រាជធានីភ្នំពេញ ៖ តារាចម្រៀងអ្នកនាង ម៉េង កែវពេជ្ជតា ជាមួយក្រុមគ្រួសាររបស់នាងមានមោទនភាពចំពោះបទ«បណ្តាំអង្គរ» ដែលជាស្នាដៃនិពន្ធបទភ្លេងថ្មីចេញពីការខិតខំរបស់ក្រុមគ្រួសារនាងផ្ទាល់ ។
បទចម្រៀងដែលប្រសូតចេញពីវង្សត្រកូលគ្រួសាររបស់ខ្លួននេះអ្នកនាង ម៉េង កែវពេជ្ជតា បានច្រៀងនៅក្នុងកម្មវិធីអបអរសាទរការដាក់បញ្ចូលប្រាសាទសំបូរព្រៃគុកជាបេតិភណ្ឌពិភពលោកកាលពីពេលកន្លងទៅ ។
ក្នុងឱកាសនោះអ្នកនាងម៉េង កែវពេជ្ជតា បានច្រៀងដោយមានវត្តមានចូលរួមពីកូនប្រុសស្រីទាំងពីររបស់នាង ជាមួយនឹងការប្រគំតន្ត្រីពីត្រកូលម៉េង ។
អ្នកនាងម៉េង កែវពេជ្ជតា ឲ្យដឹងថា បទចម្រៀង«បណ្តាំអង្គរ» គឺជាស្នាដៃនិពន្ធបទភ្លេងដោយក្មួយប្រុសសេរីវុធ ទំនុកច្រៀងដោយអ្នកនាងផ្ទាល់ និងប្រគំជូនដោយក្រុមតន្ត្រីត្រកូលម៉េង ។ រូបនាង និងក្រុមគ្រួសារ បានយកអស់កម្លាំងកាយចិត្តដែលមានទាំងប៉ុន្មាន បង្កើតបទចម្រៀងនេះក្នុងរយៈពេលត្រឹមតែ៣ថ្ងៃប៉ុណ្ណោះ ។ ក្នុងនាមជាកូនខ្មែរត្រូវតែគាំទ្រអ្វីដែលជាស្នាដៃខ្មែរ ដោយមិនគិតពីសុខភាព ធនធានចំណាយ ឬពេលវេលដ៏មមាញឹកប៉ុនណា ។
បើតាមអ្នកនាងម៉េង កែវពេជ្ជតា ការសម្រេចស្នាដៃថ្មីនេះឡើងគឺដោយសារការជូនពរដ៏កក់ក្តៅពីហ៊្វែន មិត្តសម្លាញ់ និងបងប្អូនទស្សនិកជន ទើបនាង កូនៗ និងក្រុមគ្រួសារបានទទួលជោគជ័យយ៉ាងត្រចះត្រចង់នាពេលនេះ ។ តាមរយៈបទចម្រៀងនេះ អ្នកនាង ពេជ្ជតា និងបងប្អូន សូមឲ្យកូនខ្មែរគ្រប់រូបឱ្យរក្សាអ្វីដែលយើងមានឱ្យគង់វង្ស កុំឱ្យបុព្វបុរសអស់សង្ឃឹម ។
អ្នកនាងម៉េង កែវពេជ្ជតា លើកឡើងថា «បទចម្រៀងដែលប្រសូតចេញពីបេះដូងនៃគ្រួសារត្រកូលម៉េងមួយបទនេះ សូមផ្ញើជូនដល់បងប្អូន ជនរួមជាតិ ពិសេសអាជ្ញាធរអប្សរាទុកជាការចូលរួមអភិរក្សដល់សម្បត្តិវប្បធម៌ជាតិផងដែរ» ។
កើតក្នុងត្រកូលដែលមានលោកឪពុកជាតន្ត្រីករបុរាណ និងអ្នកម្តាយជាអ្នកចម្រៀងអាយ៉ៃដ៏ល្បី តារាចម្រៀងម៉េង កែវពេជ្ជតា មានបងប្អូនស្រីពីរនាក់ទៀតសុទ្ធសឹងតែមានឈាមជ័រជាអ្នកសិល្បៈដែរ ។ បងស្រីទី១ឈ្មោះម៉េង កែវពេជ្របុប្ផា ជាអ្នកចម្រៀង និងជាតន្ត្រីការិនី ហើយមានស្វាមី និងកូនសុទ្ធតែជាតន្ត្រីករ និងអ្នកនិពន្ធបទភ្លេងដែលបានបញ្ចប់ការសិក្សាពីសាលាតូរ្យតន្ត្រី នៃសាកលវិទ្យាល័យភូមិន្ទវិចិត្រសិល្បៈ ។ បងស្រីទី២ឈ្មោះម៉េង កុសមាជានាដការបាំបុរាណ ហើយសព្វថ្ងៃបម្រើការនៅនាយកដ្ឋានសិល្បៈទស្សនីយភាពនៃក្រសួងវប្បធម៌ និងវិចិត្រសិល្បៈ ។
អ្នកនាងម៉េង កែវពេជ្ជតា មានកូនប្រុសមួយ និងស្រីមួយ សុទ្ធតែមាននិស្ស័យសិល្បៈ ។ ពួកគេទាំងពីរអាចលេងភ្លេងបានយ៉ាងល្អ ហើយធ្លាប់បានចូលរួមប្រលងលើឆាកអន្តរជាតិជាច្រើនទៀតផង ។ ក្នុងកម្មវិធីកម្រិតជាតិ ឬកម្មវិធីរបស់រាជរដ្ឋាភិបាល ធំៗ គេតែងបានឃើញក្រុមគ្រួសារត្រកូលម៉េងបង្ហាញជូនការសម្តែងពិសេសជាច្រើន ហើយក៏ជាស្នាដៃបង្កើតថ្មីដែលច្រៀង និងប្រគំរួមគ្នាមួយត្រកូលតែម្តង ៕
ចែករំលែកព័តមាននេះ