រាជធានីភ្នំពេញ ៖ មន្ត្រីយោធាម្នាក់សង្ស័យស្រវឹងឬងងុយដេក បានបើករថយន្ត១គ្រឿងធ្លាក់ចូលប្រឡាយ និងបង្កឲ្យមានការភ្ញាក់ផ្អើលទាំងព្រឹក បន្ទាប់មកនគរបាលនិងអ្នកស្រុកបានជួលរថយន្តសន្ទូចទៅស្ទូចរថ យន្តនោះឡើងគោក ក៏ឃើញជនរងគ្រោះស្លាប់ក្នុងរថយន្តបាត់ទៅហើយ ។ ឧប្បត្តិហេតុគ្រោះថ្នាក់នេះ កើតឡើងកាលពីវេលាម៉ោង៦និង៣០នាទីព្រឹកថ្ងៃទី២២ ខែធ្នូ នៅតាមផ្លូវលេខ២១៧ ត្រង់ចំណុចផ្លូវកោងខាងត្បូងស្ពានព្រែកជ្រៃ ស្ថិតក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ ។
បុរសរងគ្រោះដល់ស្លាប់បាត់បង់ជីវិតនេះឈ្មោះ ហេង ដារ៉ា អាយុជាង៥០ឆ្នាំ មានទីលំនៅក្នុងភូមិបឹងខ្យាង ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល ជាមន្ត្រីយោធាមានឋានន្តរស័ក្ដិព្រិន្ទបាលឯក ជិះរថយន្ត១គ្រឿងម៉ាកតូយ៉ូតាហ្វ័ររ៉ាន់ន័រ ពណ៌ខ្មៅ ពាក់ផ្លាកលេខ ភ្នំពេញ ២C-៨០៩០ ។
អ្នកស្រុកសង្ស័យថារថយន្តនេះធ្លាក់ចូលទៅក្នុងប្រឡាយទឹកតាំងពីវេលាម៉ោងជាង៩យប់ថ្ងៃទី២១ ខែធ្នូមកម្លេ៉ះ ព្រោះខណៈនោះគាត់ស្ថិតនៅក្នុងផ្ទះ បានឮស្នូររថយន្ត១គ្រឿងបើកបរ ក្នុងល្បឿនលឿនពីជើងទៅត្បូង។ លុះពេលទៅដល់ចំណុចខាងលើដែលជាផ្លូវកោង ស្រាប់តែលាន់សូវប្រាវយ៉ាងខ្លាំង ដែលសង្ស័យបត់មិនទាន់ក៏ជ្រុលធ្លាក់ចូលទៅក្នុងប្រឡាយទឹកទាំងកំរោល ។
ប្រភពដដែលបន្តថា ខណៈនោះដោយសារតែយប់ងងឹតនិងស្ងាត់ផងនោះគាត់មិនបានចេញទៅមើលទេ ព្រោះខ្លាចមានបញ្ហាដល់ខ្លួនដែរក៏បានសម្ងំដេកហើយបានលង់លក់រហូតដល់ភ្លឺ ។លុះដល់វេលាម៉ោង៦និង៣០នាទីព្រឹកថ្ងៃទី២២ ខែធ្នូ ក្រោយភ្ញាក់ពីដេកទើបគាត់ចេញទៅមើលឃើញរថយន្តនោះនៅក្នុងទឹក ប្រឡាយដែលមានជម្រៅប្រមាណ៣ម៉ែត្រ និងបានរាយការណ៍ជូននគរបាលឲ្យទៅពិនិត្យមើល ។
ប្រភពដដែលបន្តទៀតថា ខណៈនោះនគរបាលប៉ុស្ដិ៍ស្ពានថ្ម រួមជាមួយនគរបាលចរាចរណ៍ខណ្ឌដង្កោ បានចុះទៅកាន់ទីនោះចាត់ចែងកម្លាំងចុះរាវ ប៉ុន្តែមិនបានប្រទះឃើញបុរសជាមន្ត្រីយោធាខាងលើនោះទេ ។ បន្ទាប់មក បានជួលរថយន្តស្ទូច១គ្រឿងទៅស្ទូចរថយន្តនោះឡើងគោក ទើបឃើញជនរងគ្រោះស្លាប់នៅក្នុងរថយន្តរបស់ខ្លួនបាត់ទៅហើយ ៕
ចែករំលែកព័តមាននេះ