រាជធានីភ្នំពេញ ៖ រថយន្តបែនដឹកដី១គ្រឿងបានបើកបុកនឹងកិនយុវជនម្នាក់ដែលជាមន្ត្រីអង្គរក្ស បណ្ដាលឲ្យយុវជនរងគ្រោះស្លាប់ភ្លាមៗនៅក្រោមរថយន្តគួរឲ្យរន្ធត់ ។ ឧប្បត្តិហេតុគ្រោះថ្នាក់ចរាចរណ៍បានកើតឡើងកាលពីវេលាម៉ោង៩និង៣០នាទីព្រឹកថ្ងៃទី១១ ខែធ្នូ ឆ្នាំ២០១៧ នៅកំណាត់ផ្លូវលេខ២០អា ភូមិគងនយ សង្កាត់គងនយ ខណ្ឌដង្កោ រាជធានីភ្នំពេញ ។
ជនរងគ្រោះឈ្មោះយូ ដារ៉ា អាយុ២០ឆ្នាំ មុខរបរជាមន្ត្រីអង្គរក្ស ស្នាក់នៅភូមិព្រៃរបង ឃុំស្គុះ ស្រុកសំរោងទង ខេត្តកំពង់ស្ពឺ ។ បើកម៉ូតូ១គ្រឿង ពណ៍ទឹកប្រាក់ ស្លាកលេខ ១E -៩៨៨៨ ។ ចំណែករថយន្តបង្កដឹកដី ពណ៌ស ស្លាកលេខ ចង្កូតស្តាំ PP- ១៦១២ បើកដោយបុរសម្នាក់ឈ្មោះសយ ពិសី អាយុ់២១ឆ្នាំ ស្នាក់នៅភូមិដំណាក់សង្កែ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។ តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្ត និងម៉ូតូបាន ធ្វើដំណើរស្របទិសគ្នាពីលិចទៅកើត រួមជាមួយរថយន្តមួយចំនួនទៀតផងដែរ ដោយម៉ូតូជិះក្រោយរថយន្ត ។ លុះដល់ចំណុចកើតហេតុ ម៉ូតូបានវ៉ារថយន្តផ្សេងដែលកំពុងបើកនៅខាងមុខ ប៉ុន្តែវ៉ាមិនផុតឡើយ ដោយបានវាក់ជាមួយរថយន្តមួយគ្រឿងទៀត កំពុងបើបញ្ច្រាសទិសគ្នា ។
ខណៈនោះយុវជនរងគ្រោះបានគេចមកខាងស្តាំវិញ ក៏ត្រូវរថយន្តបែនដឹកដីខាងលើបុកនិងកិនអូសជាង១០ម៉ែត្រ ស្លាប់ភ្លាមៗនៅក្រោមរថយន្តតែម្ដង ។ ក្រោយពេលកើតហេតុអ្នកបើករថយន្តបានបើកទ្វារបម្រុងរត់គេចខ្លួន ប៉ុន្តែត្រូវនគរបាលដេញតាមចាប់បាននាំយកទៅសាកសួរនៅប៉ុស្តិ៍នគរបាលរដ្ឋបាលគងនយ ។ បន្ទាប់មកប្រគល់ជូននគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ធ្វើកាវាស់វែង និងនាំយកទៅកាន់ការិយាល័យចាត់ការតាមច្បាប់ ៕
ចែករំលែកព័តមាននេះ