រាជធានីភ្នំពេញ ៖ ស្ត្រីមានផ្ទៃពោះ៤ខែម្នាក់ឃើញជនដៃដល់មួយក្រុមក្នុងនោះមានបងប្អូនជីដូនមួយម្នាក់ផងនាំគ្នាដេញវាយប្តីខំប្រឹងស្រែកឃាត់មិនឲ្យវាយប្តីរហូតភ័យគាំងបេះដូងស្លាប់ភ្លាមៗបង្កឲ្យមានការភ្ញាក់ផ្អើលកាលពីវេលាម៉ោង១០យប់ថ្ងៃទី២០ ខែវិច្ឆិកា ឆ្នាំ២០១៧ នៅដីវាលភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ។
សពជនរងគ្រោះឈ្មោះគឹម ណារី អាយុ២៣ឆ្នាំ មុខរបរលក់បាយជាមួយម្តាយនៅមុខរោងចក្រ ស្នាក់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ មានស្រុកកំណើតនៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។ ចំណែកប្តីឈ្មោះ នៅ សារ៉ែន អាយុ២០ឆ្នាំ មុខរបរកម្មករសំណង់ ស្នាក់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ មានស្រុកកំណើតនៅភូមិតាហ៊ ឃុំតាកូវ ស្រុកកំពង់ត្របែក ខេត្តព្រៃវែង ។
ព័ត៌មានពីបុរសជាប្តីជនរងគ្រោះបានឲ្យដឹងថា មុនពេលកើតហេតុប្រពន្ធរបស់គាត់ចង់ហូបទាឆាក្តៅ បន្ទាប់មកគាត់បានយកទា និងស្រាបៀរមកហូបពីរនាក់ប្រពន្ធ ហើយឲ្យនាងហូបស្រាបៀរចំនួន២កំប៉ុង លុះពេលប្រពន្ធហូបស្រាបៀរអស់២កំប៉ុងហើយឈប់ផឹក ។ រូបគាត់បានទូរស័ព្ទហៅប្អូនជីដូនមួយ២នាក់ទៀតមកហូបជាមួយរហូតស្រវឹងហើយប្អូនជីដូនមួយក៏បានត្រឡប់ទៅផ្ទះវិញបានមួយសន្ទុះ ក្រោយមកលឺដំណឹងថា ប្អូនជីដូនមួយម្នាក់ដែលផឹកស៊ីជាមួយវាយប្រពន្ធ ហើយគាត់នឹងប្រពន្ធ ម្តាយក្មេក និងម្តាយប្អូនជីដូនមួយម្នាក់ទៀត នាំទៅដែលនៅឆ្ងាយពីគ្នាប្រមាណមួយគីឡូ ដើម្បីទៅជួយឃាត់កុំឲ្យវាយប្រពន្ធដែលទើបនឹងសម្រាលកូនផង ។
ពេលនោះគាត់បាននិយាយណែនាំរួចហើយ ខ្លាចលើសលោះក៏បានត្រឡប់ទៅផ្ទះតែឯង ខ្លាចក្រែងប្អូនជីដូនមួយខឹងរករឿងវាយខ្លួនវិញ ។ ពេលទៅដល់បន្ទប់ជួលហើយនឹកឃើញថា ប្រពន្ធដើរមកម្នាក់ឯងតាមផ្លូវងងឹត ទើបរូបគាត់បានកាន់ពិលទៅយកប្រពន្ធវិញ លុះដើរមកដល់ពាក់កណ្តាលផ្លូវបានជួបប្រពន្ធនៅចំណុចដីវាលដែលជាកន្លែងកើតហេតុក៏បាននាំប្រពន្ធទៅផ្ទះវិញ ស្រាប់តែមានជនដៃដល់មានគ្នា៤នាក់ ក្នុងនោះមានប្អូនម្នាក់ផងដែរ បានស្ទាក់វាយរូបគាត់តែម្នាក់ឯង ហើយប្រពន្ធឃើញគេដេញវាយប្តីបែបនេះបានស្រែកថា កុំវ៉ៃប្តីអញៗ ពេលនោះរូបគាត់ភ័យពេកបាន រត់ចោលប្រពន្ធហើយបានក្រឡេកទៅមើលប្រពន្ធវិញឃើញនាងដួល ហើយរត់មករកប្រពន្ធវិញ ស្រាប់តែប្រពន្ធស្លាប់បាត់ទៅហើយ ចំណែកជនដៃដល់ទាំង៤នាក់ខាងលើ បានរត់គេចខ្លួនបាត់។
តែរូបគាត់និងឪពុកម្តាយក្មេកមិនអស់ចិត្ត បានហៅរថយន្តសង្គ្រោះមកដឹកយកទៅព្យាបាល តែពេលរថយន្តសង្គ្រោះដឹកចេញបានបន្តិចហើយបានឈប់ដោយដឹងថាជនរងគ្រោះខាងលើស្លាប់បាត់ទៅហើយ ។ បន្ទាប់មកបានរាយការណ៍ដល់អាជ្ញាធរនឹងសមត្ថកិច្ចចុះមកពិនិត្យសពដែលត្រូវបានក្រុមគ្រួសារដឹកយកទៅដំកល់នៅវត្តជម្ពូវន្តធ្វើបុណ្យតាមប្រពៃណី និងរង់ចាំជំនាញធ្វើកុសលវិច្ឆ័យ ។
ព័ត៌មានបានឲ្យដឹងថា ជនរងគ្រោះមានជម្ងឺបេះដូងប្រចាំកាយផង ពេលដែលតក់ស្លុតពេករហូតគាំងបេះដូងស្លាប់តែម្តង ៕
ចែករំលែកព័តមាននេះ