ខេត្តបន្ទាយមានជ័យ ៖ ជនសង្ស័យម្នាក់ជក់ញៀនថ្នាំដល់កម្រិតបានធ្វើសកម្មភាពទាញយកកាំបិតដេញកាប់ប្រជាពលរដ្ឋក្នុងភូមិរត់បាតជើងសព្រាតបង្កឲ្យមានការភ្ញាក់ផ្អើល ដល់កំលាំងអាវុធហត្ថក្រុងប៉ោយប៉ែតធ្វើការឃាត់ខ្លួនបាន និងបង្កសំណុំរឿងបញ្ជូនទៅសាលាដំបូងខេត្ត នៅថ្ងៃទី១៤ ខែវិច្ឆិកា ឆ្នាំ២០១៧ ។
ជនសង្ស័យ ឈ្មោះ ជាតិ រស្មី ភេទប្រុស អាយុ៣០ឆ្នាំ រស់នៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកអនុសេនីយ៍ឯក សរ សុភក្ត្រា មេបញ្ជាការស្ដីទីមូលដ្ឋាន ក្រុងប៉ោយប៉ែតបានឲ្យដឹងថា នៅវេលាម៉ោង១១យប់ថ្ងៃទី១២ ខែវិច្ឆិកា ឆ្នាំ២០១៧ នៅចំណុចក្រុម៥ ភូមិអូរជ្រៅ សង្កាត់ប៉ោយប៉ែត ខេត្តបន្ទាយមានជ័យ ជនសង្ស័យបានយកកាំបិតដេញកាប់ប្រជាពលរដ្ឋក្នុងភូមិ បង្កឲ្យផ្អើលទាំងយប់ ដោយសារតែគ្រឿងញៀនដល់កម្រិត ។ លោកបានបញ្ជាក់ឲ្យដឹងទៀតថា នៅមុនពេលកើតហេតុនោះកំលាំងអាវុធហត្ថក្រុងប៉ោយប៉ែតបានព័ត៌មានពីប្រជាពលរដ្ឋ កម្លាំងអាវុធហត្ថក្រុងប៉ោយប៉ែត៥នាក់ ដឹកនាំដោយលោកអនុសេនីយ៍ឯកនួន នីណារ៉ូ មេបញ្ជាការរងកងរាជអាវុធហត្ថចុះទៅដល់កន្លែងកើតហេតុ និងចាប់ឃាត់ខ្លួនជនសង្ស័យបានភ្លាមៗព្រមទាំងធ្វើការឆែកក្នុងខ្លួនជនសង្ស័យរកឃើញម៉ាទឺកកក១កូនថង់តូច កាំបិតខ្វែវ១ ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបានឲ្យដឹងថា នៅមុខសមត្ថកិច្ច ជនសង្ស័យបានឆ្លើយសារភាពថា នៅមុនពេលកើតហេតុនោះខ្លួនបានជក់ថ្នាំដែលមិត្តភក្តិឲ្យចូលពោះភ្លាម ស្រាប់តែមានការឈ្លោះគ្នាជាមួយអ្នកជិតខាងយ៉ាងខ្លាំងដោយទ្រាំមិនបានក៏រត់ទៅយកកាំបិតមកដេញកាប់តែមិនបានសម្រេចត្រូវអាវុធហត្ថធ្វើការឃាត់ខ្លួនបានតែម្តង ។
ជនសង្ស័យ និងវត្ថុតាងត្រូវ អាវុធហត្ថជំនាញកសាងសំណុំរឿងបញ្ជូនទៅតុលាការដើម្បីដាក់ទោសទៅតាមផ្លូវច្បាប់ ៕
https://www.youtube.com/watch?v=Tw1Ad_WvqKo
ចែករំលែកព័តមាននេះ