នៅពេលយុវតី ស្រីតូចចំណាន ដែលមានឈ្មោះ ដើម ម៉ៅ ចំណាន បានចាប់ផ្តើមអាជីពជាអ្នកចម្រៀងនៅតាមភោជនីយដ្ឋានមួយ កាលពី២៦ឆ្នាំមុន នាងទំនងជាមិនដឹងថា ជីវិតអនាគតនឹងរសាត់អណ្តែតយ៉ាងណាទេ។…
នៅពេលយុវតី ស្រីតូចចំណាន ដែលមានឈ្មោះ ដើម ម៉ៅ ចំណាន បានចាប់ផ្តើមអាជីពជាអ្នកចម្រៀងនៅតាមភោជនីយដ្ឋានមួយ កាលពី២៦ឆ្នាំមុន នាងទំនងជាមិនដឹងថា ជីវិតអនាគតនឹងរសាត់អណ្តែតយ៉ាងណាទេ។ ប៉ុន្តែពេលវេលាបានប្រាប់ថា ស្រីតូច ចំណាន គឺជាសិល្បការីនីដ៏ជោគជ័យ និងសំណាងបំផុតនៅកម្ពុជា ។
ឥឡូវ ស្រីតូច ចំណាន ក្លាយជាភរិយាយរបស់កំពូលមហាសេដ្ឋីម្នាក់ របស់កម្ពុជា គឺលោកអ្នកឧកញ៉ា គិត ម៉េង ទទួលគោរមងាជាអ្នកឧកញ៉ា និងប្រធានសមាគមសិល្បៈខ្មែរ ។ សិល្បករ និងសិល្បការិនីកម្ពុជា កាលពីថ្ងៃទី២ ខែឧសភា បានបោះឆ្នោតអោយស្រីតូច ចំណាន ក្លាយជាប្រធានសមាគមសិល្បករខ្មែរ ។ តួនាទីថ្មីនេះ គឺជាជោគជ័យថ្មីមួយ ទៀតរបស់អ្នកឧកញ៉ា ស្រីតូច ចំណាន បន្ថែមលើជោគជ័យជីវិតរបស់អ្នកឧកញ៉ាដែលក្លាយជាភរិយារបស់បុរសមានជាងគេបំផុតម្នាក់នៅកម្ពុជា គឺលោកអ្នកឧកញ៉ា គិត មេង ដោយមានកូនបួននាក់ជាមួយគ្នា ។
ស្រីតូច ចំណាន មិនមែនត្រឹមតែជាស្រីស្អាតមានសំឡេងពីរោះទេ ប៉ុន្តែលោកជំទាវ ក៏ជាភរិយាដ៏ល្អបំផុតរបស់លោក គិត ម៉េង ដែលចាត់ទុកថា លោក ជំទាវ គឺជាភ្លើងបំភ្លឺផ្លូវជីវិតរបស់អ្នកឧកញ៉ា ។ លោកអ្នកឧកញ៉ា គិត ម៉េង ធ្លាប់សរសេរសារសរសើរភរិយាថា «បងមិនអាចពិពណ៌នាច្រើនពីភាពពិសេសរបស់អូន ចំណាន ចំពោះបងអោយបានអស់ទេ ។ ប៉ុន្តែអ្វីដែលបងអាចនិយាយបានខ្លីៗនោះ គឺពិភពលោករបស់បងពោរពេញដោយស្នាមញញឹមគ្រប់ពេលដែលបងគិតដល់អូន» ។
តើស្រីតូចចំណានតស៊ូយ៉ាងណា ដើម្បីក្លាយជាសិល្បការិនីសំណាង និង ជោគជ័យបំផុតនៅកម្ពុជា? វាមិនស្រួលទេសម្រាប់ស្រីតូច ចំណាន ដើម្បីឆ.ក់យកបេះដូងរបស់កំពូលមហាសេដ្ឋីកម្ពុជា អ្នកឧកញ៉ា គិត ម៉េងដែលជាប្រធានក្រុមហ៊ុន រ៉ូយាល់ គ្រូប ដែលមានក្រុមហ៊ុន បុត្រសម្ព័ន្ធជាច្រើនដូចជា ក្រុមហ៊ុនទូរស័ព្ទដៃ សែលខាត ធនាគារ J-Trust Royal Bank ធនាគារវីង ក្រុមហ៊ុន អ៊ីនធើណិត Ezecom ក្រុមហ៊ុន ធានា រ៉ាប់រង Infinity ក្រុមហ៊ុនធនាគាររ៉ាប់រង camlife និង ក្រុមហ៊ុនរថភ្លើង Royal Railway ជាដើម។
អាពាហ៍ពិពាហ៍រវាងស្រីតូច ចំណាន និងលោកឧកញ៉ាគិត ម៉េង កើតមានបាន បន្ទាប់ពីអ្នកទាំងពីររស់នៅជាមួយគ្នាក្រៅចំណងអាពាហ៍ពិពាហ៍អស់ពេល១០ឆ្នាំដែលផ្តល់ពេលវេលាគ្រប់គ្រាន់សម្រាប់លោក អ្នក ឧកញ៉ា គិត ម៉េង សង្កេតមើលអត្តចរិត និងអាកប្បកិរិយាយរបស់អតីតតារាស្រីរូបនេះ ។ ការតស៊ូរយ:ពេល១០ឆ្នាំរបស់លោកជំទាវបានធ្វើអោយលោកអ្នកឧកញ៉ា គិត ម៉េង គិតថាស្រីតូច ចំណាន គឺជានារីដ៏ល្អបំផុត សមនឹងធ្វើជាភរិយារបស់ លោក អ្នកឧកញ៉ា ។
ទីបំផុតនៅថ្ងៃទី២០ ខែមីនា ឆ្នាំ២០១៥ ស្រីតូច ចំណាន បានដឹកដៃស្វាមី សម្បូរទ្រព្យអ្នកឧកញ៉ា គិត ម៉េង ចូលរោងការសំពះផ្ទឹម តាមប្រពៃណីខ្មែរហើយ ។ស្រីតូច ចំណាន ដែលមានកូនបួននាក់ជាមួយលោកអ្នកឧកញ៉ា គិត ម៉េង មិនត្រឹមតែជាសិល្បការិនីដែលក្លាយជាសេដ្ឋីនីដ៏ស្តុកស្តម្ភនោះទេ ប៉ុន្តែលោកជំទាវថែមទាំងបានទទួលគោរមងារជាអ្នកឧកញ៉ា ដែលព្រះរាជប្រទានដោយព្រះមហាក្សត្រកាលពីឆ្នាំ២០២៣។ កូនច្បងរបស់លោកជំទាវ គឺ គិត ស៊ូឡា ក៏បានក្លាយជាឧកញ៉ា ដែល ក្មេងជាងគេបំផុតក្នុងវ័យ១៨ឆ្នាំផងដែរ ។
អ្នកឧកញ៉ា ស្រីតូច ចំណាន ទំនងជាមិនទាន់អស់ចិត្តពីវិស័យសិល្បៈដែលបានជួយអោយអ្នកឧកញ៉ាក្លាយជាសិល្បការិនីដែលសំណាងជាងគេបំផុតទើបអ្នកឧក ញ៉ា បានមកឈរឈ្មោះជា បេក្ខជនប្រធាន សមាគមសិល្បករខ្មែរ ។ សិល្បករ និងសិល្បការិនីខ្មែរ បានបោះឆ្នោតអោយអ្នកឧកញ៉ាក្លាយជាប្រធានសមាគមសិល្បករខ្មែរដោយសង្ឃឹមថា អ្នកឧកញ៉ានឹងអាចដឹកនាំសមាគមនេះបានល្អដើម្បីជួយដល់សិល្បករ និងសិល្បការិនីកម្ពុជា ។ អ្នកឧកញ៉ា ស្រីតូចចំណាន បានតាំងចិត្តនៅក្នុងការជួយជ្រោមជ្រែងវិស័យសិល្ប: និងសិល្បករព្រមទាំងសិល្បការិនី ។
ដូចការរំពឹងទុក នៅទីបំផុតលោកជំទាវ អ្នកឧកញ៉ា ស្រីតូច ចំណាន បានឈ្នះការបោះឆ្នោតក្លាយជាប្រធានសមាគមសិល្បករខ្មែរអាណត្តិថ្មី ក្នុងការរៀបចំការបោះឆ្នោតដែលបានរៀបចំធ្វើឡើងនៅរាជបណ្ឌិតសភាកម្ពុជា នាព្រឹកថ្ងៃទី២ ខែឧសភា ឆ្នាំ២០២៤នេះ ។ លោកជំទាវអ្នកឧកញ៉ាបានទទួលបានសំឡេងឆ្នោត៥៦៧ សំឡេង ក្នុងចំណោមសំឡេងឆ្នោតចំនួន៦០០នៃអង្គបោះឆ្នោតដោយលោកជំទាវអ្នកឧកញ៉ា បានឈ្នះយ៉ាងលើសលុបទៅលើបេក្ខភាព២រូប គឺលោក គួច ខេវិន និងលោក ផាត់ ដារារត្ន ។
នៅមុនការបោះឆ្នោតលោកជំទាវអ្នកឧកញ៉ា ស្រីតូច ចំណាន បានលើក ប្តេជ្ញាចិត្តថា នៅពេលលោកជំទាវបានឡើងជាប្រធាន និងជំទាវនឹងដឹកនាំសមាគមសិល្បករខ្មែរសហការជាមួយក្រសួងវប្បធម៌ និងស្ថាប័នពាក់ព័ន្ធរៀបយុទ្ធនាការ រួមគ្នាស្របតាមគោលនយោបាយជាតិក្នុងការអភិវឌ្ឍន៍ និងអភិរក្សសិល្បៈជំរុញសេដ្ឋកិច្ច និងឆ្លើយតបយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិទី៧ ។
លោកជំទាវបន្ថែមថា សមាគម និងពិនិត្យមើលលទ្ធភាពការបណ្តាក់ទុន និងកៀងគរ អ្នកមានធនធាននៅកម្ពុជាឲ្យមកបណ្តាក់ទុកលើវិស័យសិល្បៈដូចជាភាពយន្តកាន់តែមានគុណភាព ដើម្បីពង្រីកទីផ្សារក្នុងតំបន់ ។ លោកជំទាវក៏ចង់ប្រើពេលដែលនៅសេសសល់នាពេលនេះចូលរួមជួយសិល្បៈក្នុងនាមលោកជំទាវក៏ជាអតីតអ្នកសិល្បៈមួយរូបផងដែរ ។ លោកជំទាវក៏បានធ្វើការអំពាវនាវដល់អ្នកសិល្បៈទាំងអស់រួមគ្នាទៅមុខទាំងអស់គ្នា ហើយលោកជំទាវសន្យាថា នឹងនាំសិល្បៈវប្បធម៌ខ្មែរយើងទៅបង្ហាញលើឆាកអន្តរជាតិ ។
អតីតតារាសម្តែងល្បីឈ្មោះ នាង ស្រីតូច ចំណាន មានឈ្មោះពិត ម៉ៅ ចំណាន កើតនៅថ្ងៃទី២១ ខែធ្នូ ឆ្នាំ១៩៨៣ ទីកន្លែងកំណើត នៅខេត្តស្វាយរៀង ។ ឪពុករបស់លោកជំទាវ មាន ឈ្មោះ ម៉ៅ នី អតីតជានាយទាហាន ហើយម្តាយមានឈ្មោះ គង់ សោម៉ា ជាមេផ្ទះ ។
លោកជំទាវ ស្រីតូច ចំណាន បានបោះជំហានចូលប្រឡូកក្នុងវិថីសិល្បៈ ក្នុងអំឡុង ឆ្នាំ១៩៩៨ ដោយអាជីពដំបូងដែល លោកជំទាវស្រវ៉ាយកការច្រៀង តាមភោជនីយដ្ឋាន បន្ទាប់មកលោកជំទាវក៏មានឱកាសបានចូល សម្តែងខារ៉ាអូខេ នៅក្នុងផលិតកម្មហង្សមាស ផលិតកម្មយូធូ និងផលិត ស្ទឹងសង្កែ រហូតបានឡើងកូដក្លាយជាពិធីការិនី ប្រចាំស្ថានីយទូរទស្សន៍ ប៉ុស្តិ៍លេខ៥ផងដែរ ។
ខណៈដែលការងារសិល្បៈហាក់មានភាពរីកចម្រើនធ្វើឲ្យទស្សនិកជនស្គាល់កាន់តែច្រើនរលូនទៅមុខជាលំដាប់នោះ អ្នក ឧកញ៉ា ស្រីតូច ចំណានក៏បានជួបរឿងអកុសលអាម៉ាសមុខមួយផងដែរ ។ នេះបើតាមសេចក្តីរាយការណ៍ព័ត៌មានក្នុងស្រុក ។ ស្រីតូចចំណាន ត្រូវបានក្រុមការងារដើរជាន់ជាយរ៉ូបធ្វើឲ្យរបូតក្នុងអំឡុងពេលដែលកំពុងតែធ្វើជាពិធីការិនីផ្សាយផ្ទាល់ក្នុងកម្មវិធីមួយរបស់ស្ថានីយទូរទស្សន៍ ប៉ុស្តិ៍លេខ៥ កាលពីអំឡុងឆ្នាំ២០០២-២០០៣ ។ ក្រោយបានជួបរឿងអាម៉ាស់នេះ លោកជំទាវ ស្រីតូច ចំណាន បានផ្តាច់ខ្លួនចេញពីសិល្បៈបាត់មុខសាបសូន្យ ដោយឈប់ទទួលការងារ និងថតនៅក្នុងសិល្បៈតទៅទៀត ។
លុះមួយរយៈក្រោយមកទើបលេចឮព័ត៌មានថា ស្រីតូច ចំណាន បានសាងស្នេហ៍ជាមួយលោកអ្នកឧកញ៉ា គិត ម៉េង ។ ចំណងស្នេហ៍របស់លោកជំទាវ ជាមួយមហាសេដ្ឋីសម្បូរទ្រព្យ អ្នកឧកញ៉ា គិត ម៉េង បានធ្វើ អោយយុវតីមកពីខេត្តស្វាយរៀងផ្លាស់ប្តូរជីវិតពីអ្នកចម្រៀងតាមហាង ក្លាយជាសិល្បការិនីដែលមានសំណាងជាងគេបំផុតនៅក្នុងវិស័យសិល្បៈ៕
ចែករំលែកព័តមាននេះ