ខេត្តស្ទឹងត្រែង ៖ នគរបាលប៉ុស្តិ៍ច្រកទ្វារព្រំដែនអន្តរជាតិត្រពាំងគ្រៀលបានឃាត់ខ្លួនបុរសម្នាក់រួម នឹងវត្ថុតាងគ្រឿងញៀនប្រភេទមេតំហ្វេតាមីនម្ស៉ៅក្រាម ពណ៌ស ហៅម៉ាទឹកកកចំនួន៣កញ្ចប់តូច ។
លោកចែម ផានិត នាយការិយាល័យប្រឆាំង បទល្មើសគ្រឿងញៀននៃស្នងការនគរបាលខេត្តបានឲ្យដឹងថា ជនសង្ស័យមានឈ្មោះប៊ុន ចាន់សុគី អាយុ២៨ឆ្នាំ មុខរបរមិនពិតប្រាកដ រស់នៅសង្កាត់ទួលសង្កែ ខណ្ឌឬស្សីកែវ ក្រុងភ្នំពេញ ។ ដោយឡែកវត្ថុតាងថ្នាំញៀនប្រភេទម៉ាទឹកកក ទម្ងន់សរុប៤៧,៧ក្រាម និងឃាត់រថយន្ត ស្លាក់លេខ ភ្នំពេញ២AH-៥៥៦៥ ។
នគរបាលបានឲ្យដឹងថា ក្រោយមានការសង្ស័យថា បានរត់ពន្ធគ្រឿងញៀនចេញពីព្រំដែនឡាវតាមច្រកអន្តរជាតិកម្លាំងសម្ថកិច្ចជំនាញបានប្រមាញ់ឡោមព័ទ្ធ និងបង្ក្រាបទៅលើជនសង្ស័យនៅក្នុងរថយន្ត ហើយឆែកឆេរឃើញថ្នាំញៀនចំនួន៣កញ្ចប់ក្នុងរថយន្ត ។ នគបាលបន្តថា ក្រោយឃាត់ខ្លួននៅវេលាម៉ោង១១ព្រឹកថ្ងៃទី០៨ ខែធ្នូ ឆ្នាំ២០១៧ នៅចំនុចត្រពាំងគ្រៀល ស្ថិតនៅភូមិខាំផាន់ សង្កាត់សាមគ្គី ក្រុងស្ទឹងត្រែងរួចមកបាននាំខ្លួនជនសង្ស័យ រូមទាំងវត្ថុតាងព្រមទាំងមធ្យោបាយដឹកជញ្ជូន មកការិយាល័យប្រឆាំងបទល្មើសគ្រឿងញៀន នៃស្នងការនគរបាលខេត្តធ្វើការសួរចម្លើយ ។
បច្ចុប្បន្ន បានសាក់សួរ និងបង្កសំណុំរឿងបញ្ជូនទៅកាន់តុលាការ ៕
ចែករំលែកព័តមាននេះ