អាជ្ញាធរនិយាយកាលពីពេលថ្មីៗនេះថា ចម្លាក់លើថ្មបន្ទះភ្នំភ្លើងមានអាយុកាលជាង៣.៥០០ឆ្នាំទៅហើយនោះត្រូវក្រុមចោរលួចដាប់យក ព្រមទាំងបានកម្ទេចចម្លាក់ផ្សេងៗទៀតចោលនៅក្នុងតំបន់ប្រវត្តិសាស្ត្ររដ្ឋកាលីហ្វ័រនីញ៉ា សហរដ្ឋអាមេរិក ។ការិយាល័យគ្រប់គ្រងដែនដីនិយាយថា ចម្លាក់ថ្មនៅលើខ្ពង់រាបបន្ទះភ្នំភ្លើងភាគខាងកើតឧទ្យានជាតិ Yosemite តំណាងឱ្យគំរូសម័យ
អាជ្ញាធរនិយាយកាលពីពេលថ្មីៗនេះថា ចម្លាក់លើថ្មបន្ទះភ្នំភ្លើងមានអាយុកាលជាង៣.៥០០ឆ្នាំទៅហើយនោះត្រូវក្រុមចោរលួចដាប់យក ព្រមទាំងបានកម្ទេចចម្លាក់ផ្សេងៗទៀតចោលនៅក្នុងតំបន់ប្រវត្តិសាស្ត្ររដ្ឋកាលីហ្វ័រនីញ៉ា សហរដ្ឋអាមេរិក ។ការិយាល័យគ្រប់គ្រងដែនដីនិយាយថា ចម្លាក់ថ្មនៅលើខ្ពង់រាបបន្ទះភ្នំភ្លើងភាគខាងកើតឧទ្យានជាតិ Yosemite តំណាងឱ្យគំរូសម័យព្រេងនាយនៃសិល្បៈចម្លាក់ថ្មភ្នំដ៏ល្អឯកដែលបានឆ្លុះបញ្ចាំងឱ្យឃើញពីសកម្មភាពរបស់អ្នកប្រមាញ់រៀងរាល់ថ្ងៃនៅក្នុងតំបន់នោះ ។
មន្ត្រីគ្រប់គ្រងការិយាល័យគ្រប់គ្រងដែនដី លោកប័រណាដេត ឡូវ៉ាតូ មានប្រសាសន៍ថា «អ្នកដែលលួចដាប់យកចម្លាក់ទាំងនោះ បានកម្ទេចផ្នែកជាច្រើននៃកេរដំណែលវប្បធម៌ជាតិដែលមិនអាចរកអ្វីមកជំនួសបានឡើយ ។ យើងកំពុងធ្វើការជាមួយបណ្តាភ្នាក់ងារផ្សេងៗ ដើម្បីធ្វើយ៉ាងណានាំក្រុមខិលខូចទាំងនោះយកទៅផ្តន្ទាទោសតាមច្បាប់ និងយករូបចម្លាក់ទាំងនោះមកវិញ» ។
គេនៅមិនទាន់ដឹងច្បាស់ថា ពួកចោរចូលទៅលួចដាប់យកចម្លាក់ទាំងនោះតាំងពីពេលណាទេ ។ អ្នកនាំពាក្យការិយាល័យលោកដេវីដ គ្រីស្ទី ប្រាប់សារព័ត៌មានរ៉យទ័រថា វាពិតជាអាក្រក់ខ្លាំងណាស់ ។ កន្លែងនោះជាកន្លែងដែលត្រូវបានចុះក្នុងកន្លែងប្រវត្តិសាស្ត្រជាតិ ។ ក្នុងចំណោមសហគមន៍សិល្បៈចម្លាក់ថ្មកន្លែងនោះត្រូវបានគេស្គាល់ថា ជាគំរូល្អឯកនៃសិល្បៈចម្លាក់ថ្ម។ រហូតមកទល់នឹងពេលនេះ គេនៅមិនទាន់កំណត់មុខសញ្ញាជនសង្ស័យបាននៅឡើយទេ ហើយចំពោះចម្លាក់ថ្មទាំងនោះក៏មិនទាន់ទៅដល់ទីផ្សារងងឹតនៅឡើយ ។
ការិយាល័យគ្រប់គ្រងដែនដី នឹងផ្តល់រង្វាន់១.០០០ដុល្លារសម្រាប់អ្នកដែលផ្តល់ព័ត៌មានឈានទៅដល់ការចាប់ខ្លួនជនសង្ស័យ ហើយផ្តន្ទាទោសចំពោះជនណាដែលលាក់បំពួនពួកចោរទាំងនោះ ។ ជនល្មើសអាចជាប់ពន្ធនាគារ១ឆ្នាំ និងពិន័យជាប្រាក់២០.០០០ដុល្លារ ៕
ចែករំលែកព័តមាននេះ