រាជធានីភ្នំពេញ ៖ បុរសម្នាក់រួមនឹងនារី២នាក់ បានជិះម៉ូតូបត់ឆ្វេងមិនប្រយ័ត្នត្រូវបុរសម្នាក់ទៀត ជិះម៉ូតូធំជ្រុលទៅបុកចំពាក់កណ្តាលពេញទំហឹង បណ្តាលឲ្យរងរបួសធ្ងន់៣នាក់ និងស្រាលម្នាក់ដែលហេតុការណ៍នេះបានកើតឡើងនៅវេលាម៉ោង២និង៣៥នាទីរំលងអធ្រាត្រឈានចូលថ្ងៃទី២០ ខែធ្នូ ឆ្នាំ២០១៧ ចំណុចផ្លូវ២៧១កែង នឹងផ្លូវ៤៣២ សង្កាត់ទំនប់ទឹក ខណ្ឌចំការមន ។
ព័ត៌មានពីកន្លែងកើតបានឲ្យដឹងថា មុនពេលកើតហេតុ បុរសម្នាក់រួមដំណើរជាមួយ នឹងនារីវ័យក្មេង២នាក់ ជិះម៉ូតូ ស៊េរីឆ្នាំ២០១២ ពណ៌ខ្មៅ បិទតែម ពណ៌ផ្កាឈូកស្លាកលេខភ្នំពេញ១AM-៥៨៨០បានធ្វើដំណើរតាមផ្លូវ ២៧១ ពីត្បូងទៅជើង ខណៈមកដល់ចំណុចកើតហេតុបានបត់ស្តាំ ឡើងទៅផ្លូវ៤៣២ ខណៈដែលម៉ូតូបត់ទទឹងផ្លូវស្រាប់តែបុរសម្នាក់ទៀត បានជិះម៉ូតូធន់ធំ ពណ៌ក្រហម លាយស ស្លាកលេខ ភ្នំពេញ១FW-៦៩០៧ធ្វើដំណើរតាមផ្លូវ ២៧១ ទិសដៅស្របគ្នា ហើយល្បឿនផងនោះបានជ្រុលទៅបុកម៉ូតូហុងស៊េរីឆ្នាំ២០១២ចំពាក់កណ្តាលពេញទំហឹង បណ្តាលឲ្យម៉ូតូដួលខ្ទាតចេញពីគ្នាទាំង២ និងធ្វើឲ្យនារីដែលជិះម៉ូតូនោះអង្គុយក្រោយ រងរបួសរយៈដៃរយៈជើងធ្ងន់ ចំណែកបុរសជាអ្នកបើកម៉ូតូរងរបួសស្រាលទាំងបីនាក់ត្រូវបានរថយន្តសង្គ្រោះដឹកយកទៅសង្គ្រោះនៅគ្លិនិកឯកជន ចំណែកម៉ូតូ រងការខូចខាត បាក់បូបក្រោយ និងខ្ទេចខ្ទីផ្នែកខាងមុខ ។
ដោយឡែកខាងបុរសដែលជិះម៉ូតូធន់ធំ រងរបួសបែកក្បាលសន្លប់ស្តូកស្តឹង ត្រូវបានរថយន្តសង្គ្រោះបានមកដឹកយកទៅសង្គ្រោះដែរ រីឯម៉ូតូរងការខូចខាត បាក់ដៃចង្កូតខាងឆ្វេង ។
ក្រោយពេលកើតហេតុ នៅសល់តែម៉ូតូត្រូវបានសមត្ថកិច្ចបានមកធ្វើការវាស់វែងយកទៅរក្សារទុកនៅអធិការដ្ឋានខណ្ឌចំការមន ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ