ខេត្តកំពត ៖ ពិតជាគួរឱ្យសង្វេគ និងរន្ធត់ចិត្តពន់ពេកណាស់ ដែលក្មេងប្រុស២នាក់បងប្អូនត្រូវស្លាប់ដោយ សារតែស្ត្រីជាម្តាយ លាយថ្នាំពុលក្នុងបាយឱ្យហូប ហើយស្ត្រីជាម្តាយខ្លួនឯងក៏ហូបជាមួយគ្នាដែរ ដែលជាការប៉ងធ្វើអត្តឃាតទាំងម្តាយទាំងកូនឱ្យផុតពូជដោយសារតែមានជម្លោះជាមួយប្តី ។
តាមប្រភពព័ត៌មានពីលោកអធិការស្រុកអង្គរជ័យ បានរាយការណ៍មកស្នងការដ្ឋាននគរបាលខេត្តកាលពីវេលាម៉ោង១១និង១៥នាទីថ្ងៃទី៣០ មករា ថាស្ត្រីជាម្តាយនិងកូនប្រុស២នាក់ បានមកដេកផ្ទះសំណាក់ឈ្មោះ សុខមនោរម្យ ដែលមានទីតាំងនៅភូមិត្រពាំងខ្វា ឃុំភ្នំកុង ស្រុកអង្គរជ័យ ចំនួន២យប់រួចមកហើយ ។ ប្រភពព័ត៌មាននៅព្រឹកថ្ងៃទី៣០ មករា ស្ត្រីរូបនេះបានយកថ្នាំពុលមកលាយក្នុងបាយកញ្ចប់ឱ្យកូនហូបរួមទាំងខ្លួនឯងផង ក៏បណ្តាលឱ្យកូនទាំង២ពុលត្រូវបានដឹកទៅសង្គ្រោះនៅមន្ទីរពេទ្យខេត្តតាកែវ ។ដោយ សារកូនប្រុសទាំងពីរមានអាការពុលធ្ងន់ធ្ងរក៏បានស្លាប់ពាក់កណ្តាលផ្លូវ ។ រីឯស្ត្រីជាម្តាយអាការធ្ងន់ធ្ងរដែរ តែដោយសារចាស់ជាងកូន កំពុងទទួលការសង្គ្រោះនៅក្នុងមន្ទីរពេទ្យខេត្តតាកែវ ។
លោកវរសេនីយ៍ឯក សៅ សំអឿន ស្នងការរងទទួលផែនព្រហ្មទណ្ឌបានឱ្យដឹងថា ក្រោយពីទទួលព័ត៌មានថា មានមនុស្សពុលថ្នាំស្លាប់នៅផ្ទះសំណាក់ខាងលើ កំលាំងអធិការដ្ឋានស្រុកអង្គរជ័យបានទៅដល់កន្លែងកើតហេតុ ហើយបានធ្វើការសាកសួរម្ចាស់ផ្ទះសំណាក់ពីហេតុការណ៍ដែលបានកើតឡើង ។ ម្ចាស់ផ្ទះសំណាក់ឱ្យដឹងថា ស្ត្រីជាម្តាយឈ្មោះ ប៉ាក សុខហេង អាយុប្រហែល៣០ឆ្នាំផ្លាយមានកូនប្រុស២នាក់ដែលកូនប្រុសបងឈ្មោះ ហ៊ាល សុវណ្ណា អាយុ១០ឆ្នាំ និងកូនប្រុសប្អូនឈ្មោះ ហ៊ាល ក្តាន់ អាយុ៦ឆ្នាំ ។ ទាំង៣នាក់ម្តាយនិងកូនមានទីលំនៅឃុំព្រៃស្លឹក ស្រុកទ្រាំង ខេត្តតាកែវបានមកស្នាក់នៅផ្ទះសំណាក់សុខមនោរម្យនេះរយៈពេលពីរយប់មកហើយ ។
បើតាមប្រភពព័ត៌មានថា ការដែលចាកចេញពីផ្ទះទាំងបីនាក់ ម្តាយនិងកូនមកស្នាក់នៅផ្ទះសំណាក់នេះ ដោយសាមានការឈ្លោះប្រកែកគ្នាជាមួយប្តី តែមិនមាននរណាម្នាក់ដឹងថាឈ្លោះគ្នារឿងរ៉ាវអ្វីនោះទេ ទើបស្ត្រីជាម្តាយនាំកូនៗចេញពីផ្ទះហើយបានប៉ុនប៉ងបញ្ចប់ជីវិតជាមួយកូនដោយដាក់ថ្នាំពុលបែបនេះ ។ ប្រភពដដែលឱ្យដឹងទៀតថា ស្រាប់តែនៅព្រឹកថ្ងៃ៣០ មករា មានហេតុការណ៍ថា ម្តាយបានលាយថ្នាំពុលក្នុងបាយឱ្យកូនហូបជាមួយគ្នាដើម្បីសម្លាប់ខ្លួន ។ ពេលនោះក៏លេចឮព័ត៌មានដល់ប្តីទំនងស្ត្រីជាប្រពន្ធបានទូរស័ព្ទប្រាប់ពេលហូបបាយលាយថ្នាំពុលនោះ ទើបប្តីមកដល់ឃើញជាក់ស្តែងក៏ដឹកប្រពន្ឋនិងកូនយកទៅជួយសង្គ្រោះនៅឯមន្ទីរពេទ្យខេត្តតាកែវ ។ ប៉ុន្តែជាអកុសលកូនប្រុសពីរនាក់ ដោយសារតែជាតិថ្នាំជ្រាបពេញខ្លួនក៏បានស្លាប់នៅពាក់កណ្តាលផ្លូវទៅ ។ ចំណែកស្ត្រីជាម្តាយក៏ធ្ងន់ធ្ងរដែរ កំពុងសង្គ្រោះនៅមន្ទីរពេទ្យខេត្តតាកែវនៅឡើយ ។
បុរសជាប្តីឈ្មោះ ហ៊ិន ម៉ាត អាយុជាង៣០ឆ្នាំ កំពុងក្រៀមក្រំ ។ ចំពោះរឿងរ៉ាវនៃការឈ្លោះប្រកែកគ្នារហូតឈានដល់ប្រពន្ឋនាំកូនចុះចេញពីផ្ទះហើយហូបថ្នាំបំពុលទាំងម្តាយទាំងកូនដើម្បីបញ្ចប់រឿងយ៉ាងនេះ សមត្ថកិច្ចមិនទាន់សាកសួរប្តីនៅឡើយទេ ពីព្រោះតែកូនទាំង២ក៏ស្លាប់ ឯប្រពន្ធក៏នៅធ្ងន់ធ្ងរកំពុងសង្គ្រោះដូច្នេះសមត្ថកិច្ចមិនទាន់អាចធ្វើការសាកសួរបាននៅឡើយទេ ។អ្វីដែលគួរឱ្យមានការស្រយុតរន្ធត់ចិត្តនោះគឺមរណភាពរបស់ក្មេងប្រុសទាំង២នាក់បងប្អូនដែលត្រូវម្តាយដាក់ថ្នាំពុលសម្លាប់តើគ្នាមានកំហុសអ្វីទៅ ? តាមច្បាប់ស្ត្រីជាម្តាយបើសិនជាឆ្លងផុតពីការស្លាប់ ក៏ត្រូវមានទោសពីបទសម្លាប់កូនរបស់ខ្លួនឯងដែរ ។
ព័ត៌មានចុងក្រោយ
ប្រភពច្បាស់ការណ៍ឱ្យដឹងថា រហូតមកដល់វេលាម៉ោង៥ល្ងាចថ្ងៃ៣០ មករា ដដែលស្ត្រីជាម្តាយបានរួចផុតពីគ្រោះថ្នាក់ដល់ជីវិតហើយ ដោយសារបានគ្រូពេទ្យជួយសង្រេ្គោះ ។ បន្ទាប់ពីឆ្លងផុតគ្រោះថ្នាក់ហើយ សមត្ថកិច្ចខេត្តតាកែវ ក៏បានបញ្ជូនស្ត្រីជាម្តាយចេញពីមន្ទីរពេទ្យខេត្តតាកែវ ទៅព្យាបាលបន្តនៅមន្ទីរពេទ្យខេត្តកំពតវិញ ព្រោះនាងបានបង្កើតបញ្ហានៅខេត្តកំពតងាយស្រួលសមត្ថកិច្ចខេត្តកំពតតាមដានបញ្ហានេះឱ្យបានចប់ចុងចប់ដើម ។
ចែករំលែកព័តមាននេះ