ខេត្តប៉ៃលិន ៖ សាលាដំបូងខេត្តប៉ៃលិនត្រូវបានស្ថាបនារួចរាល់ និងបើកសម្ពោធដាក់ឱ្យប្រើប្រាស់ជាផ្លូវការកាលពីវេលាម៉ោង៨ព្រឹកថ្ងៃទី២៤ មករា ២០១១ នៅក្រុងប៉ៃលិនតែម្តង ក្រោមអធិបតីភាពលោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ អមដោយលោកអ៊ុក សាវុធ អគ្គព្រះរាជអាជ្ញានៃមហាអយ្យការតុលាការកំពូល និងមានការអញ្ជើញចូលរួមពីមន្ត្រីស្ថាប័នពាក់ព័ន្ធជុំវិញខេត្តយ៉ាងច្រើនកុះករ ។
ប្រធានសាលាដំបូងនេះ មានលោកចៅក្រមជុំ ស និងព្រះរាជអាជ្ញាអមសាលាដំបូង លោកជុំ សែនសទ្ធា ត្រូវបានតែងតាំងដោយព្រះរាជ្យក្រឹត្យរួចរាល់ហើយ នៅឡើយចៅក្រម៤រូប ព្រះរាជអាជ្ញារង២រូប ក្រឡាបញ្ជី៧រូប និងមន្ត្រីរដ្ឋបាល៤រូបទៀត កំពុងរង់ចាំព្រះរាជក្រឹត្យ និងអនុក្រឹត្យមកដល់ ដើម្បីទទួលយកតួនាទីពេញលេញ…ប៉ុន្តែចាប់ពីពេលនេះតទៅគឺមន្ត្រីទាំងអស់ដែលបានចាត់ចែងរួចរាល់នោះ នឹងត្រូវបំពេញការងារម៉ឺងម៉ាត់តាមគោលការណ៍របស់ថ្នាក់លើ។
លោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ បានមានប្រសាសន៍ថា រាល់សំណុំរឿងកន្លងមកត្រូវទុកឱ្យសាលាដំបូងខេត្តបាត់ដំបងជាអ្នកចាត់ការតាមធម្មតាចុះ ប៉ុន្តែចាប់ពីពេលសម្ពោធបើកឱ្យដំណើរការសាលាដំបូងខេត្តប៉ៃលិន នេះទៅ បើខេត្តប៉ៃលិនមានរឿងក្តីអ្វីកើតឡើងគឺសាលាដំបូងខេត្តនេះជាអ្នកចាត់ការដោយខ្លួនឯង ៕
ចែករំលែកព័តមាននេះ