាធររាជធានីភ្នំពេញ បាននិងកំពុងត្រៀមរៀបចំស្ថាបនាស្ពានអាកាសនិងផ្លូវក្រោមដីរង្វង់ចោមចៅ ដើម្បីដោះស្រាយបញ្ហាចរាចរណ៍នេះ ។
លោកបន្តថា ដើម្បីបន្តគិតគូរទៅលើការស្ថាបនាស្ពានអាកាសចោមចៅ ដែលបានសិក្សាអស់រយៈពេលជាច្រើនខែកន្លងមកហើយនោះ ពេលនេះរដ្ឋបាលរាជធានីភ្នំពេញ មានគម្រោងបើកការដ្ឋានស្ថាបនាស្ពានអាកាសនិងផ្លូវក្រោមដីចោមចៅ ឲ្យបានមុនបុណ្យចូលឆ្នាំថ្មីប្រពៃណីជាតិ ឬក្នុងខែមេសាខាងមុខនេះ បន្ទាប់ពីកិច្ចប្រជុំពិភាក្សាបានឯកភាពជ្រើសយកក្នុងចំណោមគម្រោងចំនួន៧ ដែលមានផលប៉ះពាល់តិចតួចបំផុតកាលពីពេលថ្មីៗនេះ ។
ចំណែកមន្ត្រីមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យដឹងថា ស្ពានអាកាសនិងផ្លូវក្រោមដីនៅរង្វង់មូលចោមចៅ នឹងស្ថាបនាក្នុងរយៈពេលប្រមាណ១៨ខែអាចរួចរាល់ ខណៈដែលកំណាត់មហាវិថីសហពន្ធ័រុស្ស៊ី ចាប់ពីផ្លូវលេខ២០១១ ដល់រង្វង់មូលចោមចៅ ត្រូវបានពង្រីកបន្ថែមទទឹងឲ្យធំទូលាយ អាច
ឲ្យរថយន្តធ្វើចរាចរណ៍៣គន្លងចូលក្នុងក្រុង និង៤គន្លងចេញក្រៅក្រុង មានសួនច្បារកណ្តាល ដោយដាក់ប្រព័ន្ធលូ២ខ្សែ គឺ១ខ្សែនៅចំកណ្តាលសួនទំហំ៨តឹក និង១ខ្សែទៀតដាក់នៅចិញ្ចើមផ្លូវមានទំហំ១,៥ម៉ែត្រ បានស្ថាបនារួចហើយ ។
គួររំលឹកថា តាមរយៈការសិក្សាស្វែងយល់យ៉ាងល្អិតល្អន់ដោយមន្ត្រីជំនាញ អាជ្ញាធររាជធានីភ្នំពេញយល់ឃើញថា រាល់រង្វង់មូលដែលជាចំណុចប្រសព្វនៃលំហូរចរាចរណ៍ផ្លូវខ្វែង គឺជាមូលហេតុបង្កឲ្យកើតមានការកកស្ទះចរាចរណ៍យ៉ាងខ្លាំង ។ ប៉ុន្តែបើដាក់ភ្លើងស្តុប ឬក៏ស្ថាបនាស្ពានអាកាសនិងផ្លូវក្រោមដីជំនួសវិញ គឺនឹងទទួលបានការដោះស្រាយ និងកាត់បន្ថយការកកស្ទះចរាចរណ៍មានប្រសិទ្ធភាព ។ ជាក់ស្តែង អតីតរង្វង់មូលស្ទឹងមានជ័យ រង្វង់មូលក្បាលថ្នល់ រង្វង់មូលកាំកូស៊ីធី និងរង្វង់មូលទួលគោកជាដើម បន្ទាប់ពីស្ថាបនាស្ពានអាកាស និងកែលម្អដោយប្រពន្ធ័ភ្លើងស្តុបរួច លំហូរចរាចរណ៍មានភាពប្រសើរឡើង ៕
ចែករំលែកព័តមាននេះ