ថ្នាំកម្លាំងបង្កើតឡើងដើម្បីធ្វើឲ្យអ្នកមានស្មារតីខ្លាំង ។ ជាញឹកញាប់វាមានសារធាតុតូរីន និងវីតាមីន B6 ដើម្បីផ្តល់ថាមពលដល់រាងកាយអ្នក ។ អេឡិចត្រូលីតក៏ត្រូវបានគេបន្ថែមចូលផងដែរដើម្បីកាត់បន្ថយការឈឺចាប់សាច់ដុំ និងរក្សាជាតិទឹកក្នុងខ្លួន ។ ពួកវារួមមានសារជាតិរ៉ែដូចជាសូដ្យូម កាល់ស្យូម ក្លរួ ប៉ូតាស្យូម និងម៉ាញេស្យូម ។
ថ្នាំទាំងនេះមានភាពពេញនិយមចំពោះអត្តពលិកដែលចង់បង្កើនសមត្ថភាពក្នុងការលេងកីឡា ។ ប្រសិនបើពួកគេប្រើប្រាស់ថ្នាំនេះមិនបានត្រឹមត្រូវ វាអាចនាំឱ្យមានផលប៉ះពាល់ទាំងប្រាំខាងក្រោម ។
១-ប៉ូតាស្យូមក្នុងឈាមកើនឡើងខ្ពស់
ថ្នាំកម្លាំងអាចធ្វើឲ្យរាងកាយរបស់អ្នកផ្ទុកប៉ូតាស្យូមក្នុងបរិមាណដ៏ច្រើន ។ វាអាចនាំឱ្យមានសារជាតិប៉ូតាស្យូមមានកម្រិតខ្ពស់ក្នុងឈាម ។
រោគសញ្ញាដែលបង្ហាញថាអ្នកមានប៉ូតាស្យូមខ្ពស់ក្នុងឈាមគឺចង់ក្អួត ស្ពឹក ឆាប់ខឹង ខ្សោយសាច់ដុំ ឈឺក្រពះ និងរាក ។ សារធាតុប៉ូតាស្យូមក៏អាចគ្រប់គ្រងសាច់ដុំបេះដូងរបស់អ្នកផងដែរ ដូច្នេះនៅពេលឈាមរបស់អ្នកមានប៉ូតាស្យូមក្នុងកម្រិតមួយខ្ពស់ វាអាចនាំឱ្យចង្វាក់បេះដូងដើរយឺត ឬសន្លប់។
២-កាល់ស្យូមក្នុងឈាមកើនឡើងខ្ពស់
ផលប៉ះពាល់មួយទៀតនៃថ្នាំកម្លាំងគឺការកើនឡើងកម្រិតកាល់ស្យូមខ្ពស់ក្នុងឈាម ។ សារធាតុរ៉ែនេះចាំបាច់សម្រាប់មុខងារសរសៃប្រសាទ និងការកន្ត្រាក់សាច់ដុំ ។ វាក៏ចាំបាច់សម្រាប់សុខភាពឆ្អឹង ធ្មេញ និងឈាមកកផងដែរ ។
ជាតិកាល់ស្យូមក្នុងឈាមកើនឡើងខ្ពស់អាចនឹងមិនបង្កឱ្យមានរោគសញ្ញា ។ ប៉ុន្តែប្រសិនបើវាមានរោគសញ្ញា អ្នកអាចសម្គាល់ឃើញថាមានការឈឺចាប់ឆ្អឹង អស់កម្លាំង រវើរវាយ ចង្អោរ និងការរមួលសាច់ដុំ ។ សម្ពាធនៅលើតម្រងនោមដោយសារការកើនឡើងជាតិកាល់ស្យូមក៏អាចនាំឱ្យមានការកើនឡើងការស្រេកទឹក ឬបត់ជើងតូចច្រើនដង ។
៣-សូដ្យូមក្នុងឈាមកើនឡើងខ្ពស់
រាងកាយត្រូវការជាតិសូដ្យូមដើម្បីរក្សាតុល្យភាពជាតិទឹក ។ វាក៏ជួយធ្វើឲ្យសាច់ដុំ និងសរសៃប្រសាទធ្វើការបានត្រឹមត្រូវតាមមុខងាររបស់វាផងដែរ ។ ទោះជាយ៉ាងណាក្តី ការប្រើប្រាស់ថ្នាំកម្លាំងអាចនាំឱ្យកម្រិតសូដ្យូមក្នុងឈាមកើនឡើងខ្ពស់ ។
ផលប៉ះពាល់នៃបញ្ហានេះជាធម្មតាមិនបង្ហាញឡើងនោះទេ រហូតដល់កម្រិតសូដ្យូមក្នុងឈាមរបស់អ្នកឡើងខ្ពស់ខ្លាំង ។ រោគសញ្ញាមានចាប់ពីចង្អោរ និងក្អួតរហូតដល់ខ្សោយសាច់ដុំ និងប្រកាច់ ។
៤-ម៉ាញេស្យូមក្នុងឈាមកើនឡើងខ្ពស់
រាងកាយរបស់អ្នកអាចបញ្ចេញជាតិម៉ាញ៉េស្យូមច្រើនហួសហេតុ ប្រសិនបើអ្នកប្រើប្រាស់ថ្នាំកម្លាំងច្រើនពេក ការពុលម៉ាញ៉េស្យូមក៏អាចកើតឡើងផងដែរ ។
រោគសញ្ញាអាចរួមមានចង្អោរ ក្អួត មុខឡើងក្រហម សម្ពាធឈាមចុះទាប និងលំបាកក្នុងការដកដង្ហើម ។ ក្នុងករណីធ្ងន់ ចង្វាក់បេះដូងលោតមិនទៀងទាត់ និងការគាំងបេះដូងអាចកើតឡើង ។
៥-ខូចខាតតម្រងនោម
ថ្នាំកម្លាំងអាចបង្កបញ្ហាធ្ងន់ដល់តម្រងនោមរបស់អ្នក ។ តម្រងនោមនឹងធ្វើការកាន់តែខ្លាំងដើម្បីដោះស្រាយបញ្ហានៃការកើនអេឡិចត្រូលីតខ្លាំងពេក ដែលធ្វើឱ្យពួកវាងាយរងការខូចខាតកាន់តែខ្លាំង ។
គ្រឿងផ្សំផ្សេងទៀតដូចជាសារធាតុតូរីន និងវីតាមីន B6 ក៏អាចមានគ្រោះថ្នាក់ ។ សារធាតុតូរីនគឺជាអាស៊ីដអាមីណូដែលសំខាន់ ប៉ុន្តែវានឹងប៉ះពាល់ដល់ការរំលាយអាហារ និងតុល្យភាពអាស៊ូតនៅពេលវាមានកម្រិតខ្ពស់ពេក ។ វីតាមីន B6 ច្រើនពេក ដែលចាំបាច់សម្រាប់ការធ្វើមេតាបូលីសប្រូតេអុីន អាចបណ្តាលឱ្យស្ពឹក និងមានបញ្ហាសរសៃប្រសាទ ៕
ចែករំលែកព័តមាននេះ