ខេត្តបាត់ដំបង ៖ សេចក្ដីរាយការណ៍បានឱ្យដឹងថា កម្លាំងបង្ការបង្ក្រាបនៃស្នងការខេត្ត បាននាំខ្លួនបុរសស្រវឹងស្រាជោកជាំ២នាក់ទៅកាន់ស្នងការខេត្ត ដោយសារតែជនទាំង២នាក់នេះផឹកស៊ីច្រៀងខារ៉ាអូខេក្នុងហាងមួយកន្លែងមិនព្រមបង់លុយ និងប៉ុនប៉ងជិះម៉ូតូរត់ តែទៅបុកជាប់នឹងទ្វារបងហាង ។ ហេតុការណ៍នេះ បានកើតឡើងកាលពីវេលាម៉ោង០៧ និង៣០នាទីយប់ថ្ងៃទី២១ មករា ស្ថិតក្នុងហាងផឹកស៊ីមួយកន្លែងក្នុងភូមិស្លាកែត សង្កាត់ស្លាកែត ក្រុងបាត់ដំបង ។
បើតាមសមត្ថកិច្ចឱ្យដឹងជាបឋមថា ជនទាំង២នាក់នោះ មានត្រូវគេស្គាល់ថា ម្នាក់ឈ្មោះហេង និងម្នាក់ទៀតឈ្មោះដូង មានទីលំនៅក្នុងភូមិវត្តលៀប សង្កាត់ចំការសំរោង ក្រុងបាត់ដំបង ។
បើតាមម្ចាស់ហាងបាននិយាយថា ក្រុមនេះមានបក្សពួក៤នាក់ បាននាំគ្នាចូលទៅផឹកស៊ី និងច្រៀងខារ៉ាអូខេក្នុងហាងរបស់ខ្លួន តាំងពីម៉ោង៥ល្ងាច ។ ប៉ុន្តែមុនពេលទៅដល់ក្រុមនេះ ម្នាក់ៗស្រហាក់ដូចជាស្រវឹងជោកជាំអស់ទៅហើយ ។ ម្ចាស់ហាងបានឲ្យដឹងទៀតថា លុះជិតដល់ម៉ោងគិតលុយ ស្រាប់តែបក្សពួក២នាក់បានដោះខ្លួនចេញមុនបាត់ សល់តែ២នាក់នេះ ហើយក្រោយមកក៏ឱ្យគិតលុយអស់១៧ម៉ឺនរៀល តែពួកគេមិនឲ្យលុយ ហើយព្យាយាមជិះម៉ូតូរត់ គាត់ក៏ទាញទ្វារបិទ តែត្រូវជននេះជិះបុកទ្វាបាក់ខ្ទេចជាប់ទៅមុខមិនរួច ទើបប្តឹងសមត្ថកិច្ចឲ្យជួយអន្តរាគមន៍តែម្ដងទៅ។
ទោះជាយ៉ាងណា នៅកន្លែងកើតហេតុ គេឃើញម្ចាស់ហាង និងសមត្ថកិច្ចបានព្យាយាមសម្របសម្រូល និងទុកឱកាសឲ្យពួកគេយកលុយមកសង តែមិនត្រិមតែមិនព្រមសងទេ ថែមទាំងស្រែកដៀលម្ចាស់ហាង យកឈ្មោះអ្នកធំមកកម្ញើញ និងបបូលសមត្ថកិច្ចវ៉ៃគ្នាមួយស្មើទៀតផង ។ ដូច្នេះហើយ ទើបលោកស្នងការខេត្តបញ្ជាឲ្យនាំខ្លួនទៅកាន់ស្នងការខេត្តចាត់ការតាមនីតិវិធីតែម្ដងទៅ ។
ប៉ុន្តែបើតាមប្រភពព័ត៌មាននៅព្រឹកថ្ងៃទី២២ មករា នេះ បានឲ្យដឹងថា អ្នកផឹកគ្មានព្រំដែនដ៏កាចសាហាវនេះ បែរជាស្លូត ហើយបានទូរស័ព្ទទៅសុំទោសម្ចាស់ហាង ដើម្បីសុំសម្រូលបញ្ចប់រឿង។
ចែករំលែកព័តមាននេះ