នាថ្ងៃទី៣០ ខែវិច្ឆិកា ឆ្នាំ២០១៧ នៅសណ្ឋាគារសាន់វ៉េ រាជធានីភ្នំពេញ មានប្រារព្ធពិធីបើកសិក្ខាសាលាស្តីពីគោលនយោបាយកៀរគរចំណូលរបស់អង្គការគយពិភពលោក ក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត គុណ ញឹម ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងដោយមានការចូលរួមពីលោក Ian CREMER អ្នកជំនាញការជាន់ខ្ពស់ផ្នែកតម្លៃគិតពន្ធគយនៃអង្គការគយពិភពលោក លោកស្រី Rika TOKAI អ្នកជំនាញការផ្នែកវិធានដើមកំណើតទំនិញនៃអង្គការគយពិភពលោក និងមន្ត្រីគយ និងរដ្ឋាករនៃអគ្គនាយកដ្ឋានគយ និងរដ្ឋាករកម្ពុជា។
សិក្ខាសាលានេះ មានរយៈពេលពីរថ្ងៃ គឺចាប់ពីថ្ងៃទី៣០ ខែវិច្ឆិកា ឆ្នាំ២០១៧ ដល់ថ្ងៃទី០១ ខែធ្នូ ឆ្នាំ២០១៧ ត្រូវបានរៀបចំឡើងដោយអគ្គនាយកដ្ឋានគយ និងរដ្ឋាករកម្ពុជា សហការជាមួយអង្គការគយពិភពលោក ក្នុងគោលបំណងបង្កើនសមត្ថភាពដល់មន្ត្រីជាថ្នាក់ដឹកនាំ និងមន្ត្រីបច្ចេកទេសពាក់ព័ន្ធនៃអគ្គនាយកដ្ឋានគយ និងរដ្ឋាករ ស្តីពីគោលនយោបាយកៀរគរចំណូល ដោយផ្តោតលើតម្លៃគិតពន្ធគយ និងវិធានដើមកំណើតទំនិញ។ ថ្លែងក្នុងពីធីបើក លោក Ian Cremer បានលើកឡើងថា សិក្ខាសាលានេះ ជាផ្នែកមួយនៃបេសកកម្មរបស់លោកនៅកម្ពុជា ក្រោយពីការសិក្សាវាយតម្លៃភាពបច្ចុប្បន្ននៃការអនុវត្តការងារតម្លៃគិតពន្ធគយ វិធានដើមកំណើតទំនិញ និងសវនកម្មក្រោយពេលបញ្ចេញទំនិញពីគយនៅតាមបណ្តានាយកដ្ឋាន និងសាខាគយ និងរដ្ឋាករពាក់ព័ន្ធនាពេលកន្លងទៅនេះ ។
ក្នុងសុន្ទរកថាបើក ឯកឧត្តមបណ្ឌិត គុណ ញឹម ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានថ្លែងអំណរគុណដល់អង្គការគយពិភពលោកដែលបានឆ្លើយតបជាវិជ្ជមានតាមសំណើរបស់កម្ពុជា ដោយបានផ្តល់ជំនួយបច្ចេកទេសនាឱកាសនេះ ក្នុងខណៈដែល អគរ កំពុងត្រូវការអភិវឌ្ឍន៍ខ្លួនឱ្យទាន់ការវិវដ្តនៃការធ្វើពាណិជ្ជកម្មអន្តរជាតិ ក៏ដូចជាការធ្វើសមាហរណកម្មសេដ្ឋកិច្ចនៅក្នុងតំបន់ និងពិភពលោក ។ ឯកឧត្តមបណ្ឌិត ក៏បានគូសបញ្ជាក់ផងដែរ ពីតួនាទីសំខាន់របស់រដ្ឋបាលគយក្នុងការប្រមូលចំណូលសម្រាប់ថវិកាជាតិ ដែលបានចូលរួមចំណែកមួយភាគធំនៃចំណូលពន្ធសរុប ។ នេះបញ្ជាក់ថា ការពង្រឹងប្រសិទ្ធភាពការប្រមូលចំណូលរបស់អគ្គនាយកដ្ឋានគយ និងរដ្ឋាករកម្ពុជា នៅតែជាការងារអាទិភាពដែលត្រូវតែយកចិត្តទុកដាក់ជាប្រចាំ ។
ដើម្បីគាំទ្រគោលនយោបាយសារពើពន្ធរបស់រដ្ឋាភិបាល អគ្គនាយកដ្ឋានគយ និងរដ្ឋាករកម្ពុជា បានចាប់ផ្តើមអនុវត្តផែនការកែទម្រង់ និងទំនើបកម្មគយ តាមរយៈការកែលម្អលើ ៖ រចនាសម្ព័ន្ធស្ថាប័ន ធនធានមនុស្សពាក់ព័ន្ធនឹងការរៀបចំគោលនយោបាយ និងការងារបច្ចេកទេសគយ ព្រមទាំងការអភិវឌ្ឍន៍ប្រព័ន្ធបច្ចេកវិទ្យាព័ត៌មាន ដើម្បីគាំទ្រដល់កិច្ចប្រតិបត្តិការគយ ។ កំណែទម្រង់នេះ បានទទួលផ្លែផ្កាគួរឱ្យកត់សម្គាល់លើការធ្វើឱ្យប្រសើរឡើងនូវកិច្ចសម្រួលពាណិជ្ជកម្ម សាមញ្ញកម្មនីតិវិធីគយ និងអាចប្រមូលចំណូលបានលើសផែនការ ។
ទន្ទឹមនេះ ឯកឧត្តមបណ្ឌិតក៏បានលើកឡើងផងដែរថា សិក្ខាសាលានេះ គឺជាឱកាសល្អសម្រាប់សិក្ខាកាមទាំងអស់ ដើម្បីបានស្វែងយល់ និងបង្កើនចំណេះដឹង តាមរយៈការពិភាក្សា ផ្លាស់ប្តូរមតិយោបល់ដោយផ្ទាល់ជាមួយក្រុមជំនាញការរបស់អង្គការគយពិភពលោក ៕
ចែករំលែកព័តមាននេះ