រាជធានីភ្នំពេញ ៖ ទោះបីជាតុលាការកំពូលរំលាយគណបក្សសង្គ្រោះជាតិ ដែលត្រូវបានចាត់ទុកថា ជាគណបក្សប្រឆាំងដ៏ធំមួយនៅកម្ពុជាកាលពីពាក់កណ្តាលខែវិច្ឆិកា កន្លងទៅ តែអតីតប្រធានគណបក្សសង្គ្រោះជាតិលោក សម រង្ស៊ី បានអះអាងថា ជីវិតរបស់បក្សប្រឆាំងនឹងរស់ឡើងវិញនៅដើម្បីឆ្នាំ២០១៨ ខាងមុខ ។ ប៉ុន្តែការលើកឡើងរបស់លោក សម រង្ស៊ី ដែលកំពុងតែរស់នៅក្រៅប្រទេសនោះ ត្រូវបានមន្ត្រីជាន់ខ្ពស់គណបក្សប្រជាជនកម្ពុជាថា «មិនអាចនោះទេ» ។
លោក សម រង្ស៊ី បានថ្លែងតាមរយៈវិដេអូឃ្លីបដែលបង្ហោះតាមបណ្តាញសង្គមថាគណបក្សប្រជាជនកាន់អំណាច និងគណបក្សសង្គ្រោះជាតិមានល្អ មានអាក្រក់ ដូច្នេះស្ថានភាពនឹងមានការប្រែប្រួល។
អតីតមេបក្សប្រឆាំងរូបនេះបញ្ជាក់ថា៖ «ចំពោះ ហ៊ុន សែន មានល្អ មានក្រក់! ចំពោះយើងសង្គ្រោះជាតិមានល្អ ក៏មានអាក្រក់! យើងខុសគ្នាបន្តិច។ ចំពោះ ហ៊ុន សែន ល្អមុន អាក្រក់ក្រោយ យើងវិញអាក្រក់មុនល្អក្រោយ ។ យើងទាំងពីរផ្ទុយគ្នា »។ លោកបន្តថាស្ថានការណ៍អាក្រក់សម្រាប់សមាជិកគណបក្សប្រឆាំងបង្ខំឱ្យថ្នាក់ដឹកនាំមួយចំនួនកំពុងតែគេចខ្លួននៅក្រៅប្រទេស ។ លោកថា រយៈពេលប្រមាណ២ ទៅ៣ ខែក្រោយទៀតសម្តេច ហ៊ុន សែន នឹងថយក្រោយ ដែលជាហេតុធ្វើឲ្យសមាជិកគណបក្សសង្គ្រោះជាតិ ចូលមកបង្កើតគណបក្សឡើងវិញ ។
លោក សម រង្ស៊ី បានបញ្ជាក់ថា៖ « នៅឆ្នាំ២០១៨នេះ យើងនឹងធូរ ។ យើងនឹងមានសិទ្ធិសេរីភាព យើងនឹងចូលទៅស្រុកខ្មែរវិញ យើងនឹងទៅរៀបចំគណបក្សយើងវិញ យើងនឹងចូលរួមបោះឆ្នោតឆ្នាំ២០១៨ ដូចអ្វីដែលយើងបានកំណត់»។ លោកអះអាងថា លោកមានជំនឿថា ការវិលត្រឡប់នាដើមឆ្នាំ២០១៨ របស់លោក និងអតីតមេដឹកនាំបក្សប្រឆាំងមកស្រុកខ្មែរវិញ នឹងមានការគាំទ្រយ៉ាងច្រើនលើសពីឆ្នាំ២០១៣ កន្លងទៅទៀត។
ទាក់ទិននឹងការលើកឡើងរបស់លោក សម រង្ស៊ី នេះត្រូវបានលោក សុខ ឥសាន អ្នកនាំពាក្យគណបក្សប្រជាជនកម្ពុជាថា គឺជាក្តីស្រមៃប៉ុណ្ណោះ ព្រោះអតីតបក្សប្រឆាំង គឺមិនអាចរស់ឡើងវិញទេ ។ ប្រវត្តិសាស្ត្រកម្ពុជាដើរទៅមុខ មិនវិលថយក្រោយទេ ។ តែវាគ្រាន់តែជាក្តីស្រមៃរបស់ សម រង្ស៊ី ដែលមិនអាច «ក្លាយជាការពិតឡើយ» ៕
ចែករំលែកព័តមាននេះ