ខេត្តបាត់ដំបង ៖ សេចក្ដីរាយការណ៍បានឲ្យដឹងថា កម្លាំងអធិការក្រុងបាត់ដំបង បានចុះបង្ក្រាបទីតាំងល្បែងអាប៉ោងមួយកន្លែង កាលពីរសៀលថ្ងៃទី២៣ តុលា នេះ ស្ថិតនៅក្នុងភូមិចំការសំរោង១ សង្កាត់ចំការសំរោង ក្រុងបាត់ដំបង ដោយបានឃាត់ខ្លួនអ្នកលេងចំនួន១០នាក់ និងវត្ថុតាងមួយចំនួនផង ។
សេចក្ដីរាយការណ៍បានឲ្យដឹងទៀតថា ម្ចាស់ទីតាំងខាងលើឈ្មោះសោម ដាវី ភេទស្រីអាយុ៣២ឆ្នាំ ដែលបានបើកដំណើរការល្បែងអាប៉ោងនេះ ច្រើនឆ្នាំហើយ។ ជាមួយនិងការបង្ក្រាបនេះ សមត្ថកិច្ចបានឃាត់ខ្លួនអ្នកលេង១០នាក់ ក្នុងនោះស្រីចំនួន៦នាក់រាប់ទាំងម្ចាស់ផ្ទះផង។ ក្រៅពីឃាត់ខ្លួនអ្នកលេងនិងម្ចាស់ផ្ទះ សមត្ថកិច្ចដកហូតវត្ថុតាងរួមមាន មេអាប៉ោង៧គ្រាប់, កម្រាល, ចានអាប៉ោង, តុ កៅអី, លុយ និងម៉ូតូ៣គ្រឿង។
បើតាមប្រភពព័ត៌មានបានឲ្យដឹងងថា ទីតាំងនេះបើកលេងយូរហើយ ហើយក៏មានការបង់សំណែនឲ្យសមត្ថកិច្ចគ្រប់ស្ថាប័ន រួមទាំងអ្នកសារព័ត៌មានរាប់សិបនាក់ នៅក្នុងខេត្តផង ក៏ធ្លាប់ទទូលបានសំណែនពីបនល្បែងនេះដែរ។ ប៉ុន្តែការបង្ក្រាបនេះ គឺធ្វើឡើងទាំងការបង្ខំចិត្ត ក្រោយពីមានការដាក់សម្ពាធខ្លាំងពីលោកស្នងការខេត្ត ដែលទើបចូលកាន់តំណែងថ្មី។
បើតាមមន្ត្រីជំនាញបានបញ្ជាក់ថា ពេលនេះ សមត្ថកិច្ចបានប្រមូលវត្ថុតាង និងនាំខ្លួនក្រុមអ្នកលេងល្បែងទាំងនោះ មកដល់អធិការក្រុងហើយ ដើម្បីសួរនាំ មុនពេលបញ្ជូនទៅកាន់ស្នងការខេត្ត ដើម្បីចាត់វិធានការបន្ត។
ប្រភពចុងក្រោយបានឱ្យដឹងថា ខណៈនេះ កំពុងតែមានអ្នករត់ការសស្រាក់សស្រាំ ដើម្បីសុំដោះលែងជាបណ្តើរៗហើយ រួមទាំងកូនស្រីម្ចាស់ផ្ទះផងដែរ ។
ចែករំលែកព័តមាននេះ