លោកពេជ្រ ភិរុណ និយាយពីអម្ពរ ទេវី
- ភ្នំពេញ
រាជធានីភ្នំពេញ ៖ ក្នុងដំណើរមកកាន់ប្រទេសកម្ពុជារបស់អ្នកនាងអម្ពរ ទេវី មានការ ចាប់អារម្មណ៍ពេញសង្គមសិល្បៈ និងមហាជនទូទៅ ។ នៅអាកាសយានដ្ឋានគេឃើញលោកពេជ្រ ភិរុណ…
រាជធានីភ្នំពេញ ៖ ក្នុងដំណើរមកកាន់ប្រទេសកម្ពុជារបស់អ្នកនាងអម្ពរ ទេវី មានការ ចាប់អារម្មណ៍ពេញសង្គមសិល្បៈ និងមហាជនទូទៅ ។ នៅអាកាសយានដ្ឋានគេឃើញលោកពេជ្រ ភិរុណ បានទៅទទួលអតីតភរិយាជាមួយអារម្មណ៍រីករាយ ។
អ្នកនាងអម្ពរ ទេវី ថ្លែងពេលមកដល់កម្ពុជាថា «ខ្ញុំពិតជារំភើបចិត្តណាស់ រហូតទប់ទឹកភ្នែកមិនជាប់ នៅពេលដែលឃើញបងប្អូនទស្សនិកជននៅតែគាំទ្រ ផ្ដល់កម្លាំងចិត្ត និងបានមកទទួលយ៉ាងកុះករបែបនេះ ។ អ្វីដែលធ្វើឲ្យខ្ញុំកាន់តែមានមោទនភាពទៀតនោះ ខ្ញុំបានវិលមកថតភាពយន្តជាថ្មី ដើម្បីបម្រើអារម្មណ៍បងប្អូនទស្សនិកជន» ។
នៅពេលដឹងថាអ្នកនាងអម្ពរ ទេវី មកដល់កាលពីរសៀលថ្ងៃទី១១ មករា ២០១៨ មហាជននៅអាកាសយានដ្ឋានទទួលស្វាគមន៍នាងទាំងក្តីនឹករលឹក និងរំភើប ដោយដឹងថានាងបើកចិត្តវិលមកចូលរួមសម្តែងវិញ ។ អ្នកនាងអម្ពរ ទេវី និយាយថា «បន្ទាប់ពីទទួលបានការគាំទ្រក្នុងការសម្ដែងរឿង«ទឹកចិត្តម្ដាយសម័យថ្មី» ក៏មានផលិតករទាក់ទងឲ្យនាងថតភាពយន្តបន្តទៀត ហើយការមកលើកនេះគឺត្រូវថតខ្សែភាពយន្តភាគរឿង «ឆន្ទា» ឲ្យផលិតកម្ម Red picture ដែលនាងសម្ដែងជាតួអង្គស្ត្រីអ្នកជំនួញដែលមានចរិតម៉ឺងម៉ាត់» ។
ចំណែកលោកពេជ្រ ភិរុណ និយាយថា «ខ្ញុំសប្បាយចិត្តដែលអ្នកនាងអម្ពរ ទេវី នៅតែពេញនិយមពីស្រទាប់មហាជន ពេញចិត្តដូចកាលនៅពីក្មេង ។ នៅក្មេងអម្ពរ ទេវីសម្តែងបែបក្មេងដល់ពេលចាស់ទៅគាត់សម្តែងរឹតតែល្អ ។ អ៊ីចឹងមិនបាច់ភ័យថាទាល់តែក្មេងស្អាតទើបថតបាននោះទេ សំខាន់ចាស់ក៏ថតបានឱ្យតែសម្តែងកើត ។ សូមសរសើរគាត់ពូកែចូលអារម្មណ៍ ហើយក៏មិនដឹងថាអារម្មណ៍ខាងក្នុងបែបណាទេ តែបើដល់ម៉ោងថតហើយដាក់តួអ្វីនោះដឹងតែស្លុងតាមគាត់ដូចមានអ្វីម្យ៉ាងនៅក្នុងខ្លួន ។
សម្រាប់ខ្ញុំយល់ថាល្អ គាត់មកលើកនេះដូចជារៀមច្បងមកបង្រៀន ប្អូនៗ នេះជាតិចនិកថ្មីពេលដែលគាត់ដល់វ័យច្រើន មិនក្មេងដូចមុន ថាតើល្បិចសម្តែង និងជំនាញបែបណាជាឱកាសសម្រាប់អ្នកសិល្បៈរលកក្រោយ» ។
អ្នកនាងអម្ពរ ទេវី មកចូលរួមសម្តែងឲ្យផលិតកម្មRED PICTURE ក្រោមចំណងជើងថា«ឆន្ទា» របស់ទូរទស្សន៍CTN និងថតរឿង«កាកី» របស់ផលិតកម្មLD ដែលគ្រោងចាក់ផ្សាយនៅលើកញ្ចក់ទូរទស្សន៍ PNN ។
នេះជាដំណើរមកថតភាពយន្តលើកទី២ បន្ទាប់ពីអ្នកនាងអម្ពរ ទេវី មកចូលរួមថតរឿង «ទឹកចិត្តម្តាយសម័យថ្មី» របស់អ្នកស្រី ពាន់ ភួង បុប្ផា កាលពីប៉ុន្មានខែកន្លងទៅ ៕
ចែករំលែកព័តមាននេះ