ខេត្តព្រះសីហនុ ៖ ក្នុងរយៈពេលចុងឆ្នាំ២០១៧ និងដើមឆ្នាំ២០១៨កន្លងមកថ្មីៗនេះ ប្រជាពលរដ្ឋ និងមន្ត្រីរាជការនៅក្នុងខេត្តព្រះសីហនុបាននាំគ្នាត្អូញត្អែរធុញទ្រាន់ទៅនឹងលំហូរចូលនៃជនជាតិចិនមកស្នាក់នៅក្នុងខេត្តព្រះសីហនុ កាន់តែមានចំនួនកើនឡើងជាបន្តបន្ទាប់ ។ ហេតុការណ៍ខាងលើបានកើតឡើងនៅវេលាម៉ោង០៤ទៀបភ្លឺឈានចូលថ្ងៃទី០៥ ខែមករា ឆ្នាំ២០១៨ នៅចំណុចផ្ទះជួល ។
ការត្អូញត្អែរ និងភាពធុញទ្រាន់ដោយក្តីកង្វល់របស់ពួកគាត់មានដូចជា ការបង្កករណីគ្រោះថ្នាក់ចរាចរណ៍ បង្កចលាចលមិនមានសណ្តាប់ធ្នាប់រំខានដល់ការរស់នៅរបស់បងប្អូនប្រជាពលរដ្ឋ ឬមន្ត្រីរាជការដែលមានលំនៅដ្ឋាននៅជិតខាង តាមកន្លែងផ្ទះដែលជនជាតិចិនជួលស្នាក់នៅ ។
ប្រជាពលរដ្ឋជាច្រើនគ្រួសារដែលមានលំនៅដ្ឋាននៅក្នុងបុរី( B.S)ស្ថិតក្នុងភូមិ០៥ សង្កាត់លេខ០៤ក្រុង-ខេត្តព្រះសីហនុបានបញ្ជាក់ឲ្យដឹងថា ជាក់ស្តែងក្នុងករណីជនជាតិចិនយកដែកវាយបំផ្លិចបំផ្លាញសម្ភារនៅក្នុងផ្ទះ និងវាយបំបែកកញ្ចក់ទ្វារផ្ទះជួលទាំងរំលងអាធ្រាតុបង្កការសម្រាកដល់ប្រជាពលរដ្ឋដែលនៅជិតខាង នៅចំណុចផ្ទះជួលជាកម្មសិទ្ធឈ្មោះ ហ៊ឺ សេង ភេទប្រុស អាយុ៧០ឆ្នាំ ដែលមានទីតាំងចំណុចខាងលើនេះ ។
សមត្ថកិច្ចនគរបាលប៉ុស្តិ៍រដ្ឋបាលសង្កាត់លេខ០៤ ក្រុង-ខេត្តព្រះសីហនុបានឲ្យដឹងថា ករណីវាយបំផ្លិចបំផ្លាញទ្រព្យសម្បត្តិក្នុងផ្ទះជួល និងកញ្ចក់ទ្វារផ្ទះឲ្យរងការខូចខាតអស់ជាច្រើនផ្ទាំងបង្កឡើងដោយជនជាតិចិន ឈ្មោះ អាគ័រ ភេទប្រុស អាយុ២៨ឆ្នាំ ប្រកបរបរបើកអាហារដ្ឋាន ក្នុងទីតាំងផ្ទះជួលខាងលើ ។
ប្រភពខាងលើបានបន្ថែមឲ្យដឹងទៀតថា តាមការរៀបរាប់របស់ស្ត្រីជាប្រពន្ធជនជាតិចិនខាងលើ មូលហេតុឈានដល់ប្តីរបស់គាត់វាយបំផ្លិចបំផ្លាញទ្រព្យសម្បត្តិនៅក្នុងហាង និងវាយកម្ទេចទ្វារកញ្ចក់ ដោយសារតែប្តីគាត់ខឹងច្រឡោតជាមួយកូនប្រុសម្ចាស់ផ្ទះ ដែលកន្លងមកតែងតែបង្កជាជម្លោះពាក្យសម្តីជាញឹកញាប់រួចមកហើយ លុះដល់វេលាខាងលើប្តីគាត់បានផឹកស្រាស្រវឹង ហើយបញ្ចេញកំហឹងដោយបានយកកាំបិតវាយបំបែកទ្រព្យសម្បត្តិនៅក្នុងហាងនិងកញ្ចក់ទ្វារផ្ទះអស់ជាច្រើនផ្ទាំង ។
លុះព្រឹកឡើងថ្ងៃទី០៥ ខែកុម្ភៈ ឆ្នាំ២០១៨ កម្លាំងនគរបាលការិយាល័យព្រហ្មទ័ណ្ឌកម្រិតធ្ងន់នៃស្នងការដ្ឋាននគរបាលខេត្តព្រះសីហនុសហការណ៍ជាមួយកម្លាំងនគរបាលប៉ុស្តិ៍រដ្ឋបាលមូលដ្ឋានចុះទៅដល់កន្លែងកើតហេតុម្តងទៀត និងបានឃាត់ខ្លួនជនជាតិចិនបង្កហេតុខាងលើយកមកស្នងការដ្ឋាន ដើម្បីចាត់ការបន្តទៅតាមនិតិវិធីច្បាប់ ៕
ចែករំលែកព័តមាននេះ