រាជធានីភ្នំពេញ ៖ លោកម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញ បានឱ្យកោះសន្តិភាពដឹងតាមរយៈទូរស័ព្ទនាថ្ងៃទី២៤ កញ្ញា នេះថា នៅរាជធានីភ្នំពេញ កម្ពស់ជំនន់ទឹកទន្លេហាក់ឡើងយឺត និងទាបជាងឆ្នាំកន្លងទៅជាង២ម៉ែត្រ ។ ឆ្នាំកន្លងទៅគឺនៅថ្ងៃទី២៤ កញ្ញា ២០១១ កម្ពស់ទឹកទន្លេនៅស្ថានីយចតុមុខកម្ពស់ទឹកទន្លេ១០,៤៣ម៉ែត្រ ចំណែកថ្ងៃខែដូចគ្នាឆ្នាំ២០១២ នេះទឹកទន្លេមានកម្ពស់៨,៤៣ម៉ែត្រ មានន័យថា កម្ពស់ទឹកឆ្នាំនេះទាបជាងឆ្នាំទៅ២ម៉ែត្រ ក៏ប៉ុន្តែទោះជាយ៉ាងណាកម្ពស់ទឹកទន្លេបានបន្តឡើងជារៀងរាល់ថ្ងៃក្នុងមួយថ្ងៃទឹកឡើង២សង់ទីម៉ែត្រ ចំណែកឯទឹកដែលត្រូវស្រកទៅវិញក្នុងអំឡុងចុងខែ១០ និងដើមខែ១១ គឺចាប់ផ្តើមស្រកជាបន្តបន្ទាប់ ។ ប៉ុន្តែទោះជាយ៉ាងណាបញ្ហាទឹកជំនន់គេមិនអាចទស្សន៍ទាយវាស់ស្ទង់ និងកំណត់ឱ្យបានជាក់លាស់នោះទេ ។
លោកម៉ៅ ប៊ុនធឿន បានឱ្យដឹងទៀតថា សម្រាប់រាជធានីភ្នំពេញ កម្រិតទឹកដែលត្រូវប្រកាសអាសន្នមានកម្ពស់១០,៥០ម៉ែត្រ ។ ទោះជាកម្រិតទឹកនៅទាបក្តី តែអាជ្ញាធររាជធានីភ្នំពេញ គ្រប់លំដាប់ថ្នាក់នៅតែមានការប្រុងប្រយ័ត្នខ្ពស់ក្នុងវិធានការទុកជាមុនក្នុងនោះមានមន្ទីរធនធានទឹក និងឧតុនិយមក៏បានត្រៀមលក្ខណៈ ដូចជា បាវ ការ៉ុង ដីខ្សាច់ គ្រឿងចក្រ ជាដើម ។ ហើយជាពិសេសទៅទៀតនោះពេលនេះមន្ទីរធនធានទឹក និងឧតុនិយមដោយមានការណែនាំយ៉ាងយកចិត្តទុកដាក់ពីរដ្ឋមន្ត្រីក្រសួងធនធានទឹក និងលោកកែប ជុតិមា អភិបាលរាជធានីភ្នំពេញ បានចាត់មន្ត្រីយាមកាមប្រចាំការជាប្រចាំនៅតាមទ្វារទឹកចំនួន១៣កន្លែង ដែលជាច្រកទ្វារទឹកចេញ-ចូលពីទន្លេ ព្រែក បឹង និងស្ទឹង ប្រឡាយ លូជាដើម នៅក្នុងខណ្ឌមានជ័យ ដង្កោ សែនសុខ និងខណ្ឌឫស្សីកែវ ឬតំបន់ជុំវិញរាជធានីភ្នំពេញ ដើម្បីត្រៀមបិទ និងបើក ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ