រាជធានីភ្នំពេញ ៖ សេចក្តីរាយការណ៍មួយបានឲ្យដឹងនៅថ្ងៃទី៥ ខែធ្នូថា ជនម្នាក់ឈ្មោះ ប្លង់ ពិសិដ្ឋ មានតួនាទីអនុប្រធាននាយកដ្ឋានមួយនៅក្រសួងសង្គមកិច្ច ដែលជាប់ពាក់ព័ន្ធនឹងការប្រើហិង្សាវាយស្ត្រីម្នាក់ជាម្ចាស់បំណុលស្ទើរស្លាប់ស្ទើរស់ ត្រូវបានចៅក្រមសើុបសួរសាលាដំបូងរាជធានីភ្នំពេញ…
រាជធានីភ្នំពេញ ៖ សេចក្តីរាយការណ៍មួយបានឲ្យដឹងនៅថ្ងៃទី៥ ខែធ្នូថា ជនម្នាក់ឈ្មោះ ប្លង់ ពិសិដ្ឋ មានតួនាទីអនុប្រធាននាយកដ្ឋានមួយនៅក្រសួងសង្គមកិច្ច ដែលជាប់ពាក់ព័ន្ធនឹងការប្រើហិង្សាវាយស្ត្រីម្នាក់ជាម្ចាស់បំណុលស្ទើរស្លាប់ស្ទើរស់ ត្រូវបានចៅក្រមសើុបសួរសាលាដំបូងរាជធានីភ្នំពេញ សម្រេចចេញដីកាដោះលែងឲ្យនៅក្រៅឃុំវិញ កាលពីចុងសប្តាហ៍មុននេះ ក្រោមរូបភាពដាក់ប្រាក់តម្កល់ធានាខ្លួនចំនួន២.០០០ដុល្លារអាមេរិក និងសំអាងលើមេធាវីការពារក្តី ។
សូមបញ្ជាក់ថា លោក ប្លង់ ពិសិដ្ឋ ត្រូវបានចៅក្រមសើុបសួរគឺលោក ឌុច សុខសារិន សម្រេចឃុំខ្លួនដាក់ពន្ធនាគារកាលពីល្ងាចថ្ងៃទី៨ ខែតុលា ឆ្នាំ២០១៧ ក្រោមការចោទប្រកាន់ពីបទហិង្សាដោយចេតនាមានស្ថានទម្ងន់ទោស យោងតាមមាត្រា២១៨ នៃក្រមព្រហ្មទណ្ឌ ។
ជនសង្ស័យត្រូវបាននគរបាលព្រហ្មទណ្ឌរាជធានីភ្នំពេញ ចាប់ខ្លួនកាលថ្ងៃទី៦ ខែតុលា ឆ្នាំ២០១៧ និងបានបញ្ជូនទៅសាលាដំបូងរាជធានីភ្នំពេញ ពាក់ព័ន្ធនឹងករណីប្រើហិង្សានិង ប៉ុនប៉ងសម្លាប់ស្ត្រីម្នាក់បំបិទមាត់ ដោយសារតែការជំពាក់បំណុលជនរងគ្រោះវ័ណ្ឌក ។ លោក ប្លង់ ពិសិដ្ឋ អាយុ៣៤ឆ្នាំ ជាអនុប្រធាននាយកដ្ឋានយុវនីតិសម្បទា នៅក្រសួងសង្គមកិច្ច អតីតយុទ្ធជន និងយុវនីតិសម្បទា ស្នាក់នៅផ្ទះលេខ១០និងលេខ១២ បុរីពិភពថ្មិសែនសុខ ផ្លូវលេខ១ សង្កាត់ភ្នំពេញថ្មី ខណ្ឌសែនសុខ ។
ជនជាប់ចោទនិងបក្សពួកជាជនដៃដល់២នាក់ទៀតដែលកំពុងរត់គេចខ្លួន បានប្រព្រឹត្តអំពើព្រៃផ្សៃ វាយជនរងគ្រោះជានារីភេទ និងត្រូវបានថតជាប់តាមរយៈកាមេរ៉ាសុវត្ថិភាពបង្ហាញរូបភាពវាយដំយ៉ាងកំរោលដោយបុរសទាំង៣នាក់ ។ តាមរយៈវីដេអូឃ្លីបប្រមាណជា១នាទីនិង៤១វិនាទី នៅកន្លែងកើតហេតុ បានបង្ហាញឲ្យឃើញនូវសកម្មភាពរបស់ក្រុមជនដៃដល់វាយតប់បោចសក់ទាត់ធាក់ បោកជនរងគ្រោះផ្ទប់នឹងឥដ្ឋការ៉ូ និងចាប់ច្របាច់កដោយគ្មានក្ដីមេត្តា ។ នៅពេលនោះ បើកុំតែបានម្ចាស់ហាងនិងសន្តិសុខបុរីស្ទុះទៅជួយទាន់ ម្លេ៉ះស្ត្រីរងគ្រោះអាចគ្រោះថ្នាក់ដល់ជីវិត ។
ហេតុការណ៍នៃអំពើហិង្សានេះ បានកើតឡើងកាលពីថ្ងៃទី៦ ខែកញ្ញា ឆ្នាំ២០១៧ នៅក្នុងភោជនីដ្ឋានមួយទល់មុខបុរីអង្គរភ្នំពេញ សង្កាត់ភ្នំពេញថ្មី ខណ្ឌសែនសុខ ។ ក្រោយពីកើតហេតុជនរងគ្រោះបានទៅដាក់ពាក្យបណ្តឹងនៅសមត្ថកិច្ច ហើយសមត្ថកិច្ចក៏បានទៅឃាត់ខ្លួនឈ្មោះ ប្លង់ ពិសិដ្ឋ បញ្ជូនទៅស្ថាប័នអយ្យការអមសាលាដំបូង ទើបមានការឃុំខ្លួនដើម្បីរង់ចាំបើកការសើុបអង្កេត និងឈានដល់ជំនុំជម្រះក្តី ។
អ្នកច្បាប់និយាយថា សំណុំរឿងនេះកំពុងស្ថិតនៅក្រោមការសើុបអង្កេតនៅឡើយ និងជាបទល្មើសព្រហ្មទណ្ឌសុទ្ធសាធ មិនគួរចៅក្រមដោះលែងឲ្យជនត្រូវចោទនៅក្រៅឃុំនោះទេ ៕
ចែករំលែកព័តមាននេះ