រាជធានីភ្នំពេញ ៖ បុរសម្នាក់ទើបតែចេញមកពីផឹកស៊ីក្នុងស្ថានភាពស្រវឹងជោកជាំបើករថយន្តឡិចស៊ីសទៅបុកក្បាលនាគពុះចែកទ្រូងផ្លូវ ខ្ទាតទៅផ្លូវម្ខាង រួចជ្រុលទៅបុកម៉ូតូអាយខុនមួយគ្រឿង ជិះដោយបុរស២នាក់ដួលរងរបួសស្រាល ហើយរថយន្តបង្កជ្រុលទៅបុកទ្វារផ្ទះប្រជាពលរដ្ឋបាក់អស់មួយផ្ទាំង ទើបរថយន្តដាច់កង់មុខខាងឆ្វេងទៅមុខលែងរួច ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ ថ្ងៃទី០៤ ខែកុម្ភៈ ឆ្នាំ២០១៨ តាមបណ្តោយផ្លូវសហព័ន្ធរុស្ស៊ី នៅចំណុចក្តាន់ពីរ ស្ថិតនៅក្នុងសង្កាត់ស្រះចក ខណ្ឌដូនពេញ ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញបុរសម្នាក់ស្រវឹងស្រាជោកជាំបើករថយន្តបង្កម៉ាកឡិចស៊ីស RX៣៣០ ពណ៌ស្ករ ពាក់ស្លាកលេខ រដ្ឋ17 2-0220 បើកបរតាមបណ្តោយផ្លូវសហព័ន្ធរុស្ស៊ីក្នុងទិសដៅពីកើតទៅលិចក្នុងល្បឿនយ៉ាងលឿន មិនដឹងថាទើបតែចេញមកពីណានោះទេ បានជាមកដល់ចំណុចកើតហេតុខាងលើ រថយន្តបង្ករេចង្កូតទៅបុកក្បាលនាគពុះចែកទ្រូងផ្លូវ បណ្ដាលឲ្យបាក់វៀចអស់មួយកង់ ហើយរថយន្តបង្កមិនទាន់អស់ល្បឿននោះទេ ក៏ជ្រុលទៅបុកពីក្រោយម៉ូតូមួយគ្រឿងម៉ាកអាយខុន ពណ៌ក្រហមលាយស ពាក់ស្លាកលេខ ភ្នំពេញ១BK-៥៣៣៣ ជិះគ្នា២នាក់ បណ្ដាលឲ្យដួល សំណាងល្អអ្នកទាំង២នាក់នោះរងរបួសស្រាល ឬឯរថយន្តនៅតែមិនទាន់អស់ល្បឿនទៀត បានបន្តទៅបុកទ្វាររបងផ្ទះប្រជាពលរដ្ឋ បណ្តាលឲ្យបាក់អស់មួយផ្ទាំងទៀត ចំណែកឯរថយន្តវិញដាច់កង់ខាងឆ្វេងខ្ទេចអស់មួយកំណាត់ខាងមុខ និងបែកកញ្ចក់ខាងមុខ ។
ក្រោយពេលកើតហេតុ រថយន្តបង្ក រួមនិងម៉ូតូរងគ្រោះ ត្រូវបានសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ