ខេត្តបន្ទាយមានជ័យ ៖ ដោយពិនិត្យឃើញថា អត្រាគ្រោះថ្នាក់ស្លាប់ដោយសារមិនពាក់មួកសុវត្ថិភាពមានកំណើនកើនឡើង អគ្គស្នងការនគរបាលជាតិ នឹងចាប់បង្ខំឲ្យប្រជាពលរដ្ឋពាក់មួកសុវត្ថិភាពឲ្យបានគ្រប់ៗគ្នា ខណៈអ្នកស្លាប់ដោយសារគ្រោះថ្នាក់ចរាចរដោយពុំពាក់មួកសុវត្ថិភាពមានការកើនឡើងខ្ពស់ រហូតដល់៧៨ភាគរយក្នុងចំណោមអ្នកស្លាប់ដោយគ្រោះថ្នាក់ចរាចរដោយម៉ូតូ ។ ជាក់ស្តែងនៅរសៀលថ្ងៃទី០៤ ខែមករា ឆ្នាំ២០១៨ ម្សិលមិញនេះ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានចុះចែកមួកសុវត្ថិភាពដល់ប្រជាពលរដ្ឋដែលបើកបរម៉ូតូ និងអ្នករួមដំណើរមិនពាក់មួកសុវត្ថិភាពចំនួន៣០នាក់ នៅលើកំណាត់ផ្លូវជាតិលេខ៥ចំណុចភូមិសាលាដែង ឃុំប្ញស្សីក្រោក ស្រុកមង្គលបូរី ខេត្តបន្ទាយមានជ័យ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្ត បានជម្រាបជូនដល់ប្រជាពលរដ្ឋថា ការពាក់មួកសុវត្ថិភាពនេះ ដើម្បីការពារពេលដែលមានគ្រោះថ្នាក់ចរាចរកើតឡើងដួលបើកក្បាលទៅនឹងវត្ថុរឹង គឺយើងអាចការពារក្បាលរបស់យើងពីរបស់ធ្ងន់ទៅស្រាល ព្រោះបញ្ហាក្បាលវាមានសារសំខាន់ណាស់សម្រាប់មនុស្សយើង ។ ក្នុងនោះដែរ លោកឧត្តមសេនីយ៍ស្នងការបានបញ្ជាក់ថា ការផ្តល់បួកសុវត្ថិភាពតែថ្ងៃនេះនោះទេ នៅថ្ងៃបន្តបន្ទាប់គឺកម្លាំងនគរបាលចរាចរណ៍ គេចាប់ឃាត់ហើយ គឺយកម៉ូតូមកការិយាល័យ ដោយតម្រូវឲ្យម្ចាស់ម៉ូតូទៅទិញមួកសុវត្ថិភាព រួចទើបប្រគល់ម៉ូតូឲ្យវិញ បើជិះម្នាក់ឯងទិញ១បើជិះឌុបគ្នាទិញ២ ហើយម៉ូតូ១ក៏តម្រូវឲ្យជិះមនុស្សតែ២នាក់ អាច២នាក់នោះ គឺជាក្មេងម្នាក់ ហើយក្មេងនោះចាប់ពីអាយុ៣ឆ្នាំឡើងទៅ ក៏ត្រូវតែមានពាក់មួកសុវត្ថិភាពផងដែរ ។
ជាមួយគ្នានោះដែរ លោកឧត្តមសេនីយ៍ទោ អាត់ ខែម ក៏បានបញ្ជាក់ប្រាប់ប្រជាពលរដ្ឋទាំងនោះថា ដោយសារពិនិត្យឃើញពីអត្រាស្លាប់ពេលមានគ្រោះថ្នាក់ចរាចរកើតឡើង ភាគច្រើនអ្នកបើកបរម៉ូតូ និងអ្នករួមដំណើរស្លាប់ច្រើនដែលកើនឡើងរហូតដល់៧៨ភាគរយនោះ ដូច្នេះសមត្ថកិច្ចនគរបាលចរាចរណ៍ ត្រូវចាប់ឃាត់អ្នកបើកបរម៉ូតូ និងអ្នករួមដំណើរដែលមិនពាក់មួកសុវត្ថិភាព គឺតម្រូវឲ្យពាក់មួកសុវត្ថិភាព ។ ការសមត្ថកិច្ចធ្វើនេះគឺដើម្បីការពារអាយុជីវិតរបស់បងប្អូន ។
ចុងក្រោយលោកឧត្តមសេនីយ៍ ក៏បានបញ្ជាក់ដោយពញ្ញាក់ស្មារតីថា បើទូរស័ព្ទតម្លៃ១០០ឬ២០០ដុល្លារ ម៉េចបងប្អូនភ័យខ្លាចធ្លាក់បោកទៅនឹងថ្មការ៉ូ បែកកញ្ចក់ ឬខូចទូរស័ព្ទ ចុះបើបងប្អូនបើកបរម៉ូតូដែលមិនពាក់មួកសុវត្ថិភាពដែលច្បាប់តម្រូវឲ្យពាក់នោះ ពេលកើតមានគ្រោះថ្នាក់ចរាចរមិនភ័យខ្លាចដួលទៅក្បាលរបស់បងប្អូនបោកទៅនឹងថ្នល់ និងថ្មផង0x017d7 ហើយម៉ូតូត្រូវតែមានកញ្ចក់សម្រាប់មើលក្រោយ ក្នុងនាមលោកជាស្នងការនគរបាលខេត្ត សូមអំពាវនាវដល់បងប្អូនប្រជាពលរដ្ឋទាំងអស់បើកបរម៉ូតូ និងអ្នករួមដំណើរត្រូវតែពាក់មួកសុវត្ថិភាព បើកបររថយន្តត្រូវពាក់ខ្សែក្រវាត់សុវត្ថិភាពផងដែរ ។ ជាមួយគ្នានោះដែរ បងប្អូនប្រជាពលរដ្ឋក៏មានសេចក្តីត្រេកអរ និងថ្លែងអំណរគុណដែលលោកឧត្តមសេនីយ៍ស្នងការបានប្រគល់មួកសុវត្ថិភាពនោះផងដែរ ៕
ចែករំលែកព័តមាននេះ