រាជធានីភ្នំពេញ ៖ កម្មវិធីប្រឡងចម្រៀង«ចង់ក្លាយជាតារា»រកឃើញម្ចាស់ជ័យលាភីហើយ ។ ការប្រកួតវគ្គផ្តាច់ព្រ័ត្ររៀបចំឡើងនៅស្ថានីយទូរទស្សន៍អប្សរា ក្រោមវត្តមានគណៈកម្មការ និងថ្នាក់ដឹកនាំប្រចាំស្ថានីយ ។
«ចង់ក្លាយជាតារា»ចំណាត់ថ្នាក់លេខ១ បានទៅលើបេក្ខជនដុង សូ ពីខេត្តក្រចេះ ។ ចំណាត់ថ្នាក់លេខ២បានទៅប៊ុន បុស្បា ពីខេត្តតាកែវ ។ ចំណាត់ថ្នាក់លេខ៣បេក្ខជនសឿន ខិនច័ន្ទតារា ពីខេត្តស្វាយរៀង ។
ចំណាត់ថ្នាក់កិត្តិយសបានទៅលើបេក្ខជន ឈន ប៊ុនណាត ។ បេក្ខជនរិន ឆាន្នី និងបេក្ខនារីឡុង សុជាតា ។
លោកនូ សុផេន អ្នករៀបចំកម្មវិធីប្រឡងចម្រៀង«ចង់ក្លាយជាតារា»ឱ្យដឹងថា ពួកគេទាំងអស់នឹងក្លាយជាតារាចម្រៀងជាប់កិច្ចសន្យាប្រចាំស្ថានីយទូរទស្សន៍អប្សរារយៈពេល២ឆ្នាំនិងមានកម្មវិធីសម្តែងតាមខេត្ត-ក្រុងជាច្រើនតាមគម្រោង ។ ជាពិសេសរួមគ្នាផលិតចម្រៀងនិយាយពីបរិស្ថាន និងចម្រៀងដ៏ពីរោះជាច្រើនទៀត ។
អប្សរានឹងបន្តកម្មវិធីនេះនៅរដូវកាលទី២បន្តទៀត ដើម្បីលើកស្ទួយវប្បធម៌ សិល្បៈខ្មែរ ក៏ដូចជាការឆ្លើយតបនឹងការស្រឡាញ់វិស័យសិល្បៈរបស់យុវវ័យ ។
លោកនូ សុផេន និយាយថា «អ្នកប្រលងជាប់ពិតជាមានចម្រៀងផ្ទាល់ខ្លួន ល្អៗចាក់ចំបេះដូងអ្នកស្តាប់ អ្នកទស្សនា ។ សម្រាប់រដូវកាលថ្មីមានវិញ្ញាសាសម្តែង វិញ្ញាសាសមត្ថភាពទេពកោសល្យពិសេស និងចម្រៀង ។ កម្មវិធីរំពឹងថានឹងរកឃើញបេក្ខជន ល្អៗគ្រប់ជំនាន់បន្តទៅមុខទៀត »។
អ្នកស្រីសួន ចន្ថា ក្នុងនាមជាគណៈកម្មការមានមោទនភាពដែលរើសបានបេក្ខជនល្អត្រូវចិត្តអ្នកគាំទ្រកម្មវិធី ។ អ្នកស្រីនិយាយថា «អ្នកជាប់ពិតតែក្នុងចិត្តរីករាយមែន តែមុនបានឈរតំណែងកំពូលនេះ គឺអ្នកប្រឡងទាំងអស់រងសម្ពាធច្រើន ដូចជាការដាក់វិញ្ញាប្រឡងមានតាំងពីសម័យ ភ្លេងការ និងឈុតឆាក ផ្សេងៗទៀតដ៏តឹងតែងដើម្បីចម្រាញ់អ្នកខ្លឹមតបការទទួលស្គាល់ពីមហាជន» ៕
ចែករំលែកព័តមាននេះ