ខេត្តកំពត ៖ សណ្ឋាគារឡឺបូកគោផាឡេស ដែលរចនាម៉ូដដោយវិស្វករបារាំង និងអ៊ីតាលី នៅក្នុងសម័យកាលប្រទេសបារាំងធ្វើអាណាព្យាបាលមកលើប្រទេសកម្ពុជា ដែលបើកសម្ពោធជាលើកដំបូងនៅឆ្នាំ១៩២៥ និងលើកទី២ ក្នុងសម័យសម្តចព្រះបរមកោដនរោត្តមសីហនុ ឆ្នាំ១៩៦២…
ខេត្តកំពត ៖ សណ្ឋាគារឡឺបូកគោផាឡេស ដែលរចនាម៉ូដដោយវិស្វករបារាំង និងអ៊ីតាលី នៅក្នុងសម័យកាលប្រទេសបារាំងធ្វើអាណាព្យាបាលមកលើប្រទេសកម្ពុជា ដែលបើកសម្ពោធជាលើកដំបូងនៅឆ្នាំ១៩២៥ និងលើកទី២ ក្នុងសម័យសម្តចព្រះបរមកោដនរោត្តមសីហនុ ឆ្នាំ១៩៦២ និងបានបោះបង់ឬទុកចោលវិញក្នុងសម័យសង្គ្រាម ថ្មីៗនេះត្រូវធ្វើការកែលម្អលាបថ្នាំ និងតុបតែងឡើងជាថ្មី អស់រយៈពេលអស់ជាច្រើនខែកន្លងទៅគ្រោងបើកដំណើរលើកទី៣ ទទួលភ្ញៀវទេសចជាតិ និងអន្តរជាតិជាថ្មី នាថ្ងៃទី០៩ ខែកុម្ភៈ ឆ្នាំ២០១៨ ខាងមុខ ។
តាមសេចក្តីប្រកាសព័ត៌មានរបស់ក្រុមហ៊ុនសុខាអូតែល កាលពីថ្ងៃទី០៦ ខែកុម្ភៈ ឱ្យដឹងថាសណ្ឋគារឡឺបូកគោផាឡេស (Le Bokor Palace) សាងសង់លើផ្ទៃដីជាង១ហិកតា មានកម្ពស់៤ជាន់ស្មើនឹង៣៦បន្ទប់ ដែលមានអាយុកាលជិត១០០ឆ្នាំ (១៩២៥-២០១៨) មានទីតាំងស្ថិតនៅចន្លោះតំបន់ព្រៃត្រូពិច និងឆ្នេរសមុទ្របៃតង លើឧទ្យានជាតិព្រះមុនីវង្សបូកគោ ក្បែរក្រុងកំពត សម្រាប់បម្រើជូនរាជវង្សានុវង្ស និងអភិជនជាច្រើនទសវត្សរ៍ ។ សណ្ឋាគារត្រូវបានបើកឡើងវិញនៅដើមឆ្នាំ១៩៦២ ដោយព្រះករុណាព្រះបាទសម្តេច ព្រះនរោត្តមសីហនុ ដែលផ្តល់សេវាកម្មជូនមន្ត្រីជាន់ខ្ពស់ រាជរដ្ឋាភិបាល និងពាណិជ្ជករដែលមានទ្រព្យសម្បត្តិស្ដុកស្ដម្ភ ហើយវាក៏ជាកន្លែងវិស្សមកាលដែល ព្រះករុណាព្រះបាទសម្តេចព្រះនរោត្តមសីហនុ ចូលចិត្តជាទីបំផុត ។
លោក FRUGERE F. Philippe អ្នកគ្រប់គ្រងទូទៅនៃសណ្ឋាគារឡឺបូកគោផាឡេស បានមានប្រសាសន៍ថា ៖ «ឡឺបូកគោផាឡេស ជាសណ្ឋាគារប្រវត្ដិសាស្ត្រ និងជារតនសម្បត្ដិរបស់ប្រទេសយើង ។ ក្រុមហ៊ុនបានជួសជុលសំណង់អគារនេះសារជាថ្មី ដោយរក្សាទុកនូវលក្ខណៈពិសេសរបស់វា និងបង្កើតឡើងវិញនូវរចនាបទផ្ទៃខាងក្នុងបែបអាណានិគម ជាមួយនឹងគ្រឿងបំពាក់បន្ទប់ទឹកដែលនាំចូលមកពីប្រទេសអ៊ីតាលី និងឥដ្ឋការ៉ូដ៏ប្រណិតដែលនាំចូលពីប្រទេសអេស្ប៉ាញ» ។
លោកបន្តថា ក្រោយពីជួសជុលរួចរាល់ សំណង់អគារអាណានិគមដ៏ធំស្កឹមស្កៃនេះ នឹងត្រូវបានបើកសម្ពោធជាថ្មីម្តងទៀតនាពេលខាងមុខនេះ មានបន្ទប់ស្នាក់នៅនឹងបន្ទប់ស្វីតដ៏ប្រណិតចំនួន៣៦បន្ទប់ភោជនីយដ្ឋានចំនួន២ ដែលបង្ហាញនូវប្រណិតភាព នៃសណ្ឋាគារនេះនាសម័យអតីតកាល ចុងភៅស្វីស និងខ្មែរបានរៀបចំនូវមុខម្ហូបកាលពី១០០ឆ្នាំមុន និងម្ហូបអាហារគ្រួសាររាជវង្សខ្មែរ ជាមួយនឹងបន្លែសរីរាង្គ និងគ្រឿងផ្សំថ្មីស្រស់ ដែលដាំនៅក្បែរចំការបន្លែ ។ ឈ្មោះសណ្ឋាគារឡឺ បូកគោផាឡេស ត្រូវបានរក្សាទុកក៏ដូចជាការរក្សាទុកនូវប្រវត្តិសាស្ត្រ នៃអាណានិគម និង ព្រះករុណាព្រះបាទសម្តេចព្រះនរោត្តមសីហនុ ។
សំណង់អគារអាណានិគមសេសសល់ ដែលនៅតែអាចមើលឃើញ នាពេលបច្ចុប្បន្ន រួមមានផ្ទះជប៉ុន ព្រះវិហារកាតូលិក វត្តសំពៅប្រាំ ដំណាក់ស្លាខ្មៅ ដំណាក់ស្តេច សាលាក្រុង និងសំណង់អគារអាណានិគមជាច្រើនទៀត ដែលមានស្ទើរតែគ្រប់ទីកន្លែង និងតែងតែត្រូវបានគ្របដណ្តប់ដោយអ័ព្ទ ។ ទន្ទឹមនឹងនេះភ្ញៀវទេសចរដែលស្នាក់នៅសណ្ឋាគារឡឺបូកគោផាឡេស ដែលត្រូវបានគេស្គាល់ថា ជារមណីយដ្ឋានសុខភាពបែបធម្មជាតិ ក៏អាចទៅទស្សនាបឹងលើភ្នំដ៏ស្រស់ត្រកាល ទឹកជ្រោះពពកវិលដ៏ស្រស់ស្អាតថ្ម ដែលបង្កើតជារូបរាងខុសៗគ្នាជាច្រើននៅវាលស្រែ១០០ និងរូបរាងដ៏អស្ចារ្យ នៃនិមិត្តរូបច្រកទ្វាររវាងឋានសួគ៌ និងឋានមនុស្ស ។
យោងតាមសេចក្តីប្រកាសព័ត៌មាន សណ្ឋាគារឡឺបូកគោផាឡេស ស្ថិតនៅច្រាំងថ្មចោត នៃកំពូលភ្នំបូកគោ សណ្ឋាគារប្រវត្តិសាស្ត្រមួយនេះផ្តល់នូវទេសភាពដ៏ស្រស់ត្រកាល ដែលត្រូវបានជនជាតិបារាំងហៅថា ឆ្នេរសមុទ្របៃតង ។ អាកាសធាតុនៅលើកំពូលភ្នំបូកគោមានចន្លោះពី១៧ដល់២៤អង្សាសេ ពេញមួយឆ្នាំ ។ ភ្នំបូកគោមិនត្រឹមតែជាគោលដៅទេសចរណ៍សម្រាប់ភ្ញៀវបុណ្ណ៉ោះទេ ហើយវាក៏ជារមណីយដ្ឋានសុខភាព ដែលព្យាបាលដោយធម្មជាតិ រួមមានឥទ្ធិពលទៅលើសួត ការដកដង្ហើម សារធាតុចិញ្ចឹម ប្រព័ន្ធប្រសាទការស្តារឡើងវិញ នៃចលនាឈាម និងការបង្កើនកម្លាំង ។ សណ្ឋាគារឡឺបូកគោផាឡេស គឺជាអគារបួនជាន់ដែលត្រូវបានរចនាឡើងយ៉ាងល្អិតល្អន់ ជាមួយនឹងវត្តមានដ៏មានអានុភាព មានរានហាល និងជណ្តើរថ្មើរជើងបែបអ៊ីតាលី ៕
ចែករំលែកព័តមាននេះ