ខេត្តសៀមរាប ៖ លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមខេត្ត បានដឹកនាំប្រតិភូចុះត្រួតពិនិត្យសំណង់អគារសិក្សាមួយខ្នងមាន៥បន្ទប់ ធ្វើអំពីថ្មប្រក់ក្បឿង ដែលជាអំណោយរបស់សមាគមន៍ពាណិជ្ជកម្មចិន ផ្តល់តាមរយៈលោក ឃឹម ប៊ុនសុង អភិបាល នៃគណៈអភិបាលខេត្ត និងលោកស្រី ជូនដល់សាលាបឋមសិក្សា សំរោងខ្នារពោធិ៍ ក្នុងភូមិសំរោង ឃុំខ្នារពោធិ៍ ស្រុកសូទ្រនិគម ខេត្តសៀមរាប នារសៀលថ្ងៃទី០៥ ខែមករា ឆ្នាំ២០១៨ អមដំណើរដោយលោកអភិបាលស្រុកផងដែរ ។
តាមសេចក្តីរាយការណ៍របស់លោកស្រីនាយិការសាលាបឋមសិក្សា សំរោងខ្នារពោធិ៍ បានឲ្យដឹងអំពីផលលំបាក ក្នុងការបណ្តុះបណ្តាលធនធានមនុស្សនៅថ្នាក់មូលដ្ឋាន ដោយកង្វះនូវអគារសិក្សា និងគ្រូបង្រៀន ។ ដោយបច្ចុប្បន្ននេះ មានអគារសិក្សា៣ខ្នង ធ្វើអំពីថ្មដែលជាអំណោយរបស់សមាគមន៍ពាណិជ្ជកម្មចិន មាន៥បន្ទប់ និងអគារឈើ២ខ្នងមាន៣បន្ទប់ បន្ទប់ជាថ្នាក់មត្តេយ្យ១ ដែលមានសភាពចាស់ទ្រោម និងទីចាត់ការមួយខ្នងផងដែរ ។
លោកស្រីនាយិការបានបន្តទៀតថា ក្នុងការបង្រៀនសិស្ស ក្នុងមួយថ្នាក់ត្រូវបូកចូលគ្នា ដែលមានថ្នាក់ទី៤ផង និងថ្នាក់ទី៥ផង ដែលបង្រៀនគ្រូតែម្នាក់ ហើយជាគ្រូជាប់កិច្ចសន្យាទៀតផង ។ ក្នុងនោះលោកស្រីនាយិការក៏បានសំណូមពរដល់លោកស្រីប្រតិភូ និងអាជ្ញាធរស្រុក ជួយពាំនាំនូវទុក្ខកង្វល់ក្នុងការកង្វះគ្រូបង្រៀននៅតាមសាលាជនបទ បើមិនបានគ្រូក្របខណ្ឌ សូមឲ្យមានគ្រូកិច្ចសន្យាបន្ថែម ក្នុងការងាយស្រួលបង្រៀនសិស្ស ហើយសាលានេះមានសិស្សចូលមកសិក្សារៀនសូត្រ ប្រមាណជិត២០០នាក់ ។
មានប្រសាសន៍នោះដែរ លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមខេត្ត ក៏បានបញ្ជាក់ថា ដំណើរមកកាន់សាលារៀននេះ គឺដើម្បីពិនិត្យមើលពីគុណភាព នៃសំណង់ ដែលបានសាងសង់រួចរាល់ ក្នុងការរកនូវពេលវេលាធ្វើ ពិធីសម្ពោធដាក់ឲ្យប្រើប្រាស់ជាផ្លូវការនៅពេលខាងមុខ ។ ក្នុងនោះលោកស្រីក៏បានធ្វើការណែនាំដល់អាជ្ញាធរស្រុក ត្រូវធ្វើការត្រួតពិនិត្យឡើងវិញ នូវដំបូលអគារទៅតាមដែលលោកស្រីនាយិការបានបង្ហាញ គឺមានការបែកប្រះក្បឿងមួយចំនួន ធ្វើឲ្យទឹកស្រក់នៅរដូវវស្សា ធ្វើឲ្យប៉ះពាល់ដល់សិស្សកំពុងសិក្សារៀនសូត្រ ។
លោកស្រីក៏បានបន្តទៀតថា ចំពោះការកង្វះគ្រូបង្រៀន គឺជាកាតព្វកិច្ចរបស់អាជ្ញាធរស្រុក និង ខេត្ត ហើយចំពោះការខ្វះខាត់អគារសិក្សា លោកស្រីនឹងខិតខំស្វែងរកដៃគូ និងសប្បុរសជន ដើម្បីបានធ្វើការសាងសង់បន្ថែមជូនដល់កូនៗ ចៅៗ បានសិក្សារៀនសូត្រសមរម្យ ជាថ្នាលបណ្ដុះបណ្ដាលមូលដ្ឋានគ្រឹះនៃធនធានមនុស្ស ។
ក្នុងនោះដែរ លោកស្រីក៏បានយល់ច្បាស់អំពីទុក្ខលំបាករបស់លោកគ្រូអ្នកគ្រូដែលបានខិតខំបណ្តុះបណ្តាលក្នុងការផ្ទេរនូវចំណេះដឹងជូនដល់កូនចៅជំនាន់ក្រោយ ។ ម្យ៉ាងទៀតកត្តាលំបាកបំផុតនោះ បន្ទប់ថ្នាក់មួយបង្រៀនសិស្សកម្រិតខុសគ្នា ដែលធ្វើឲ្យមានផលពិបាកក្នុងការបង្រៀនទៀតផង ។
លោកស្រីក៏បានធ្វើការផ្តាំផ្ញើដល់កូនៗ ចៅៗសិស្សានុសិស្សទាំងអស់ ត្រូវចេះថែរក្សាសុខភាពអនាម័យប្រចាំថ្ងៃរបស់ខ្លួន គឺហូបស្អាត ផឹកស្អាត មានអនាម័យល្អ ព្រមទាំងត្រូវខិតខំសិក្សាឲ្យក្លាយជាកូនល្អ សិស្សល្អ មិត្តល្អ ពលរដ្ឋល្អ និងចៀសឲ្យឆ្ងាយពីគ្រឿងញៀន និងត្រូវចេះគោរពច្បាប់ចរាចរណ៍ផងដែរ ៕
ចែករំលែកព័តមាននេះ