ខេត្តបាត់ដំបង ៖ យោងតាមសេចក្ដីរាយការណ៍បានឱ្យដឹងថា គិតត្រឹមវេលាម៉ោង៥ល្ងាចថ្ងៃទី១៩ មករា នេះ សត្វដំរីព្រៃដែលទាត់ស្ត្រីម្នាក់ បណ្ដាលឱ្យបាក់ឆ្អឹងជំនីរម្ខាងនោះ គឺពេលនេះបានធ្វើដំណើរទៅដល់ព្រៃ នៃតំបន់ភ្នំពុម្ភហើយ…
ខេត្តបាត់ដំបង ៖ យោងតាមសេចក្ដីរាយការណ៍បានឱ្យដឹងថា គិតត្រឹមវេលាម៉ោង៥ល្ងាចថ្ងៃទី១៩ មករា នេះ សត្វដំរីព្រៃដែលទាត់ស្ត្រីម្នាក់ បណ្ដាលឱ្យបាក់ឆ្អឹងជំនីរម្ខាងនោះ គឺពេលនេះបានធ្វើដំណើរទៅដល់ព្រៃ នៃតំបន់ភ្នំពុម្ភហើយ ដែលស្ថិតក្នុងភូមិរកាំ ឃុំបារាំងធ្លាក់ ស្រុកភ្នំព្រឹក ។
សេចក្ដីរាយការណ៍បន្តទៀតថា ដំរីឈ្មោលនោះ ហាក់មិនបង្ហាញនូវភាពកាចសាហាវទេ តែវាបានបន្តដំណើរមិនឈប់ឈរ ចាប់តាំងយប់មិញមក ដោយចាកចេញពីភ្នំណាំសាប តំបន់អភិរក្ស «រនាមដូនសំ» ដែលជាកន្លែង បង្កគ្រោះថ្នាក់ដល់មនុស្ស ។
អាជ្ញាធរស្រុកភ្នំព្រឹកបានប្រាប់ទៀតថា ខណៈនេះ កម្លាំងសមត្ថកិច្ច និងមន្ត្រីជំនាញកំពុងតាមដានសកម្មភាព និងដំណើរវិវឌ្ឍនៃសត្វដំរីដ៏ធំមួយក្បាលនេះ យ៉ាងប្រកិតបំផុត ។ ប៉ុន្តែ អាជ្ញាធរនៅតែអំពាវនាវដល់ប្រជាពលរដ្ឋដែលរស់នៅក្បែរតំបន់នោះ សូមកុំធ្វើដំណើរទៅក្បែរ ឬដេញវាយដំវា ក្រែងវាបង្កឲ្យមានគ្រោះថ្នាក់ជាថ្មីទៀត ។
គួររំលឹកថា សត្វដំរីនេះជាដំរីដែលបានឆ្លងដែនពីទឹកដីថៃ ចូលមកក្នុងទឹកដីស្រុកម៉ាឡៃ ខេត្តបន្ទាយមានជ័យកាលពីសប្ដាហ៍មុន ហើយដំរីព្រៃនេះបានបន្តដំណើរ ឆ្ពោះមកកាន់ទឹកដីឃុំបួរ ស្រុកភ្នំព្រឹក រហូតបង្កគ្រោះថ្នាក់ដល់មនុស្សតែម្តង ។
អាជ្ញាធរមូលដ្ឋានបានប្រកាសអាសន្នដល់ប្រជាពលរដ្ឋភ្លាមៗឱ្យមានការប្រុងប្រយ័ត្ន ចំពោះដំរីព្រៃចុះប្រេងមួយក្បាលដែលគេស្គាល់ថាជាដំរីព្រៃមកពីប្រទេសថៃ បន្ទាប់ពីវាបានយកជើងឈូសស្ត្រីម្នាក់ដែលកំពុងដេកលក់ក្នុងរោងចម្ការ បណ្ដាលឱ្យបាក់ឆ្អឹងជំនីរមួយចំហៀងខាងស្ដាំ កាលពីវេលាម៉ោង២ និង៣០នាទីយប់ឈានចូលថ្ងៃទី១៨ មករា នៅចំណុចភ្នំណាំសាប ស្ថិតក្នុងភូមិដំណាក់ក្សាន្ត ឃុំបួរ ស្រុកភ្នំ
ព្រឹក ។
ចែករំលែកព័តមាននេះ