រាជធានីភ្នំពេញ ៖ ព្រះសង្ឃពីរព្រះអង្គ តំណាងព្រះសង្ឃពុទ្ធសាសនាកាលពីរសៀលថ្ងៃទី២៧ វិច្ឆិកា ឆ្នាំ២០១៧ បាននិមន្តយកពាក្យបណ្តឹងទៅដាក់នៅក្រសួងមហាផ្ទៃ ដើម្បីប្តឹងលោក ខឹម វេសនា អាយុ៥២ឆ្នាំ ប្រធានគណបក្សសម្ព័ន្ធ ដើម្បីប្រជាធិបតេយ្យ ហៅកាត់ (LDP) សាបព្រួសវប្បធម៌ជេរប្រមាថសាធារណៈ ប្រមាថព្រះមហាក្សត្រ ញុះញង់បំបែកបំបាក់ជនជាតិខ្មែរ ប្រមាថស្ថាប័នសង្ឃ។
ព្រះសង្ឃព្រះនាម ហោ សុខុន ចៅអធិការវត្តច្បារអំពៅ និងទីប្រឹក្សាផ្ទាល់របស់អគ្គមហាសង្ឃរាជទេព វង្ស និងព្រះសង្ឃព្រះនាម មាស រីណា នាយករងសាលាបាលី សង្កាត់ស្វាយរៀង ក្រុងស្វាយរៀង ខេត្តស្វាយរៀង បានបញ្ជាក់ក្នុងពាក្យបណ្តឹងថា យោងតាមមហាសន្និបាទមន្ត្រីសង្ឃទូទាំងប្រទេសស្តីពីការទប់ស្កាត់ជនអន្ធពាលទមិឡឥតសាសនា ដែលមានប្រធានគណបក្សសម្ព័ន្ធ ដើម្បីប្រជាធិបតេយ្យហៅថា LDP កំពុងធ្វើចលនាយុវជនបំផ្លាញព្រះពុទ្ធសាសនារបស់រដ្ឋ។
ព្រះសង្ឃហោ សុខុន បានមានសង្ឃដីកាថា តាមពាក្យបណ្តឹង លើកឡើងថាលោក ខឹម វាសនា កាលពីប្រមាណ៥ ទៅ៦ឆ្នាំមុន បានប្រព្រឹត្តកំហុសច្រើនចូលក្នុងបទល្មើសដូចជាសាបព្រួសវប្បធម៌ប្រមាថសាធារណៈរឿងនេះប្រជាពលរដ្ឋខ្មែរទូទាំងពិភពលោកចំពោះអ្នកដែលបានប្រើប្រាស់បណ្តាញសង្គមហ្វេសប៊ុក និងយូធូបសុទ្ធតែមានដឹងបាន និងបានឮដូចជាពាក្យថា «អាឈាមឆ្កែ អាឈាមថោក កូនមីរលាយ អាចោរថង់យាម អាត្រងោល កូនមីឈាមឆ្កែ »។
ព្រះសង្ឃដើមបណ្តឹងបានបញ្ជាក់ថា៖ ពាក្យបណ្តឹងនេះបានដាក់ចូលទៅជូនលោកប្រធាននាយកដ្ឋានព្រហ្មទណ្ឌក្រសួងមហាផ្ទៃ។ ក្នុងនោះលោក ខឹម វាសនា បានញុះញង់ប្រមាថព្រះមហាក្សត្រ បង្កើតបដិវត្តន៍ពណ៌ផ្តួលរំលំរាជរដ្ឋាភិបាល ចេតនាបំផ្លាញព្រះពុទ្ធសាសនានៅកម្ពុជា។
ព្រះសង្ឃដើមបណ្តឹងបានអះអាងថា៖ «លោក ខឹម វាសនា និងបក្សពួករបស់ខ្លួនតែងបទចម្រៀងជេរប្រមាថជាសាធារណៈ និងតែងតែយកវីដេអូរអាសអាភាសរបស់ព្រះសង្ឃខ្មែរកម្ពុជាក្រោម ថៃ ភូមា ស្រីលង្កា ខ្មែរ ខ្លះ ដែលខ្លះពិត ខ្លះមិនពិតមកបង្ហោះលើបណ្តាញសង្គមហ្វេសប៊ុក ហើយបក្សពួករបស់លោក ខឹម វសានា បាននាំគ្នាចែករំលែកបន្ត»។
ចែករំលែកព័តមាននេះ