រាជធានីភ្នំពេញ ៖ ក្រុមហ៊ុនផលិតទឹកផ្លែឈើ អង្គរដេលីហ្វូដ ក្រោមការបោះទុន ដោយវិនិយោគិនក្នុងស្រុក បានបើកដំណើរការសង្វាក់ផលិតកម្មរបស់ខ្លួនជាផ្លូវការ ដោយមានគោលដៅខ្ពស់ ដោយមិនត្រឹមតែផ្គត់ផ្គង់នៅលើទីផ្សារកម្ពុជាប៉ុណ្ណោះទេ តែក៏គ្រោងនឹងផលិតសម្រាប់នាំចេញទៅកាន់បណ្ដាប្រទេសជិតខាងផងដែរ ដើម្បីបង្ហាញដល់បណ្ដាប្រទេសទាំងនោះថា ពេលនេះ កម្ពុជាអាចមានសមត្ថភាពនាំចេញផលិតផលខ្លួនបានហើយដែរ ។
នៅក្នុងឱកាសបើកសម្ពោធដំណើរការផលិតរបស់រោងចក្រផលិតទឹកផ្លែឈើ អង្គរដេលីហ្វូដ នៅសង្កាត់ព្រៃស ខណ្ឌដង្កោ រាជធានីភ្នំពេញ ឯកឧត្តម សាន លុច អគ្គនាយកក្រុមហ៊ុនអង្គរដេលីហ្វូដ បានឱ្យដឹងថា រោងចក្រនេះ ត្រូវបានសាងសង់ឡើងស្របតាមស្តង់ដា និងភូតគាមអនាម័យខ្ពស់ ដែលអាចមានផលិតទឹកផ្លែឈើបាន១ម៉ឺន៥ពាន់កំប៉ុងក្នុងមួយម៉ោង។
ឯកឧត្តមបន្តថា ការបង្កើតរោងចក្រនេះមិនមែនសម្រាប់តែផ្គត់ផ្គង់លើទីផ្សារក្នុងស្រុកប៉ុណ្ណោះទេ តែក្រុមហ៊ុនក៏មានបំណងនាំចេញទៅកាន់បណ្ដាប្រទេសជាច្រើនទៀត ដើម្បីបញ្ជាក់អោយបរទេសដឹងថា ពេលនេះ ជនជាតិខ្មែរក៏អាចផលិតបាននូវផលិតផលនានា និងអាចប្រកួតប្រជែងជាមួយបណ្ដាប្រទេសទាំងនោះបានផងដែរ ។
មិនតែប៉ុណ្ណោះ ការបង្កើតរោងចក្រផលិតទឹកផ្លែឈើនេះ បានបង្កើតការងារជូនប្រជាពលរដ្ឋជាច្រើនរយនាក់ ឲ្យមានការងារ ក្រោមការបណ្ដុះបណ្ដាលជំនាញថ្មីៗពីក្រុមហ៊ុនផងដែរ ។
លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ដែលបានអញ្ជើញចូលរួមក្នុងពិធីសម្ពោធរោងចក្រផលិតទឹកផ្លែឈើ អង្គរ ដេលីហ្វូដ បានឲ្យដឹងថា ការដាក់ដំណើរការរោងចក្រផលិតទឹកផ្លែឈើមួយនេះ នឹងជួយជំរុញកំណើនសេដ្ឋកិច្ចកម្ពុជាបានមួយចំណែកទៀត ក្នុងនោះវានឹងចូលរួមក្នុងការអភិវឌ្ឍវិស័យឧស្សាហកម្ម នៅក្នុងប្រទេសកម្ពុជា ហើយក៏បានបញ្ជាក់ពីការរីកចម្រើនពោរពេញដោយសមត្ថភាពដែលកម្ពុជាចាប់ផ្ដើមផលិតបាននូវផលិតផលប្រើប្រាស់ជាបន្តបន្ទាប់ដោយខ្លួនឯង ។
លោកជំទាវបន្តថា រោងចក្រមួយនេះ នឹងផ្ដល់ការងារជាច្រើនដល់ប្រជាពលរដ្ឋកម្ពុជា ដោយមានការងារធ្វើ និងកាត់បន្ថយការធ្វើចំណាកស្រុកទៅកាន់ប្រទេសជិតខាង ។ លោកជំទាវក៏បានអំពាវនាវដល់វិនិយោគិនក្នុងស្រុកដទៃទៀតចូលរួមអភិវឌ្ឍន៍ ក្នុងវិស័យឧស្សាហកម្មក្នុងប្រទេសកម្ពុជាឱ្យបានកាន់តែច្រើន និងប្រកបដោយគុណភាព ដើម្បីចូលរួមអភិវឌ្ឍន៍សេដ្ឋកិច្ចជាតិ។
គួរបញ្ជាក់ថាផងដែរថា កាលពីរាត្រីថ្ងៃទី២៨ តុលា ២០១៧ ក្រុមហ៊ុនអង្គរដេលីហ្វូដ ក៏បានជប់លៀងអបអរសាទរស្វាគមន៍ដៃគូរចែកចាយរបស់ខ្លួន នៅទូទាំងប្រទេស ដើម្បីពង្រីការចែកចាយរបស់ខ្លួន ឲ្យដល់ប្រជាពលរដ្ឋកម្ពុជា និងត្រៀមខ្លួនដើម្បីនាំចេញទៅក្រៅប្រទេស ។ ក្នុងនោះដែរ ដៃគូរចែកចាយនៃផលិតផលទឹកផ្លែឈើអង្គរដេលីហ្វូដបានកោតសរសើរពីរសជាតិនៃផលិតផលទឹកផ្លែឈើថ្មីនេះ ហើយសង្ឃឹមថា នឹងមានការគាំទ្រច្រើនពីប្រជាពលរដ្ឋនៅក្នុងប្រទេសកម្ពុជា ៕
ចែករំលែកព័តមាននេះ