ទីក្រុងហាណូយ ៖ ការអនុម័តការបន្ថយពន្ធមកស្មើ០%ស្របតាមកិច្ចព្រមព្រៀងពាណិជ្ជកម្មផលិតផលអាស៊ាន ឬATIGAដែលចូលជាធរមានកាលពីថ្ងៃទី១ មករា កន្លងទៅ បានបង្កជាកង្វល់ដល់វិស័យស្ករវៀតណាម ។
នោះក៏ព្រោះតែវិស័យស្ករកំពុងតែជួបប្រទះនឹងការនាំចូលស្ករជាច្រើនក្នុងទីផ្សារ ។ អ្នកនៅក្នុងវិស័យនេះបាននិយាយថា វិស័យស្ករអាចនឹងដំណើរការមិនបានល្អទេក្នុងអំឡុងឆ្នាំពី២០១៨ដល់២០១៩ខាងមុខនេះ ព្រោះក្រុមហ៊ុនកែច្នៃនឹងត្រូវប្រកួតប្រជែងជាមួយនឹងស្ករពីប្រទេសថៃ ខណៈដែលពួកគេមិនទាន់មានភាពប្រកួតប្រជែងខ្ពស់នៅឡើយ ។
រោងចក្រកែច្នៃជាច្រើនត្រូវបានបិទដំណើរការ ខណៈដែលកសិករងាកចេញពីការដាំអំពៅផងដែរ ។ ដើម្បីជួយដល់វិស័យនេះ អ្នកពាក់ព័ន្ធត្រូវដោះស្រាយបញ្ហាដែលកំពុងតែកើតមានឲ្យបានលឿន ។
បញ្ហានេះកើតមានឡើងក្នុងចុងឆ្នាំ២០១៧ ដែលជារដូវកាលថ្មី ហើយក្រុមហ៊ុននៅមានស្ករស្តុកទុកច្រើន ។ បើទោះជាតម្លៃទីផ្សារស្មើប្រមាណតែ៥០សេនក្នុង១គីឡូក្រាមពិតមែន ក្រុមហ៊ុនផលិតនៅតែជួបការលំបាកក្នុងការលក់ចេញ ។
សមាគមស្ករវៀតណាម បាននិយាយថា អតិថិជនបានរង់ចាំដល់ដើមឆ្នាំ២០១៨ ដើម្បីទិញផលិតផលនាំចូលពីប្រទេសដទៃដែលរួមមានប្រទេសថៃ ។ លើសពីនេះ ប្រសិនបើស្ថានការណ៍នេះបន្តកើតមានឡើង កសិករដាំអំពៅនឹងមិនអាចលក់វត្ថុធាតុដើមដល់រោងចក្រកែច្នៃក្នុងតម្លៃខ្ពស់ទេ។ សមាគមបានបន្ថែមថា ទីផ្សារស្ករពិតជាមិនល្អឡើយ ហើយកសិករនឹងជួបប្រទះនឹងទុក្ខលំបាក ។
លោក Pham Quoc Doanh ប្រធានសមាគមខាងលើបាននិយាយថា ដើម្បីដោះស្រាយបញ្ហានេះ អ្វីដែលសំខាន់ជាងគេគឺការបង្កើនគុណភាពដំណាប់អំពៅ ។
ជាមួយគ្នានេះ លោកបាននិយាយថា រោងចក្រត្រូវតែគាំទ្រដល់កសិករ មានគោលនយោបាយដើម្បីរក្សាគុណភាពនៃតំបន់ដាំដុះ ចែករំលែកអត្ថប្រយោជន៍ និងធ្វើឲ្យពួកគេចូលរួមដើម្បីអភិវឌ្ឍន៍ផ្នែកនេះ ៕
ចែករំលែកព័តមាននេះ