រាជធានីភ្នំពេញ ៖ មិនត្រឹមតែជាបេះដូងនៃប្រទេសកម្ពុជាប៉ុណ្ណោះទេ ភ្នំពេញគឺជារាជធានីវ័យចំណាស់មួយដែលសម្បូរដោយតំបន់វប្បធម៌ប្រវត្តិសាស្ត្រ ធម្មជាតិ និងសំណង់ស្ថាបត្យកម្មជំនាន់ដើម ដែលកំពុងទាក់ទាញទេសចរយ៉ាងខ្លាំង ។ ក្នុង១ឆ្នាំៗ ប៉ូលសេដ្ឋកិច្ចដ៏សំខាន់មួយនេះបានស្រូបយកភ្ញៀវទេសចរអន្តរជាតិមកទស្សនាសម្រាកលម្ហែកាយរាប់លាននាក់ ដែលបង្កើតឲ្យមានសកម្មភាពសេដ្ឋកិច្ចយ៉ាងច្រើនដល់សង្គមជាតិ។
ស្ថិតក្នុងគោលដៅផ្សព្វផ្សាយឲ្យកាន់តែទូលំទូលាយដើម្បីទាក់ទាញភ្ញៀវទេសចរថែមមួយកម្រិតទៀត មន្ត្រីជំនាញបានបង្ហាញពីតំបន់សក្តានុពលទេសចរណ៍សំខាន់ៗនៅរាជធានីភ្នំពេញ ក្នុងនោះមានគោលដៅចំនួន៤ រួមមាន ទេសចរណ៍វប្បធម៌ ទេសចរណ៍ប្រវត្តិសាស្ត្រ ទេសចរណ៍ធម្មជាតិ និងទេសចរណ៍ស្ថាបត្យកម្ម ។
លោកស្រី គឹម វណ្ណា ប្រធានមន្ទីររាជធានីភ្នំពេញ បានថ្លែងថា រាជធានីភ្នំពេញ ជាតំបន់ប៉ូលទេសចរណ៍មួយក្នុងចំណោមប៉ូលទេសចរណ៍ទាំង៤នៅកម្ពុជា រួមមាន សៀមរាប ក្រុងព្រះសីហនុ និងតំបន់ភូមិភាគឦសាន ។ លោកស្រីថា ចំពោះសក្តានុពលទេសចរណ៍ទាំង៤ ដែលរាជធានីភ្នំពេញមានដូចជា តំបន់ទេសចរណ៍វប្បធម៌ គឺពោរពេញដោយអគារលម្អក្បូរក្បាច់រចនាដ៏ទាក់ទាញបង្កប់ទៅដោយអត្ថន័យ សិល្បៈ និងសាសនា ដូចជា ព្រះបរមរាជវាំង វត្តឧណ្ណាលោម និងវត្តបុទុមវត្តី ។ល។
ចំណែកសក្តានុពលទេសចរណ៍ប្រវត្តិសាស្ត្រ គឺរាជធានីភ្នំពេញ មានទីតាំងមួយចំនួនដែលបានរំលេចពីការចងចាំផ្នែកប្រវត្តិសាស្ត្រក្នុងរយៈពេលខុសៗគ្នា ដូចជា រមណីយដ្ឋានវត្តភ្នំ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងជើងឯក ។ល។ ទន្ទឹមនឹងនោះ រាជធានីភ្នំពេញក៏បង្ហាញនូវទេសចរណ៍ធម្មជាតិដ៏ស្រស់បំព្រង និងគួរជាទីគយគន់ផងដែរ ដូចជា ចំណុចប្រសព្វនៃទន្លេចតុមុខ ច្រាំងទន្លេមុខព្រះបរមរាជវាំង និងកោះដាច់ជាដើម ។
លោកស្រី គឹម វណ្ណា បានបន្ថែមថា ៖«ក្រៅពីសក្តានុពលទាំង៣ខាងលើ នៅមានសក្តានុពលទេសចរណ៍បែបស្ថាបត្យកម្មថែមទៀត ដូចជា អគារសំណង់សម័យអាណានិគមនិយមបារាំងនានា ដែលត្រូវបានអភិរក្ស និងឈរបង្ហាញភ្ញៀវទេសចរនៅភាគខាងជើងនៃរាជធានី ។ ចំណែកសក្តានុពលមួយទៀត គឺរមណីយដ្ឋានទេសចរណ៍ ក៏ជាផ្នែកមួយយ៉ាងសំខាន់ក្នុងការទាក់ទាញភ្ញៀវទេសចរផងដែរ » ។
លោកស្រីប្រធានមន្ទីរបានបញ្ជាក់ថា តំបន់ទេសចរណ៍នៅជុំវិញរាជធានីភ្នំពេញ ដែលសម្បូរទៅដោយរមណីយដ្ឋានដ៏ទាក់ទាញ គឺជាផ្នែកមួយកំពុងទាក់ទាញភ្ញៀវទេសចរមកសម្រាកកម្សាន្តនៅរាជធានីភ្នំពេញ រួមមានរមណីយដ្ឋានភ្នំឧត្តុង, សួនសត្វភ្នំតាម៉ៅ, រមណីយដ្ឋានទន្លេបាទី, រមណីយដ្ឋានភ្នំជីសូរ, រមណីយដ្ឋានភ្នំរាប និងរមណីយដ្ឋានកៀនស្វាយជាដើម ។
លោកស្រីក៏បានបង្ហាញនូវតួលេខត្រួសៗនៃចំនួនភ្ញៀវទេសចរសម្រាប់រាជធានីភ្នំពេញ ក្នុងនោះ គិតត្រឹមរយៈពេល៥ខែ ដើមឆ្នាំ២០១៧ ទទួលបានភ្ញៀវទេសចរអន្តរជាតិចំនួនជិត១,២លាននាក់ កើនឡើង១៣% បើធៀបនឹងរយៈពេលដូចគ្នានៃឆ្នាំ២០១៦ ។ ក្នុងនោះភ្ញៀវទេសចរអន្តរជាតិដែលចូលតាមព្រលានយន្តហោះអន្តរជាតិភ្នំពេញ ចំនួន៥៥៩.៧៥៩នាក់ កើនឡើង១៨,៨% ។
លោកស្រីថា ទីផ្សារសំខាន់ៗរួមមាន ចិន វៀតណាម អង់គ្លេស អាមេរិក អូស្ត្រាលី និងបារាំង ។ល។
យ៉ាងណាក៏ដោយ លោកស្រីបានលើកឡើងនូវបញ្ហាប្រឈមមួយចំនួនដែលគប្បីត្រូវយកចិត្តទុកដាក់ផងដែរដូចជា បញ្ហាកកស្ទះចរាចរណ៍, ការចតយានយន្តគ្មានសណ្តាប់ធ្នាប់ដែលធ្វើឲ្យប៉ះពាល់ដល់ការធ្វើដំណើរ និងកម្សាន្ដរបស់ភ្ញៀវទេសចរ, បញ្ហាបរិស្ថាន និងអនាម័យ ដែលមិនទាន់រៀបចំឲ្យមានលក្ខណៈស្តង់ដា រួមទាំងបញ្ហាសន្តិសុខ សុវត្ថិភាពសម្រាប់ភ្ញៀវទេសចរផងដែរ ខណៈពេលខ្លះជនខិលខូចបានឆ្លៀតឱកាសធ្វើសកម្មភាពលួច និងឆក់ទ្រព្យសម្បត្តិភ្ញៀវជាដើម ។
លោកស្រីប្រធានមន្ទីររូបនោះក៏បានអះអាងថា អាស្រ័យដោយការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដោយមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ធ្វើឲ្យកម្ពុជារីកចម្រើនលើគ្រប់វិស័យ ជាពិសេសវិស័យទេសចរណ៍ ដោយភ្ញៀវទេសចរបានកើនឡើងជាបន្តបន្ទាប់គួរជាទីមោទនៈ ។
លោកស្រីបន្ថែមថា ៖« កត្តាសន្តិភាព សន្តិសុខ ហេដ្ឋារចនាសម្ព័ន្ធ និងភាពសម្បូរបែបលើធនធានធម្មជាតិវប្បធម៌ ក៏ដូចជាស្ថាបត្យកម្ម ជាមូលដ្ឋានដ៏សំខាន់ក្នុងការទាក់ទាញភ្ញៀវទេសចរជាតិ និងអន្តរជាតិមកទស្សនារាជធានីភ្នំពេញ » ។
គួរបញ្ជាក់ផងដែរថា ក្នុងដំណាច់ឆ្នាំ២០១៧ កម្ពុជាបានទទួលស្វាគមន៍ការមកដល់នៃភ្ញៀវទេសចរអន្តរជាតិប្រមាណ៥,៦លាននាក់ កើនឡើង១១% បើធៀបនឹងឆ្នាំ២០១៦ ។
ក្នុងចំណោមភ្ញៀវទេសចរបរទេសជាង៥លាន៦សែននាក់នេះ គឺមានភ្ញៀវទេសចរចិនជាប់លំដាប់ថ្នាក់លេខ១ ដែលមានប្រមាណជាង១លាននាក់។ វៀតណាមនៅលំដាប់លេខ២ និងលេខរៀងបន្ទាប់ គឺភ្ញៀវទេសចរមកពីអឺរ៉ុប ។
លោកស្រី ឆាយ ស៊ីវលីន ប្រធានទីភ្នាក់ងារទេសចរណ៍កម្ពុជា បានបញ្ជាក់ថា ការកើនឡើងនៃចំនួនភ្ញៀវទេសចរនេះ បានបង្ហាញឲ្យឃើញកាន់តែច្បាស់ពីការខិតខំរបស់រាជរដ្ឋាភិបាល និងក្រសួងទេសចរណ៍ ដែលបានដាក់ចេញនូវផែនការជាក់លាក់ដើម្បីទាក់ទាញភ្ញៀវទេសចរអន្តរជាតិកន្លងមក ។ ប៉ុន្តែយ៉ាងណាក៏ដោយ លោកស្រីស្នើឱ្យក្រសួងទេសចរណ៍បង្កើតកន្លែងតំបន់ទេសចរណ៍ថ្មីបន្ថែមទៀត ពង្រឹងសេវាកម្មទេសចរ និងការបណ្តុះបណ្តាលធនធានមនុស្សឲ្យបានច្រើនផងដែរដើម្បីឆ្លើយតបទៅនឹងកំណើនភ្ញៀវទេសចរ ។ ដោយឡែក ប្រជាពលរដ្ឋវិញត្រូវចូលរួមថែរក្សាបរិស្ថានអនាម័យនៅតាមតំបន់រមណីយដ្ឋានទេសចរណ៍ទូទាំងប្រទេសឲ្យបានល្អប្រសើរ ដើម្បីទាក់ទាញភ្ញៀវទេសចរចង់មកទស្សនាកម្ពុជាកាន់តែច្រើនឡើងថែមទៀត ៕
ចែករំលែកព័តមាននេះ