ទីក្រុងបាងកក ៖ តម្លៃប្រាក់បាតបានកើនឡើងដល់១ដុល្លារ ស្មើ៣២,៨១បាត កាលពីថ្ងៃចន្ទកន្លងមក ជាកម្រិតខ្ពស់ជាងគេតាំងពីខែមេសា ឆ្នាំ២០១៥មក ដោយសារសេដ្ឋកិច្ចលូតលាស់ក្នុងត្រីមាសទី៣ ។
សេដ្ឋកិច្ចថៃបានលូតលាស់ក្នុងល្បឿនលឿនជាងគេក្នុងរយៈពេល៤ឆ្នាំកន្លះមកនេះ ប៉ុន្តែការលូតលាស់ប្រចាំត្រីមាសមើលឃើញការអន់ថយ។ វាបង្ហាញថា គោលនយោបាយរូបិយប័ណ្ណអាចនឹងបន្តបន្ធូរបន្ថយដើម្បីជំរុញតម្រូវការក្នុងស្រុក ។
តម្លៃប្រាក់បាតបានកើនឡើង០,០៩%ទៀត បន្ទាប់ពីចេញព័ត៌មានទាក់ទងនឹងការលូតលាស់ GDP របស់ប្រទេស ។
រូបិយប័ណ្ណរបស់ប្រទេសអាស៊ីភាគច្រើនមើលមិនឃើញការលូតលាស់ខ្លាំងក្លាទេនៅថ្ងៃចន្ទ ព្រោះតែមានភាពមិនប្រាកដប្រជាផ្នែកនយោបាយក្នុងប្រទេសអាល្លឺម៉ង់ និងរំពឹងចាំ មានការកែទម្រង់រដ្ឋាករនៅសហរដ្ឋអាមេរិកផងដែរ ។
សន្ទស្សន៍ប្រាក់ដុល្លារបានកើនឡើង០,៣% ព្រោះតម្លៃប្រាក់អឺរ៉ូធ្លាក់ចុះ បន្ទាប់ពីលោកស្រីអធិការបតីអាល្លឺម៉ង់ Angela Merkel មិនអាចបង្កើតរដ្ឋាភិបាលចម្រុះបាន ដែលជំរុញឲ្យមានភាពមិនប្រាកដប្រជាផ្នែកនយោបាយ ។
នាពេលថ្មីៗនេះ តម្លៃប្រាក់ដុល្លារបានធ្លាក់ចុះ ដោយសារភាពមិនប្រាកដប្រជាទាក់ទងនឹងគោលនយោបាយរដ្ឋាករអាមេរិក ជាពិសេស បញ្ហាទាក់ទងនឹងអាជីវកម្ម និងអ្នកមានទ្រព្យសម្បត្តិច្រើន ។
ខណៈតម្លៃប្រាក់បាតបានកើនឡើងដល់កម្រិតខ្ពស់ជាងគេក្នុងរយៈពេល២ឆ្នាំកន្លះមកនេះ ប្រាក់រីងហ្គីតរបស់ម៉ាឡេស៊ីបានកើនឡើង០,១% ផងដែរ ។ តម្លៃប្រាក់រីងហ្គីតបន្តកើនឡើង បន្ទាប់ពីទិន្នន័យកាលពីថ្ងៃសុក្របង្ហាញថា សេដ្ឋកិច្ចម៉ាឡេស៊ីបានលូតលាស់នៅត្រីមាសទី៣ ក្នុងល្បឿនលឿនជាងគេនារយៈពេល៣ឆ្នាំមកនេះ ។
ចំណែកតម្លៃប្រាក់ក្នុងតំបន់ដែលបានធ្លាក់ចុះ រួមមាន ប្រាក់វ៉ុនរបស់កូរ៉េខាងត្បូង ធ្លាក់ចុះ០,២% និងប្រាក់ដុល្លារសិង្ហបុរីធ្លាក់ចុះ០,២% ព្រោះតែតម្លៃប្រាក់អឺរ៉ូធ្លាក់ចុះ ៕
ចែករំលែកព័តមាននេះ