រាជធានីភ្នំពេញ ៖ ពលរដ្ឋនៅរាជធានីភាគច្រើនជាអ្នកធ្វើការ និងរវល់ជាមួយការងារ ដែលមិនអាចត្រឡប់ទៅចម្អិនអាហារសម្រាប់ទទួលទានពេលថ្ងៃត្រង់ទេ ។ ពួកគេភាគច្រើនត្រូវស្វែងរកអាហារតាមហាងនានាដើម្បីទទួលទានឲ្យទាន់ពេលវេលាចូលធ្វើការវិញ ។ ក្នុងចំណោមពលរដ្ឋធ្វើការងារទាំងនោះ មិនមែនសុទ្ធតែមានប្រាក់ខែខ្ពស់ទាំងអស់ទេ មានអ្នកខ្លះប្រាក់ខែតិច អ្នកខ្លះប្រាក់ខែច្រើនទៅតាមជំនាញ និងសមត្ថភាពរៀងៗខ្លួន ដូចនេះ ការទទួលទានអាហារ ក៏ខុសៗគ្នាដែរ ។
ដោយឡែក អាហារនៅតាមចិញ្ចើមផ្លូវវិញ កន្លែងខ្លះក៏បានគិតគូរពីអនាម័យ ឯហាងខ្លះទៀតក៏មិនសូវមានអនាម័យ ដែលជាការព្រួយបារម្ភមួយសម្រាប់អ្នកបរិភោគ ។ រៀងរាល់ថ្ងៃធ្វើការ ចាប់ពីម៉ោង១១ ទៅ១២ថ្ងៃត្រង់ ជាពេលសម្រាកសម្រាប់កម្មករនិយោជិតស្វែងរកអាហារទទួលទានថ្ងៃត្រង់ ។ បើក្រឡេកទៅមើលកម្មករ កម្មការិនីនៅតាមបណ្ដារោងចក្រ ពួកគាត់ហាក់ដូចជាប្រញាប់ប្រញាល់ទិញម្ហូបតាមចិញ្ចឹមផ្លូវ និងខ្លះទៀតបរិភោគនៅហាងនោះផ្ទាល់តែម្ដង ។ នេះក៏ជាបញ្ហាមួយ ខណៈការលក់ចំណីអាហាររបស់ពួកគាត់នៅជាប់នឹងផ្លូវ ដែលមានដីហុយផងនោះ ។
ជឿន ម៉ាឡៃ កម្មការិនីរោងចក្រមួយរូប តែងតែទិញម្ហូបពីតូបអាហារមួយនៅក្បែររោងចក្រនាងធ្វើការ ហើយត្រឡប់ទៅផ្ទះជួល បាននិយាយថា នាងគ្មានពេលចម្អិនអាហារសម្រាប់ទទួលទានថ្ងៃត្រង់ទេ ។ ដូចនេះ នាងត្រូវទិញម្ហូបអាហារស្រាប់ដែលដាក់លក់ក្បែររោងចក្រទៅហូបនៅផ្ទះ ជាមួយបាយដាំទុកពីព្រឹក ។
នាងថា ៖« នៅថ្ងៃធ្វើការ ខ្ញុំអត់មានពេលចម្អិនអាហារពេលថ្ងៃត្រង់ទេ អីចឹង ខ្ញុំត្រូវទិញម្ហូបទៅហូបបាយដែលដាំទុកនៅផ្ទះមុននឹងចេញទៅធ្វើការ ហើយបាយក៏មិនកកដែរ ព្រោះដាំឆ្នាំងភ្លើង » ។
នាងបន្តថា តាមពិត នាងក៏មិនចង់ទិញអាហារស្រាប់ទៅបរិភោគដែរ ប៉ុន្តែមិនដឹងធ្វើម៉េច បើអត់មានពេល ហើយម្ហូបដែលនាងទិញទៅបរិភោគនោះ ក៏បានជ្រើសរើសមើលតូបអាហារណាមានអនាម័យ និងទុកដាក់ត្រឹមត្រូវ ដូចជា មានគម្រប ស្បៃ ឬគ្របប្លាស្ទិកត្រឹមត្រូវ។ នាងនិយាយថា ៖« ម្ហូបដែលពួកខ្ញុំទិញទៅហូប មិនដែលបង្កបញ្ហាអីដល់ខ្ញុំទេ ព្រោះពេលទិញទៅយើងមើលដែរ ម្ហូបហ្នឹងគេធ្វើយូរហើយ ឬទើបនឹងធ្វើ ហើយវាអស់តិចទៀត ។ ទោះបីយ៉ាងណា ខ្ញុំក៏បារម្ភដែរ មិនដឹងជាគេលាងស្អាត ឬក៏មានអនាម័យក្នុងការចម្អិនគ្រប់គ្រាន់ដែរឬទេ » ។
លោក និន សុខលី ជាបុគ្គលិកក្រុមហ៊ុនមួយនៅរាជធានីភ្នំពេញ បានឱ្យដឹងថា លោកមិនដែលចម្អិនអាហារថ្ងៃត្រង់នៅផ្ទះទេ ព្រោះបើទៅចម្អិនអាហារ និងទទួលទាននៅផ្ទះ ត្រូវចំណាយពេលយូរ ហើយស្ទះចរាចរណ៍ក្តៅទៀត ប៉ុន្តែបើទទួលទានអាហារថ្ងៃត្រង់នៅហាងជិតកន្លែងធ្វើការ គឺអាចឲ្យលោកបានសម្រាកខ្លះមុនពេលចាប់ផ្ដើមបំពេញការងារជាថ្មី ។
លោកបន្តថា រៀងរាល់ថ្ងៃ លោកទទួលទានអាហារថ្ងៃត្រង់នៅខាងក្រៅ ហើយពេលខ្លះក៏ចូលហាងល្អៗមានម៉ាស៊ីនត្រជាក់ និងស្ដង់ដាត្រឹមត្រូវ ពេលខ្លះទៀត លោកចូលហាងធម្មតាតាមផ្លូវ ដែលមានតម្លៃសមរម្យ ។ លោកថា ៖«អ្នកណាៗក៏ចង់ចូលហាងល្អមានម៉ាស៊ីនត្រជាក់ដែរ តែអ្វីដែលសំខាន់នោះ គឺលទ្ធភាពរបស់យើង។ ពេលខ្លះមានលុយច្រើន ក៏ចូលហាងថ្លៃ មានម៉ាស៊ីនត្រជាក់ តែពេលខ្លះ មិនសូវមានលុយច្រើន ក៏ចូលហាងតាមផ្លូវសម្រាប់អ្នកចំណូលមធ្យម ដែលមានតម្លៃចន្លោះពី៤ ទៅ៦ពាន់រៀល។
ដូចនេះ យើងអាចសល់លុយបានខ្លះសម្រាប់ដោះស្រាយតម្រូវការផ្សេងៗ តែបើសិនជាចូលតែហាងថ្លៃៗ គួបផ្សំនឹងប្រាក់ខែមិនសូវខ្ពស់ផងនោះ ពេលដាច់ខែម្ដងៗគ្មានអ្វីនៅសេសសល់ទេ » ។
លោកបន្ថែមថា អ្វីដែលព្រួយបារម្ភចំពោះហាងអាហារនៅតាមផ្លូវនោះ គឺខ្លាចតែមិនសូវមានអនាម័យ ដូចជា យកបន្លែ និងសាច់អន់ៗមកចម្អិន ប៉ុន្តែវាក៏មិនដែលបង្កបញ្ហាអ្វីដល់សុខភាព ដូចជា រាគរូស និងឈឺពោះអីដែរ ព្រោះហាងអាហារតាមផ្លូវដែលលោកចូលនោះ មើលទៅមានការរៀបចំត្រឹមត្រូវ បើទោះបីជាមិនស្អាតដូចហាងថ្លៃៗក៏ដោយ។
គួរបញ្ជាក់ថា ទោះបីជាអ្នកខ្លះថា ហាងអាហារតាមចិញ្ចើមផ្លូវសម្រាប់អ្នកមានចំណូលទាបក៏ដោយ ប៉ុន្តែបើសិនជារៀបចំត្រឹមត្រូវ នឹងមានការគាំទ្រពីមនុស្សជាច្រើន ។ អ្នកលក់ខ្លះមានគំនិតអគតិ និងអត់សីលធម៌ ដោយគិតថា ខ្លួនមិនមែនជាអ្នកបរិភោគ ពួកគេចង់ធ្វើម្ហូបយ៉ាងម៉េចក៏បាន ។ ជាក់ស្ដែង មានអ្នកលក់ខ្លះធ្វើម្ហូបលក់ ប៉ុន្តែមិនហ៊ានបរិភោគម្ហូបដែលខ្លួនធ្វើទេ បែរជាទៅទិញម្ហូបពីហាងដទៃទៅវិញ ។ ដូចនេះ ការគិតគូរពីសុខភាពអ្នកដទៃ ក៏ដូចជាគិតគូរពីសុខភាពខ្លួនយើងផងដែរ ៕
ចែករំលែកព័តមាននេះ