កម្ដៅកាន់តែឡើងខ្លាំងហើយម្ដងនេះ រឿងទំនាស់ដីធ្លី
- សៀមរាប
ខេត្តសៀមរាប ៖ កម្លាំងសមត្ថកិច្ចចម្រុះរួមមាន ប៉េអឹមក្រុង ប៉ូលិសក្រុង ប៉ូលិសមូលដ្ឋាន អាជ្ញាធរអប្សរា ដឹកនាំដោលោក ខួយ គឹមទូ…
ខេត្តសៀមរាប ៖ កម្លាំងសមត្ថកិច្ចចម្រុះរួមមាន ប៉េអឹមក្រុង ប៉ូលិសក្រុង ប៉ូលិសមូលដ្ឋាន អាជ្ញាធរអប្សរា ដឹកនាំដោលោក ខួយ គឹមទូ ទីប្រក្សានៃអាជ្ញាធរជាតិអប្សរា ប្រធានសណ្តាប់ធ្នាប់អាជ្ញាធរអប្សរា មេធាវីអាជ្ញាធរអប្សរា ចូលរួមសហការជាមួយអាជ្ញាធរក្រុង ក្រោមការសម្របសម្រួល ដោយលោក រៀម ចន្ននី ព្រះរាជអាជ្ញារងអមសាលាដំបូងខេត្តសៀមរាប ដើម្បីចុះរុះរើរបងថ្មព័ទ្ធលួសបន្លា និងរោងចាំដី របស់ឈ្មោះ ហួន សីហា មន្ត្រីយោធា និងបក្ខពួកខ្លួនដែលបានកំពុងសាងសង់រំលោភលើដីរបស់ អាជ្ញាធរអប្សារាកាន់កាប់ជាលើកទី៣ ទើបសម្រេច ដែលមាន២ទីតាំងផ្សេងគ្នា ម្ចាស់តែមួយ ធ្វើឡើងពេញ១ថ្ងៃ គឺថ្ងៃទី៣០ ខែមករា ឆ្នាំ២០១៨នេះ ស្ថិតនៅចំណុចតាមផ្លូវដីស ក្នុងភូមិអញ្ចាញ សង្កាត់នគរធំ ក្រុងសៀមរាប ចម្ងាយពីខាងកើតរង្វង់មូលផ្លូវ៦០ម៉ែត្រប្រហែលប្រមាណជា១គីឡូម៉ែត្រ។ សូមបញ្ជាក់ផងដែរថា មូលហេតុនៃការចុះរុះរើ ព្រោះឈ្មោះ ហួន សីហា តួនាទីមន្ត្រីយោធា កងពលតូចអន្តរាគមន៍លេខ៦ ចំណុះកងពលធំអន្តរាគមន៍លេខ២ បានរំលោភយកជាកម្មសិទ្ធិ និងបានធ្វើរបងថ្មព័ទ្ធលួស និងរោងចាំដី ព្រមទាំងដាំដើមស្វាយថ្មីធំស្រាប់ ដាំចេក ដាក់លូ ចាក់បំពេញអាចមន៍ដី។ល។ លើដីកម្មសិទ្ធិរបស់រដ្ឋ តាំងពីថ្ងៃទី៥ ខែមករា ឆ្នាំ២០១៨ ហើយអាជ្ញាធរជាតិអប្សរាក៏ធ្លាប់បានជូនដំណឹង និងទុកពេលឱ្យមួយសប្តាហ៍ ដើម្បីឱ្យម្ចាស់ដីរុះរើដោយខ្លួនឯង តាំងពីថ្ងៃទី១៨ ខែមករា ឆ្នាំ២០១៨មកម្លេះ។
ម្យ៉ាងវិញទៀត ទីតាំងដីកម្មសិទ្ធិរបស់រដ្ឋដែលឈ្មោះ ហួន សីហា រំលោភយកជាកម្មសិទ្ធិ ត្រូវបានរដ្ឋបាលខេត្ត សៀមរាបធ្វើការបិទផ្សាយជាសាធារណៈនូវឯកសារនៃការវិនិច្ឆ័យ រួមមានប្លង់សុរិយោដី និងបញ្ជីឈ្មោះអ្នកកាន់កាប់ដីរួចមកហើយនៅថ្ងៃទី២៧ ខែកុម្ភៈ ឆ្នាំ២០១៧កន្លងទៅ។ លោក ខូយ គឹមទួ ទីប្រឹក្សាអាជ្ញាធរជាតិអប្សរា បានឱ្យដឹងថា ដីនេះគឺស្ថិតនៅក្នុងបុរីសណ្ឋាគារ ហើយតាមអនុក្រិត្យចុង ក្រោយរបស់រាជរដ្ឋាភិបាល អនុក្រិត្យលេខ១៥៨ ស្តីពីការធ្វើប្រទានកម្មប័ណ្ណកម្មសិទ្ធិ ជូនដល់ប្រជាពលរដ្ឋដែលបានកាន់កាប់ដាំដុះ អាស្រ័យផលជាក់ស្តែងនោះ គឺយើងត្រូវអនុវត្តអនុក្រិត្យ ដូចជា ក្នុងនោះដីដែលមិនទាន់បានដោះស្រាយគោលនយោបាយ ត្រូវប្រគល់ជូនប្រជាពលរដ្ឋ ដីដែលបានដោះស្រាយគោលនយោបាយ ហើយគឺត្រូវស្ថិតនៅក្រោមការគ្រប់គ្រង របស់អាជ្ញាធរអប្សរា ជាអ្នកកាន់កាប់ ដែលត្រូវចុះបញ្ជី និងជាអ្នកចេញប័ណ្ណកម្មសិទ្ធិ ដើម្បីអនុវត្តអនុក្រិត្យនេះគឺជា របស់រាជរដ្ឋាភិបាល យើងមានរដ្ឋបាលសាលាខេត្ត ជាមួយអាជ្ញាធរអប្សរា បានបង្កើតគណៈកម្មការ ចម្រុះមួយ ដើម្បីអនុវត្តអនុក្រិត្យ។ ទីតាំងដីដែលបានមកអនុវត្តរុះរើនាពេលនេះ គឺជាក្បាលដីដែលអាជ្ញាធរជាតិអប្សរាបានដោះស្រាយគោលនយោបាយរួចហើយ និងមានឯកសារបញ្ជាក់ច្បាស់លាស់ទទួលស្គាល់ដោយក្រុមការងារអន្តរក្រសួងដោះស្រាយគោលនយោបាយដីធ្លីបុរីទេសចរណ៍វប្បធម៌។
លោកបន្ថែមថា ក្នុងពេលថ្មីៗកន្លងមកនេះ ស្រាប់តែមានឈ្មោះ ហួន សីហា មន្ត្រីយោធា និងបក្ខពួកខ្លួន មកចូលមករំលោភយកជាកម្មសិទ្ធិដោយធ្វើរបងថ្មព័ទ្ធលួសបន្លា ធ្វើរោងចាំដី ដាំដើមស្វាយធំៗស្រាប់ ដាំចេក ដាក់លូ និងចាក់ដី នេះមានទំហំប្រមាណជិត២ហិកតា ហើយអាជ្ញាធរជាតិអប្សរាក៏បានអញ្ជើញឈ្មោះ ហួន សីហា មកជួបដើម្បីដោះស្រាយ និងបានធ្វើលិខិតទៅឈ្មោះ ហួន សីហា ដើម្បីឲ្យធ្វើការរុះរើចេញដោយខ្លួនឯងក្នុងរយៈ១សប្តាហ៍។ ប៉ុន្តែបុគ្គលនេះ មិនត្រឹមតែពុំទទួលយកនូវសំណូមពររបស់អាជ្ញាធរជាតិអប្សរាទេ ថែមទាំងបានប្រើ ប្រាស់អាកប្បកិរិយាមិនសមរម្យ និងបង្កការលំបាកក្នុងការចុះអនុវត្តការងារដល់មន្ត្រី សាធារណៈ ថែមទៀត។ ទើបដល់ថ្ងៃទី៣០ខែមករា ឆ្នាំ២០១៨នេះជាលើកទី៣ ទើបបានសម្រេច ដែលអាជ្ញាធរជាតិអប្សរា សហការជាមួយអាជ្ញាធរក្រុង និងសមត្ថកិច្ចចម្រុះ ដោយមានការចូលរួម សម្របសម្រួល ដោយលោក រៀម ចន្ននី ព្រះរាជ្ញអាជ្ញារង អមសាលាដំបូងខេត្តផងដែរ។
ចំណែកលោក សូរ ប្លាតុង អភិបាលក្រុងសៀមរាប បានសំណូមពរដល់ប្រជាពលរដ្ឋទាំងអស់ ពិសេសអ្នកចំណូលថ្មី មុននឹងទិញដីនៅតំបន់ណាមួយ ត្រូវសួរប្រវត្តិដីទីនោះឱ្យច្បាស់លាស់សិនចៀសវាងកុំឱ្យមានបញ្ហា ផ្លូវច្បាប់ផ្សេងៗ។ ក្រៅពីនេះ លោកអភិបាលក្រុងក៏ស្នើសុំដល់ប្រជាពលរដ្ឋទាំងអស់ ចូលរួមថែរក្សា សណ្តាប់ធ្នាប់ ពិសេសកុំរំលោភដីចំណីផ្លូវ ត្រូវទុកដើម្បីឱ្យអាជ្ញាធរមានលទ្ធភាពរៀបចំក្រុងឱ្យបានល្អ ប្រយោជន៍ដើម្បីប្រជាពលរដ្ឋ និងសម្រាប់ភ្ញៀវទេសចរណ៍៕
https://youtu.be/Kkt4a6oE4Ts
ចែករំលែកព័តមាននេះ