រាជធានីភ្នំពេញ ៖ ក្នុងការលើកកម្ពស់កម្រិតជីវភាពរបស់មន្ត្រីរាជការ គ្រូពេទ្យ គ្រូបង្រៀន និងកងកម្លាំងប្រដាប់អាវុធគ្រប់ប្រភេទមានយោធា នគរបាល និងអាវុធហត្ថឱ្យកាន់តែមានជីវភាព ធូរធារនោះ រាជរដ្ឋាភិបាលកម្ពុជាបានកំណត់ឱ្យមានការដំឡើងប្រាក់បៀវត្ស២ដងក្នុង១ឆ្នាំ…
រាជធានីភ្នំពេញ ៖ ក្នុងការលើកកម្ពស់កម្រិតជីវភាពរបស់មន្ត្រីរាជការ គ្រូពេទ្យ គ្រូបង្រៀន និងកងកម្លាំងប្រដាប់អាវុធគ្រប់ប្រភេទមានយោធា នគរបាល និងអាវុធហត្ថឱ្យកាន់តែមានជីវភាព ធូរធារនោះ រាជរដ្ឋាភិបាលកម្ពុជាបានកំណត់ឱ្យមានការដំឡើងប្រាក់បៀវត្ស២ដងក្នុង១ឆ្នាំ ដោយលើកទី១ត្រូវដំឡើងនៅខែមករា និងលើកទី២នៅខែមេសា មុនបុណ្យចូលឆ្នាំខ្មែរ ។ការដំឡើងប្រាក់បៀវត្សលើកទី១ នៅខែមករា ឆ្នាំ២០១៨ គឺជាការដំឡើងអត្រាកំណើន១២% នៃមូលដ្ឋានប្រាក់បៀវត្ស និងការដំឡើងលើកទី២នៅខែមេសា មុនចូលឆ្នាំខ្មែរដែលជាការដំឡើងប្រាក់បំណាច់មុខងារ ។
យោងតាមតារាងប្រាក់បៀវត្សទាបបំផុត របស់មន្ត្រីរាជការ គ្រូបង្រៀន គ្រូពេទ្យ និងកម្លាំងប្រដាប់អាវុធ សម្រាប់ឆ្នាំ២០១៨ ដែលផ្សព្វផ្សាយដោយហ្វ្រេសញូវរបស់ក្រសួងមុខងារសាធារណៈបានបង្ហាញថា ចាប់ពីខែមករា ដល់ខែមីនា ឆ្នាំ២០១៨ ប្រាក់បៀវត្សទាបបំផុតរបស់មន្ត្រីរាជការកម្លាំងប្រដាប់អាវុធមាន៖
១-ប្រាក់បៀវត្សមន្ត្រីរាជការស៊ីវិល ផ្នែករដ្ឋបាល ថ្នាក់ទាបបំផុត ដែលបច្ចុប្បន្ន (មុនខែមករា ឆ្នាំ២០១៨)ចំនួន៨៥៣.៥០០រៀលត្រូវកើនដល់៩១៤.៤៥០រៀល ចាប់ពីខែមករា ដល់ ខែមីនាឆ្នាំ២០១៨
២-ប្រាក់បៀវត្សគ្រូបង្រៀន កម្រិតទាបបំផុតដែលបច្ចុប្បន្ន (មុនខែមករា ២០១៨) ចំនួន៩៥៣.៥០០រៀល ត្រូវកើនដល់ ១.០១៤.៤៥០រៀល ចាប់ពីខែមករាដល់ខែមីនា ឆ្នាំ២០១៨
៣-ប្រាក់បៀវត្សគ្រូពេទ្យ កម្រិតទាបបំផុត ដែលបច្ចុប្បន្ន (មុនខែមករា ២០១៨)ចំនួន៩៥៣.៥០០រៀល ត្រូវកើនដល់ ១.០១៤.៤៥០រៀល ចាប់ពីខែមករា ដល់ខែមីនា ឆ្នាំ២០១៨
៤-ប្រាក់បៀវត្សនគរបាលជាតិ ថ្នាក់ទាបបំផុតដែលបច្ចុប្បន្ន (មុនខែមករា ២០១៨) ចំនួន៩៣៧.៩៧៨រៀល ត្រូវកើនដល់ ៩៩៨.៩២៨រៀល ចាប់ពីខែមករា ដល់ខែមីនា ឆ្នាំ២០១៨
៥-ប្រាក់បៀវត្សយោធា (កងទ័ព) ថ្នាក់ទាបបំផុតដែលបច្ចុប្បន្ន (មុនខែមករា ២០១៨) ចំនួន៨៨០.៩៧៨រៀល ត្រូវកើនដល់ ៩៣៥.០២៨រៀល ចាប់ពីខែមករាដល់ខែមីនា ឆ្នាំ២០១៨
ក្រសួងមុខងារសាធារណៈ បានបង្ហាញឱ្យដឹងទៀតថា សម្រាប់ការដំឡើងប្រាក់ប្រៀវត្សជូនមន្ត្រីរាជការ កម្លាំងប្រដាប់អាវុធលើកទី២ នៅខែមេសាមុនចូលឆ្នាំខ្មែរមាន ៖
១-ប្រាក់បៀវត្សមន្ត្រីរាជការស៊ីវិល ផ្នែករដ្ឋបាលថ្នាក់ទាបបំផុត នឹងត្រូវកើនឡើងដល់ ១.០១៤.៤៥០រៀលចាប់ពីខែមេសាឆ្នាំ២០១៨
២-ប្រាក់បៀវត្សគ្រូបង្រៀន កម្រិតទាបបំផុត នឹងត្រូវកើនឡើងដល់ ១.១១៤.៤៥០រៀល ចាប់ពីខែមេសាឆ្នាំ២០១៨
៣-ប្រាក់បៀវត្សគ្រូពេទ្យ កម្រិតទាបបំផុត នឹងត្រូវកើនឡើងដល់ ១.១១៤.៤៥០រៀល ចាប់ពីខែមេសាឆ្នាំ២០១៨
៤-ប្រាក់បៀវត្សនគរបាលជាតិ ថ្នាក់ទាបបំផុត នឹងត្រូវកើនឡើងដល់ ១.០៩៨.៩២៨រៀល ចាប់ពីខែមេសាឆ្នាំ២០១៨
៥-ប្រាក់បៀវត្សយោធា (កងទ័ព) ថ្នាក់ទាបបំផុត នឹងត្រូវកើនឡើងដល់១.០៣៥.០២៨រៀល ចាប់ពីខែមេសា ឆ្នាំ២០១៨បៀវត្សអប្បបរមារបស់យោធិន និងមន្ត្រីនគរបាលជាតិ គឺគិតបញ្ចូលទាំង ប្រាក់ហូបប្រចាំថ្ងៃ និងរបបអង្ករប្រចាំខែគិតជាសាច់ប្រាក់គឺមានចំនួនច្រើន ។
គួរបញ្ជាក់ថា ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន ជាញឹកញយធ្លាប់បានអះអាង និងសន្យាចំពោះមន្ត្រីរាជការកម្លាំងប្រដាប់អាវុធថា នៅឆ្នាំ២០១៨ មន្ត្រីរាជការ គ្រូបង្រៀន គ្រូពេទ្យ និងកម្លាំងប្រដាប់អាវុធគ្រប់ប្រភេទនឹងមានប្រាក់បៀវត្សទាបបំផុត១លានរៀល ៕
ចែករំលែកព័តមាននេះ