ខេត្តកំពង់ចាម ៖ អ្នកធ្វើដំណើរតាមម៉ូតូ និងរថយន្តនាំគ្នាភ្ញាក់ផ្អើល នៅលើស្ពានគីហ្ស៊ុណាចំណុចសសរប៉េ១០និង១១ ដែលស្ថិតនៅក្នុងសង្កាត់វាលវង់ ក្រុងកំពង់ចាម នៅវេលាម៉ោង៧ព្រឹកថ្ងៃទី២០ តុលា ដោយសារបានឃើញរថយន្ត១គ្រឿងដឹកទឹកបរិសុទ្ធពាក់ផ្លាកលេខកំពង់ចាម…
ខេត្តកំពង់ចាម ៖ អ្នកធ្វើដំណើរតាមម៉ូតូ និងរថយន្តនាំគ្នាភ្ញាក់ផ្អើល នៅលើស្ពានគីហ្ស៊ុណាចំណុចសសរប៉េ១០និង១១ ដែលស្ថិតនៅក្នុងសង្កាត់វាលវង់ ក្រុងកំពង់ចាម នៅវេលាម៉ោង៧ព្រឹកថ្ងៃទី២០ តុលា ដោយសារបានឃើញរថយន្ត១គ្រឿងដឹកទឹកបរិសុទ្ធពាក់ផ្លាកលេខកំពង់ចាម ២A-៧៧២១ មកឈប់លើស្ពានហើយគេបានឃើញបុរសម្នាក់ អោបកូនប្រុសតូចអាយុ២ឆ្នាំកន្លះ ឡើងលើបង្កាន់ដៃស្ពានហើយលោតទឹកទន្លេធ្វើអត្តឃាត ។
នេះជាហេតុការណ៍គួរឱ្យរន្ធត់ចិត្ត និងចម្លែកបំផុត ហើយក៏មិនធ្លាប់មានអ្នកធ្វើអត្តឃាតយកកូន មកលោតទឹកស្លាប់ជាមួយខ្លួនបែបនេះទេ ។ ក្នុងហេតុការណ៍នេះក៏ត្រូវបានអ្នកនេសាទក្បែរស្ពានចេញទូកទៅជួយស្រង់បុរសដែលលោតទឹកបានភ្លាមៗផងដែរ តែសម្រាប់កូនតូចដែលបុរសជាឪពុកអោបលោតទឹកជាមួយគ្នានោះ បានបាត់នៅក្នុងទឹកទន្លេដ៏ធំល្វឹងល្វើយនោះទៅហើយ ។ ពិតជាគួរឱ្យរន្ធត់ចិត្តពន់ពេកណាស់ដែលសាធារណជនបានថ្កោលទោសភ្លាមៗដល់ជនអគតិជាឪពុកដែលចង់ងាប់ខ្លួនឯងយកកូនមកលោតទឹកជាមួយនឹងខ្លួន តើគ្នាមានកំហុសអ្វី ?
លោកវរសេនីយ៍ត្រី រស់ ម៉ុងសេង អធិការនគរបាលស្តីទីក្រុងកំពង់ចាម ប្រាប់ឱ្យដឹងថា បុរសរូបនេះឈ្មោះ ស៊ូ សានិត អាយុ២២ឆ្នាំ រស់នៅភូមិទួលវិហារ ឃុំជីរោទ៏ទី២ ស្រុកត្បូងឃ្មុំ ខេត្តត្បូងឃ្មុំ បានបើករថយន្តដឹកទឹកបរិសុទ្ធចេញពីត្រើយខាងកើតឆ្ពោះមកលិច។ លុះពេលមកដល់លើស្ពាន ក៏បានឈប់រថយន្តអែបខាង ហើយបានអោបកូនប្រុសតូចឈ្មោះ ស៊ូ ថានុ អាយុ២ឆ្នាំកន្លះ ចុះពីលើរថយន្តបានបន្លែងគ្នាជាមួយនឹងកូនប្រហែលជា៥នាទី បន្ទាប់មកក៏បានឡើងលើបង្កាន់ដៃស្ពានលោតចូលទៅក្នុងទឹកទន្លេមេគង្គ ដែលកំពុងតែហូរលិចទាំងឪពុកនិងកូនតូចនោះ ។
បន្តិចក្រោយមកឃើញឪពុកផុសអណ្តែតឡើងទំនងខ្លាចងាប់បានប្រឹងហែលចុះទៅតាមខ្សែទឹក ក៏មានទូកអ្នកនេសាទបានឃើញ ក៏ចាប់លើកដាក់លើទូកបើកមកច្រាំងទន្លេ ត្រើយទន្លេបិទ ។ ចំណែកកូនតូចបានលិចបាត់រសាត់តាមខ្សែទឹកមិនអាចជួយស្រោចស្រង់អាយុជីវិតបានទេ ។ បុរសជាឪពុកត្រូវបានសមត្ថកិច្ចដឹកមកសួរនាំនៅអធិការដ្ឋាននគរបាលក្រុងកំពង់ចាម ។
ឈ្មោះ ស៊ូ សានិត បានឆ្លើយបំភ្លឺប្រាប់សមត្ថកិច្ចថា ការអោបកូនលោតទឹកនោះមិនមែនជាការធ្វើអត្តឃាតនោះទេ ។ គាត់បាននិយាយយោងទៅលើហេតុការណ៍ផ្សេង ដែលមិនអាចយល់បាន គឺ១ខែមុននេះរូបគេបានដឹកទឹកបរិសុទ្ធយកទៅលក់ដល់ខេត្តស្ទឹងត្រែង ។ លុះពេលត្រឡប់មកវិញ ក៏ចេះតែមានអាការឈឺក្បាល និងបានប្រាប់ប្រពន្ធឱ្យដឹងផងដែរ តែមិនបានទៅឱ្យគ្រូពេទ្យពិនិត្យនោះទេ ។ រហូតមកដល់ព្រឹកថ្ងៃទី២០ តុលា បានបើករថយន្តចេញមកដោយមានកម្មករពីរនាក់មកជាមួយ ។ គាត់និយាយថា ស្របពេលដែលបើករថយន្តមិនដឹងបើកមកដល់ត្រង់ណាទេ នៅលើស្ពានគីហ្ស៊ុណា ហើយមិនដឹងថាធ្វើអ្វីថែមទៀតផង ។ ស្របពេលដែលដឹងខ្លួនគឺនៅក្នុងទឹកទន្លេមេគង្គ និងមានការភិតភ័យស្រវេស្រវ៉ាហែល បន្ទាប់មកមានទូកអ្នកនេសាទបានមកជួយរូបគេ ។ គាត់ថាមិនដឹងថាអោបកូនលោតទឹកពីលើស្ពាននោះទេ ។
ស្ត្រីឈ្មោះ ខុន ស្រីនិត អាយុ២២ឆ្នាំ ជាប្រពន្ធដែលប៉ូលិសហៅមកសួរនាំបានប្រាប់ឱ្យដឹងថានៅពេលមុនកើតហេតុព្រឹកថ្ងៃទី២០ តុលា នាងនិងប្តីមិនបានឈ្លោះប្រកែកគ្នានោះទេ ហើយបានយកកូនតូចអាយុ២ឆ្នាំកន្លះទៅជាមួយ ជិះតាមរថយន្តដោយប្រាប់ថាទៅហូបគុយទាវ ។ ពេលចេញផុតពីផ្ទះមិនបានប៉ុន្មានផងស្រាប់តែមានគេទូរស័ព្ទប្រាប់ថា ប្តីបានបីកូនតូចលោតទឹកសម្លាប់ខ្លួនពីលើស្ពានគីហ្ស៊ុណាបាត់ទៅហើយ ។
ចំពោះការរៀបរាប់ប្រាប់ប៉ូលិសពីសំណាក់បុរសជាឪពុកនេះ មិនដឹងថាតើវាអាចកើតរឿងខ្មោចនាំបែបនេះ ឬយ៉ាងណានោះទេ ។ ទោះជាយ៉ាងណា ពិតជាអាណិតក្មេងតូចដែលជាកូនគឺគ្នាគ្មានកំហុសអ្វីទាំងអស់ បែរជាស្លាប់យ៉ាងអាណោចអាធ័មនៅក្នុងទឹកមិនទាន់រកឃើញនៅឡើយទេ ។ មន្ត្រីប៉ូលិសបានឱ្យដឹងថា សមត្ថកិច្ចមិនបានឃាត់ខ្លួនបុរសជាឪពុកនោះទេ ដែលក្រោយពីសាកសួរធ្វើកំណត់ហេតុហើយ ក៏បានឱ្យវិលត្រឡប់ទៅផ្ទះជាមួយប្រពន្ធវិញ ដើម្បីតាមរកសពកូនតូចដែលជាកូនដំបូង(ទី១)របស់ពួកគេ មិនដឹងថារសាត់តាមខ្សែទឹកដល់ទីណាទេ ៕
ចែករំលែកព័តមាននេះ