ប្រទេសតួកគី ៖ សវនាការកាត់ទោសពួកមេគំនិតធ្វើរដ្ឋប្រហារនៅតួកគីកាលពីថ្ងៃទី១៥ កក្កដា ២០១៦ បន្តធ្វើទៀតនាព្រឹកថ្ងៃទី៣០ តុលា នៅជិតក្រុងអង់ការ៉ា ក្នុងសាលសវនាការកសាងជាពិសេសសម្រាប់ជាកន្លែងកាត់ទោសមនុស្សជាច្រើនដែលជាប់ទាក់ទិននឹងការធ្វើរដ្ឋប្រហារមិនសម្រេចនេះ ។
ក្នុងចំណោមជនជាប់ចោទទាំងនេះក្រៅពីមនុស្ស១២នាក់ ជាយោធាក៏រួមមានគ្រូប្រដៅ
សាសនា លោក FETHULLAH GULEN រស់នៅឯសហរដ្ឋអាមេរិក ដែលអាជ្ញាធរតួកគីចាត់ទុកជាមេគំនិតសំខាន់នៃការប៉ុនប៉ងធ្វើរដ្ឋប្រហារនេះដោយរូបលោកត្រូវកាត់ទោសកំបាំងមុខ ។
រដ្ឋប្រហារមិនសម្រេចនេះបណ្តាលឱ្យមនុស្សស្លាប់ជិត២៥០នាក់ ពុំរាប់បញ្ចូលពួកអ្នកធ្វើរដ្ឋប្រហារផងទេ រួចមនុស្សច្រើនពាន់នាក់រងរបួស ពេលមានការប៉ះទង្គិចគ្នាដែលកើតមាននាយប់ថ្ងៃទី១៥ ទៅ១៦ កក្កដា ២០១៦ ។
ពួកជនជាប់ចោទត្រូវកាត់ទោសជាពិសេសពីបទប៉ុនប៉ងផ្តួលរំលំរដ្ឋអំណាច ហើយស្ថិតក្នុងអង្គការភេរវកម្មមួយរួចពួកគេអាចមានទោសជាប់គុកអស់មួយជីវិត ។ សវនាការកាត់ទោសពួកអ្នកទាំងនេះចាប់បើកធ្វើកាលពីថ្ងៃទី២២ ឧសភា ។ ចាប់តាំងពីរដ្ឋប្រហារមិនសម្រេចមក មនុស្សជាង៥០.០០០នាក់ ត្រូវចាប់ខ្លួន ហើយជាង១៤០.០០០នាក់ ត្រូវដកហូត ឬព្យួរតំណែងក្នុងទូទាំងប្រទេស ។
កាលពីសប្តាហ៍មុនមានបើកសវនាការកាត់ទោសសកម្មជនសិទ្ធិមនុស្ស១១នាក់ ក្នុងនោះរួមមានបណ្តាអ្នកទទួលខុសត្រូវរបស់អង្គការ AMNESTY INTERNATIONAL ប្រចាំតួកគី ដែលពួកគេត្រូវកាត់ទោសពីបទធ្វើសកម្មភាពភេរវកម្ម ។ ជនជាប់ចោទទាំងនេះត្រូវដោះលែងដោយមានលក្ខខណ្ឌលើកលែង តែលោក TANER KILIC ប្រធាន AMNESTY INTERNATIONAL ប្រចាំតួកគីដែលជាប់ចោទមានទំនាក់ទំនងជាមួយរដ្ឋប្រហារ ៕
ចែករំលែកព័តមាននេះ