កំពុងសង្ស័យរថយន្តស្លាកលេខខេមរភូមិន្ទចង្កូតស្តាំ១គ្រឿង
- បន្ទាយមានជ័យ
ខេត្តបន្ទាយមានជ័យ ៖ នៅព្រឹកថ្ងៃទី២០ខែវិច្ឆិកា ឆ្នាំ២០១៧ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានត្រួតពិនិត្យរថយន្តមួយគ្រឿង ដែលសង្ស័យថា…
ខេត្តបន្ទាយមានជ័យ ៖ នៅព្រឹកថ្ងៃទី២០ខែវិច្ឆិកា ឆ្នាំ២០១៧ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានត្រួតពិនិត្យរថយន្តមួយគ្រឿង ដែលសង្ស័យថា ជារថយន្តបង្កបទល្មើសចរាចរណ៍ ដោយម្ចាស់រត់គេខ្លួនបាត់។ តាមការឲ្យដឹងពីលោកវរសេនីយ៍ឯក ចាប សុផារិទ្ធ ស្នងការរង ទទួលផែនប្រឆាំងបទល្មើសឲ្យដឹងថា ក្រោយពីទទួលបាននូវព័ត៌មាន កម្លាំងនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបន្ទាយមានជ័យ បានសហការណ៍ជាមួយកម្លាំងនគរបាលស្រុកថ្មពួក អនុវត្តតាមបទបញ្ជាផ្ទាល់ដោយលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានធ្វើការត្រួតពិនិត្យរថយន្តស្លាកលេខ ខេមរភូមិន្ទ ២-៩១១០ បើកជ្រុលធ្លាក់ចូលប្រឡាយទឹកទៅមុខលែងរួចនៅចំណុចស្ថិតនៅលើកំណាត់ផ្លូវជាតិលេខ៥៦A នៅភូមិភ្នំថ្មី ឃុំគោករមៀត ស្រុកថ្មពួក ខេត្តបន្ទាយមានជ័យ កាលពីថ្ងៃទី១៧ ខែវិច្ឆិកា ឆ្នាំ២០១៧មកម្លេះ រីឯម្ចាស់រថយន្តនោះវិញបានរត់គេចខ្លួនបាត់។
តាមការឲ្យដឹងពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត បញ្ជាក់ថា៖ រថយន្តនេះសង្ស័យជាករណីគ្រោះថ្នាក់ចរាចរណ៍ ព្រោះរថយន្តបានបើកធ្លាក់ប្រឡាយ ពេលនេះរថយន្តត្រូវយកមកកន្លែងស្នងការដ្ឋាននគរបាលខេត្តបន្ទាយមានជ័យ ដើម្បីធ្វើការស្រាវជ្រាវថាតើរថយន្តនេះពាក់ព័ន្ធនឹងគ្រោះថ្នាក់ចរាចរណ៍ ឬរថយន្តដែលត្រូវជនខិលខូចលួចនាំចូលមកប្រទេសកម្ពុជាតាមច្រករបៀងព្រំដែនណាមួយខុសច្បាប់។ ប្រសិនបើរកឃើញថា ពាក់ព័ន្ធទៅនឹងការលួចនាំចូល គឺជននោះប្រប្រឹត្តខុសទៅនឹង វិធានការបង្ការទប់ស្កាត់នៃការនាំចូលរថយន្តចង្កូតស្តាំគេចពន្ធខុសច្បាប់ របស់សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ធ្លាប់ដាក់បទបញ្ជាឱ្យមានការទប់់ស្កាត់បទល្មើសឆ្លងដែនខុសច្បាប់គ្រប់ប្រភេទ ហើយក្នុងនោះសម្តេចក៏បាបញ្ជាឱ្យបិទច្រករបៀងខុសច្បាប់ទាំងអស់នោះផងដែរ ពីព្រោះថាច្រករបៀងគឺជាប្រភពនៃការប្រព្រឹត្តបទល្មើសខុសច្បាប់។
ដូចជាការលួចនាំចូលរថយន្តចង្កូតស្តាំត្រូវបានច្បាប់ប្រទេសកម្ពុជាហាមឃាត់មិនឱ្យប្រើប្រាស់នោះឡើយ ព្រោះជាផ្នែកមួយអាចបង្កឱ្យកើតមានគ្រោះថ្នាក់ចរាចរណ៍នោះផងដែរ។ បើក្នុងច្បាប់ចរាចរណ៍ត្រូវប្រើប្រាស់រថយន្តចង្កូតឆ្វេងហើយត្រូវព្រោះយើងប្រកាន់ស្តាំ។ ក្នុងករណីនេះសតម្ថកិច្ចជំនាញ កំពុងធ្វើការស្រាវជ្រាវយ៉ាងយកចិត្តទុកដាក់ផងដែរ តើរថយន្តពាក់ព័ន្ធករណីគ្រោះថ្នាក់ចរាចរណ៍ ឬរថយន្តនាំចូលមកក្នុងប្រទេសកម្ពុជាយើង តាមច្រករបៀងព្រំដែនណាមួយ៕
ចែករំលែកព័តមាននេះ