ខេត្តបាត់ដំបង ៖ បុរសម្នាក់បានស្លាប់ភ្លាមៗនៅកន្លែងកើតហេតុ ក្រោយពីជិះម៉ូតូទៅបុកគោយន្តកន្ត្រៃពីក្រោយ កាលពីវេលាម៉ោង០៦និង២៥នាទីយប់ ថ្ងៃទី២០ ខែវិច្ឆិកា ឆ្នាំ២០១៧ នៅលើផ្លូវជាតិលេខ៥៧B ត្រង់ចំណុចភូមិបឹងសង្កែ…
ខេត្តបាត់ដំបង ៖ បុរសម្នាក់បានស្លាប់ភ្លាមៗនៅកន្លែងកើតហេតុ ក្រោយពីជិះម៉ូតូទៅបុកគោយន្តកន្ត្រៃពីក្រោយ កាលពីវេលាម៉ោង០៦និង២៥នាទីយប់ ថ្ងៃទី២០ ខែវិច្ឆិកា ឆ្នាំ២០១៧ នៅលើផ្លូវជាតិលេខ៥៧B ត្រង់ចំណុចភូមិបឹងសង្កែ ឃុំអំពិលប្រាំដើម ស្រុកបវេល ។
សមត្ថកិច្ចស្រុកបវេល បានឲ្យដឹងថា ជនរងគ្រោះឈ្មោះ យី យាវម៉ាណ ភេទប្រុស អាយុ២៧ឆ្នាំ នៅភូមិកំពង់ឆ្នាំង១ ឃុំបវេល ស្រុកបវេល ជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ បាត់ដំបង ១Q-៦៨៨៣ ។ សមត្ថកិច្ចបានបញ្ជាក់ថា ជនរងគ្រោះបានជិះបុកគោយន្តកន្ត្រៃពីក្រោយ ខណៈកំពុងធ្វើដំណើរស្របទិសគ្នាពីលិចទៅកើត ហើយបានបោកនឹងទ្រុងគោយន្ត និងដូលបោកក្បាលលើថ្នល់ បណ្ដាលឲ្យស្លាប់ភ្លាមៗតែម្ដង ឬឯអ្នកបើកគោយន្តឃើញដូច្នេះបានដាក់មេប្រូចចោលគោយន្តបាត់ភ្លាមៗដែរ ។
បើតាមការបំភ្លឺខ្លះៗពីសាក្សីថា ជនរងគ្រោះបានជិះមូតូលឿនពេក ហើយទំនងមិនបានចាប់អារម្មណ៍ ឬមើលមិនឃើញគោយន្តនៅខាងមុខ ទើបបានជាជិះបុកទាំងកំរោលបែបនេះ ។ សាក្សីបានបន្តថា ជនរងគ្រោះបានជិះបុកគោយន្តពេញទំហឹង បណ្ដាលឲ្យបុកនឹងទ្រុងគោយន្តផង និងដូលបោកក្បាលលើថ្នល់ផង ទើបស្លាប់ភ្លាមៗ ឬឯម្ចាស់គោយន្តបានរត់គេចខ្លួនបាត់ ក្រោយពីឃើញមនុស្សស្លាប់បែបនេះ ខណ:សមត្ថកិច្ចបានចុះទៅដល់កន្លែងកើតហេតុភ្លាមៗដែរ ។
មន្ត្រីមូលដ្ឋានបាននិយាយថា ឧប្បត្តិហេតុគ្រោះថ្នាក់ចរាចរខាងលើនេះ បានកើតឡើងដោយសារការធ្វេសប្រហែសរបស់អ្នកបើកបរនៅពេលយប់ ។ មន្ត្រីដដែលបានបញ្ជាក់ថា អ្នកជិះម៉ូតូហាក់ខ្វះការប្រុងប្រយ័ត្ន ជិះលឿនហូសហេតុ ឬឯម្ចាស់គោយន្តមិនបានដាក់ស្លាកសញ្ញា ឬចំណាំងប្លាតនៅលើរ៉ឺម៉ក ឬផ្នែកខាងក្រោយនៃកន្ទុយរ៉ឺម៉កគោយន្ត ដើម្បីឲ្យគេបានឃើញនៅពេលធ្វើដំណើរពេលយប់ ។ នេះជាកំហុសធ្ងន់ធ្ងរ ដែលនាំឲ្យមានគ្រោះថ្នាក់ចរាចរ ។ ដូច្នេះម្ចាស់គោយន្ត ឬរថយន្តកែច្នៃដែលគ្មានភ្លើងបំភ្លឺនៅផ្នែកខាងក្រោយ គួរតែបំពាក់ស្លាកសញ្ញា ឬចំណាំងប្លាត ដើម្បីឲ្យអ្នកធ្វើដំណើរបានឃើញពេលធ្វើចរាចរពេលយប់ ចៀសវាងកុំឲ្យមានការជិះបុកពីក្រោយដូចខាងលើនេះ ។ ទោះយ៉ាងណាមន្ត្រីជំនាញបាននាំយកគោយន្ត និងម៉ូតូជនរងគ្រោះទៅរក្សាទុកនៅអធិការដ្ឋាននគរបានស្រុកបវេលហើយ ដើម្បីកសាងសំណុំរឿងចាត់វិធានការតាមនីតិវិធី ៕
ចែករំលែកព័តមាននេះ