យោងតាមទីភ្នាក់ងារព័ត៌មានបារាំងAFPបានឱ្យដឹងថា ប្រទេសអាហ្វហ្គានីស្ថានបានដំណើរការកម្មវិធីអក្ខរកម្មថ្មីមួយដែលអាចឱ្យស្រ្តីអាហ្វហ្គានីស្ថានទាំងអស់ទទួលបានការអប់រំមូលដ្ឋានអំឡុងពេលសង្គ្រាមរាប់ទសវត្សរ៍ឱ្យបានរៀនអាន និងសរសេរដោយប្រើទូរស័ព្ទដៃ ។
ទូរស័ព្ទនោះត្រូវបានគេហៅថា Ustad Mobile ឬហៅថា«Mobile Teacher» នឹងផ្ដល់នូវកម្មវិធីសិក្សាជាតិទាំងពីរភាសាគឺភាសាដារី (Dari)និងភាសាប៉ាស្ដូ (Pashto)ក៏ដូចជាគ្រូបង្រៀនគណិតវិទ្យាផងដែរ ។ រាល់មេរៀនទាំងអស់សិក្សាតាមរយៈវីដេអូសំឡេង ដោយមានការសរសេរ ការបញ្ចេញសំឡេងឃ្លាប្រយោគដែលត្រូវបានដំឡើងនៅក្នុងទូរស័ព្ទ Ustad Mobile ហើយត្រូវបានផ្ដល់ជូនសិស្សដោយឥតគិតថ្លៃ ។
អង្គុយនៅក្នុងថ្នាក់រៀនតូចមួយនៃទីក្រុងកាប៊ុលជាមួយបណ្ដាស្ត្រីផ្សេងៗទៀតដែលកំពុងខំរៀនសរសេរ និងអាន ស្ត្រីម្នាក់អាយុ១៨ឆ្នាំ ឈ្មោះមូសហ្គាន ណាហ្សារីនិយាយថាពួកឧទ្ទាមតាលីបង់បានហាមឃាត់ក្មេងស្រីទាំងអស់មិនឱ្យចូលសាលានៅអំឡុងការគ្រប់គ្រងរបស់ពួកគេ ហើយពេលនោះជាពេលដែលនាងចាប់ផ្ដើមដល់ពេលទទួលបានការអប់រំ ។ នាងប្រាប់ថា ៖ «ខ្ញុំមិនអាចទៅសាលារៀនបានព្រោះពួកតាលីបង់កាន់កាប់ទីក្រុងកាប៊ុលសូម្បីឪពុកខ្ញុំ ក៏ហាមមិនឱ្យបងស្រីខ្ញុំចូលសាលារៀនដែរ ។ ចាប់តាំងពីខ្ញុំបានទទួលដំណឹងពីកម្មវិធីបង្រៀនអក្ខរកម្មសម្រាប់ស្ត្រីមក ខ្ញុំបានសុំឪពុកម្ដាយខ្ញុំ ហើយគាត់បានអនុញ្ញាតឱ្យខ្ញុំបានចូលរៀនរៀងរាល់ថ្ងៃ» ។ ណាហ្សារីពេញចិត្តនឹងកម្មវិធីសិក្សានេះខ្លាំងណាស់ ហើយកម្មវិធីនេះទ្រទ្រង់ដោយស្ថាប័នពាណិជ្ជកម្ម និងក្រសួងអប់រំដោយមានជំនួយហិរញ្ញវត្ថុពីសហរដ្ឋអាមេរិក ។
សូមបញ្ជាក់ថា សូហ្វវែរ(Software )របស់Mobile Teacher ត្រូវបានអភិវឌ្ឍដោយក្រុមហ៊ុន Paiwastoonដែលជាក្រុមហ៊ុនព័ត៌មានវិទ្យារបស់អាហ្វហ្គានីស្ថាន ដោយមានជំនួយ៨០.០០០ដុល្លារ ហើយកម្មវិធីនេះត្រូវបានបង្កើតឡើងដើម្បីដោះស្រាយបញ្ហាអត្រាអនក្ខរភាពនៅលើពិភពលោក ។
យោងតាមតួលេខរបស់អង្គការសហប្រជាជាតិ បើទោះបីជាស្ត្រីជាច្រើនបានចូលសាលាក៏ដោយក៏អត្រាអក្ខរកម្មរបស់អាហ្វហ្គានីស្ថានក្នុងចំណោមស្ត្រីជាច្រើននៅតែមានកម្រិតត្រឹមតែ១២,៥%ដដែលបើធៀបនឹងបុរសមានចំនួន៣៩,៣% ។
លោកម៉ៃ ដសាន់ នាយកប្រតិបត្តិក្រុមហ៊ុនPaiwastoonមានប្រសាសន៍ថា នេះជាលើកដំបូងហើយដែលកម្មវិធីអក្ខរកម្មសិក្សាតាមទូរស័ព្ទមានឱកាសទទួលបានមេរៀនសិក្សាតាមរយៈទូរស័ព្ទដៃ ។ ក្រុមហ៊ុននេះធ្លាប់មានបទពិសោធន៍ក្នុងវិស័យនេះច្រើនរួចមកហើយដែលកាលណោះធ្លាប់បានរៀបចំកម្មវិធី«OneLaptop per child » ដែលបានផ្ដល់កុំព្យូទ័រ៣០០០គ្រឿងដល់ស្ត្រី និងកុមារនៅទីក្រុងកាប៊ុល ,កាន់,ដាហារ, ហ័ររ៉ាត់, បាហ្គលែន និងចាឡាឡាបាត ។ លោកថា យើងអាចធ្វើឱ្យការងារគ្រូបង្រៀនងាយស្រួលជាងមុនដោយប្រើវីដេអូ និងសំឡេង សំណួរ និងចម្លើយ ។
ទូរស័ព្ទដៃមានតម្លៃថោកជាងកុំព្យូទ័រ ហើយណាមួយប្រជាជនអាចស្គាល់វាស្រាប់ផង ម្យ៉ាងការថែទាំងាយស្រួលជាងកុំព្យូទ័រ ។ គេអាចដំឡើងកម្មវិធីនេះដោយឥតគិតថ្លៃនៅលើគ្រប់ទូរស័ព្ទទាំងអស់ដែលមានរន្ធដោតមេម៉ូរី និងកាមេរ៉ា ។ លោកដសាន់បន្ថែមថា យើងនឹងព្យាយាមចូលឱ្យដល់ប្រជាជនទាំងនោះតាមដែលអាចធ្វើទៅបាន ។ រឿងមួយទៀតយើងអាចបន្ថែមមុខវិជ្ជាជាច្រើនទៀតដូចជាភាសាអង់គ្លេស អារ៉ាប់ប៉ាស់ស្កូ សុខភាព និងកសិកម្មជាដើម ។ ក្រុមហ៊ុនPaiwastoon កំពុងរង់ចាំការពិភាក្សាជាមួយក្រុមហ៊ុនទូរស័ព្ទ និងប្រព័ន្ធផ្សព្វផ្សាយ ដើម្បីធ្វើឱ្យប្រជាជនយល់ដឹងពីកម្មវិធីនេះ ។ ប្រជាជនទូទៅប្រាកដជាមិនដឹងថា តើទូរស័ព្ទនេះអស្ចារ្យប៉ុនណាទេ វាដំណើរការដូចកុំព្យូទ័រអីុចឹង ។
ក្រសួងអប់រំនិយាយថា នៅពេលបច្ចុប្បន្ននេះមានកូនសិស្សប្រមាណ១០០នាក់ប្រើប្រាស់Mobile Teacher នេះនៅក្នុងគម្រោងសាកល្បងនៅទីក្រុងកាប៊ុល ហើយ៥៦%ជាស្រ្តី ។ ក្រសួងអប់រំនឹងធ្វើគ្រប់បែបយ៉ាងតាមដែលអាចធ្វើទៅបាន ដើម្បីជួយស្ត្រីទាំងនោះឱ្យបានរៀនសូត្រ និងចេះប្រើទូរស័ព្ទUstad Mobile នេះហើយក្រសួងនឹងផ្ដល់សូហ្វវែរតាមរយៈស៊ីឌី និងឌីវីឌីដោយឥតគិតថ្លៃ ៕
ចែករំលែកព័តមាននេះ