ខេត្តតាកែវ ៖ បុរស់ម្នាក់បានស្លាប់បាត់បង់ជីវិតភ្លាមៗនៅនឹងកន្លែង ខណៈពេលដែលជនរងគ្រោះបានជិះម៉ូតូតែម្នាក់ឯងជ្រុលចង្កូតទៅបុកនឹងរ៉ឺម៉កម៉ូតូដែលបានបើកបញ្រាស់ទិសគ្នាបណ្តាលឲ្យស្លាប់ភ្លាមៗ ហេតុការណ៍គ្រោះថ្នាក់ចរាចរណ៍កើតឡើងកាលពីថ្ងៃទី២៦ ខែវិច្ឆិកា ឆ្នាំ២០១៧ វេលាម៉ោង១៨និង១៦នាទីព្រលប់នៅតាមបណ្តោយផ្លូវលេខ១២៩ចន្លោះបង្គោលគីឡូម៉ែត្រលេខ២៩ និង៣០ស្ថិតនៅភូមពាមឃុំកំពង់រាបស្រុកព្រែកប្បាសខេត្តតាកែវ ។
លោកជុំ ឈឿន អធិការនគរបាលស្រុកព្រែកប្បាសបានឲ្យដឹងថា ជនរងគ្រោះដែលស្លាប់ ឈ្មោះលឹម យឿន អាយុ៣៧ឆ្នាំ រស់នៅភូមិកំពង់ស្វាយ ឃុំព្រែកថ្មី ស្រុកកោះធំ ខេត្តកណ្តាល ស្លាប់ភ្លាមៗតែម្តង ។
លោកអធិការនគរបាលស្រុកបានបន្តទៀតថា នៅមុនពេលកើតហេតុជនរងគ្រោះជិះម៉ូតូ សេ៩០ពណ៌ទឹក ពាក់ស្លាកលេខ១E -២៧១៣ តាកែវ ធ្វើដំណើរពីលិចទៅកើតយ៉ាងលឿនរួចជ្រុលចង្កូតទៅបុកនឹងរ៉ឺម៉កម៉ូតូសណ្តោងកន្ទុយដែលកំពុងតែធ្វើដំណើរមកពីខាងកើតទៅលិចហើយបានបុកពេញមួយទំហឹងបណ្តាលឲ្យស្លាប់ភ្លាមៗ រីឯម្ចាស់រ៉ឺម៉កម៉ូតូបានរត់គេចខ្លួនបាត់ ។
ចំណែកឯម៉ូតូសណ្តោងរ៉ឺម៉កវិញ ពណ៌ខ្មៅ ស៊េរីឆ្នាំ២០១០ គ្មានស្លាកលេខ អ្នកបើកមិនស្គាល់អត្តសញ្ញាណ ក្រោយពេលកើតហេតុប៉ូលិសបានយកវត្ថុតាងទាំងពីរមករក្សាទុកនៅអធិការដ្ឋាននគរបាលស្រុកដើម្បីចាត់ការទៅតាមច្បាប់ ៕
ចែករំលែកព័តមាននេះ