រាជធានីភ្នំពេញ៖ លោក គី តិច មេធាវីតំណាងដោយអាណត្តិរបស់ប្រមុខរាជរដ្ឋាភិបាលកម្ពុជា នៅរសៀលថ្ងៃទី០៦ វិច្ឆិកានេះ បានចូលបំភ្លឺនៅអយ្យការអមសាលាដំបូងរាជធានីភ្នំពេញ តាមដីកាកោះរបស់លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ជុំវិញបណ្ដឹងប្តឹងលោក លឺ ឡាយស្រេង អតីតមន្ត្រីជាន់ខ្ពស់គណបក្សហ៊្វុនស៊ិនប៉ិច ពីករណីប្រមាថព្រះចេស្តាព្រះមហាក្សត្រ និងបរិហាកេរ្តិ៍ជាសាធារណៈកាលពីពេលថ្មីៗនេះ។
តុលាការក៏បានកោះហៅលោក លឺ ឡាយស្រេង ឱ្យចូលបំភ្លឺ នៅថ្ងៃទី២៧ ខែវិច្ឆិកា ផងដែរ តែយ៉ាងណាមិញលោក លី ឡាយស្រេង បានចាកចេញពីប្រទេសកម្ពុជាផុតទៅហើយ ។
សូមបញ្ជាក់ថា កាលពីរសៀលថ្ងៃទី២៤ ខែតុលា ឆ្នាំ២០១៧ កន្លងទៅនេះ មេធារី តំណាង ដោយអាណត្តិ របស់ប្រមុខរាជរដ្ឋាភិបាលកម្ពុជា បានដាក់ពាក្យបណ្តឹងផ្លូវការ ប្តឹងលោក លឺ ឡាយស្រេង ទៅអយ្យការអមសាលាដំបូងរាជធានីភ្នំពេញហើយ ដោយស្នើឱ្យផ្តន្ទាទោសតាមច្បាប់ និងទាមទារសំណងជំងឺចិត្តចំនួន៥០០លានរៀល ដល់ដើមបណ្តឹង។ ការដាក់ពាក្យបណ្តឹងរបស់លោកមេធាវី គី តិច ធ្វើឡើងបន្ទាប់ពីលោក លឺ ឡាយស្រេង ជាមួយលោកស្រី គី លំអង អតីតតំណាងរាស្ត្រគណបក្សហ៊្វុនស៊ិនប៉ិច បានសន្ទនាគ្នាប្រមាថព្រះចេស្តាលើអង្គព្រះមហាក្សត្រយ៉ាងធ្ងន់ធ្ងរ និងសម្តេចក្រុមព្រះ ហើយថែមទាំងនិយាយធ្វើឱ្យប៉ះពាល់ដល់កេរ្តិ៍ឈ្មោះ កិត្តិយស កិត្តិស័ព្ទយ៉ាងធ្ងន់ធ្ងរ ដល់ប្រមុខដឹកនាំជាន់ខ្ពស់រាជរដ្ឋាភិបាលកម្ពុជាផងដែរ។
ពាក្យបណ្តឹងរបស់លោក គី តិច ប្តឹងលោក លឺ ឡាយស្រេង បានសុំឱ្យព្រះរាជអាជ្ញានៃអយ្យការសាលាដំបូងរាជធានីភ្នំពេញ ធ្វើការចោទប្រកាន់ និងផ្តន្ទាទោសឈ្មោះ លឺ ឡាយស្រេង និងទាមទារឱ្យបុគ្គលនេះសងសំណងជំងឺចិត្តចំនួន៥០០លានរៀលដល់ដើមបណ្តឹងរដ្ឋប្បវេណី។ បន្ថែមពីលើនេះ ពាក្យបណ្តឹងក៏បានសុំឱ្យតុលាការប្រកាសផ្តន្ទាទោសបន្ថែមផ្អែកតាមមាត្រា៣១០ នៃក្រមព្រហ្មទណ្ឌ។
ករណីនេះកាលពីថ្ងៃទី២៤ ខែតុលា ឆ្នាំ២០១៧ រដ្ឋមន្ត្រីក្រសួងយុត្តិធម៌ លោក អង្គ វង្ស វឌ្ឍនា នេះបានស្នើឱ្យចាត់វិធានការតាមផ្លូវច្បាប់ជាបន្ទាន់ និងតឹងរ៉ឹងបំផុតចំពោះលោក លឺ ឡាយស្រេង ដែលបានប្រមាថយ៉ាងធ្ងន់ធ្ងរដល់ព្រះចេស្ដាអង្គព្រះមហាក្សត្រ។
លោកមេធាវីបានថ្លែងថា៖ «ខ្ញុំចូលមកតុលាការតាមការកោះរបស់តំណាងអយ្យការបំភ្លឺលើកបណ្តឹងដែលប្តឹងលោក លឺ ឡាយស្រេង បាននិយាយថា សម្តេចតេជោបានផ្តល់លុយ២ម៉ឺនដុល្លារដល់សមាជិកគណបក្សហ៊្វុនស៊ិនប៉ិច»។ លោកបន្តថា ដោយសារតែពេលវេលាខ្លីលោកបានបញ្ជាក់ប្រាប់តំណាងអយ្យការថា សូមរក្សាពាក្យបណ្តឹងដដែល។ ទន្ទឹមនឹងការប្រកាសប្ដឹងរឿងប្រមាថព្រះជេស្ដារ ព្រះមហាក្សត្រនេះ សម្ដេចតេជោ ហ៊ុន សែន បញ្ជាក់ថា សម្ដេចក៏នឹងប្ដឹងមួយករណីទៀត ដែលលោក លឺ ឡាយស្រេង បាននិយាយបរិហារកេរ្ដិ៍សម្ដេចថា ឲ្យមន្ដ្រីគណបក្សហ៊្វុនស៊ិនប៉ិច ម្នាក់២ម៉ឺនដុល្លារ។ កាលពីថ្ងៃទី២៣ ខែតុលា ឆ្នាំ២០១៧ លោក លឺ ឡាយស្រេង បានចាកចេញពីកម្ពុជា ៕
ចែករំលែកព័តមាននេះ