រាជធានីភ្នំពេញ ៖ ម៉ែយ៉ែមថ្នាក់ទាប២នាក់ផ្សេងទៀតកាលពី ថ្ងៃទី២១ កញ្ញា កន្លងមកនេះ ត្រូវនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជន ក្រសួងមហាផ្ទៃ ចាប់ខ្លួនបញ្ជូនទៅសាលាដំបូងរាជធានី ពីបទជាប់ពាក់ព័ន្ធនឹងការជួញដូរមនុស្សដើម្បីបម្រើសេវាផ្លូវភេទ ។ ម៉ែយ៉ែមទាំង២នាក់នេះម្នាក់ឈ្មោះ ជុំ ស្រីម៉ុច អាយុ២៨ឆ្នាំ មានស្រុកកំណើតនៅស្រុកសិរីសោភ័ណ ខេត្តបន្ទាយមានជ័យ បច្ចុប្បន្នស្នាក់នៅផ្ទះជួល ផ្លូវលេខ៦៣ សង្កាត់បឹងរាំង ខណ្ឌដូនពេញ និងម្នាក់ទៀត ឈ្មោះ ទិត្យ ហ៊ុន អាយុ៤៧ឆ្នាំ ស្រុកកំណើតនៅភូមិតាមុំ ឃុំពោធិ៍រាជ ស្រុកស្វាយជ្រំ ខេត្តស្វាយរៀង បច្ចុប្បន្នស្នាក់នៅផ្ទះជួល លេខ១៦៩ សង្កាត់ទឹកថ្លា ខណ្ឌសែនសុខ ។
ការចាប់ខ្លួនម៉ែយ៉ែម២នាក់ខាងលើនេះត្រូវបាន លោកឧត្តមសេនីយ៍ឯក ប៊ិត គឹមហុង ប្រធាននាយកដ្ឋាននគរបាលប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃឱ្យដឹងថា យោងតាមបទបញ្ជារបស់អគ្គស្នងការនគរបាលជាតិកាលពីថ្ងៃទី២៩ សីហា និងមានការណែនាំពីលោកឧត្តមសេនីយ៍ឯកកង សុខន អគ្គស្នងការរង លោកជំទាវឧត្តមសេនីយ៍ យក់ សុខា អគ្គស្នងការរងទទួលផែនយុត្តិធម៌ និងប្រឆាំងការជួញដូរមនុស្ស និងការពារអនីតិជន ។
ដោយមានការចង្អុលបង្ហាញពី លោកឧត្តមសេនីយ៍ឯកម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ បានចាត់តាំងលោកឧត្តមសេនីយ៍ត្រីទែន បូរ៉ានី អនុប្រធាននាយកដ្ឋាន ដឹកនាំកម្លាំងចុះបង្ក្រាបបទល្មើសជាក់ស្តែង ដែលមានម៉ែយ៉ែម២នាក់ប្រកបមុខរបររកស៊ីជួញដូរមនុស្សដើម្បីបម្រើសេវាផ្លូវភេទ ។ ការចាប់ខ្លួននេះ ក៏មានការសម្របសម្រួលពីសំណាក់ស្ថាប័នអយ្យការអមសាលាដំបូង រាជធានីភ្នំពេញចូលរួមផងដែរ ។
លោកឧត្តមសេនីយ៍ឯកប៊ិត គឹមហុង បន្តថា កិច្ចប្រតិបត្តិការបង្ក្រាបករណីជួញដូរមនុស្សបម្រើផ្លូវភេទនិងឈានទៅដល់ការឃាត់ខ្លួនម៉ែយ៉ែម២នាក់ខាងលើនេះ បានធ្វើឡើង២ទីតាំងខុសគ្នា ដែលឈ្មោះ ជុំ ស្រីម៉ុច ឃាត់ខ្លួននៅផ្ទះសំណាក់ទឹកមាស តាមបណ្តោយផ្លូវជាតិលេខ៦A សង្កាត់ជ្រោយចង្វា ខណ្ឌឫស្សីកែវ និងរំដោះ នារីរងគ្រោះបាន២នាក់ ។ ឯឈ្មោះ ទិត្យ ហ៊ុន ចាប់ខ្លួននៅសណ្ឋាគារម៉ូណាកូ ស្ថិតនៅសង្កាត់ផ្សារដេប៉ូ១ ខណ្ឌទួលគោក រំដោះនារីវ័យក្មេងបាន២នាក់ដែរ សរុបស្រីស្អាតរងគ្រោះដែលបានសង្គ្រោះមាន៤នាក់ ។ ការបង្ក្រាបនឹងឈានដល់ឃាត់ខ្លួនជនសង្ស័យ២នាក់ខាងលើគឺជាបទល្មើសជាក់ស្តែង ខណៈដែលម៉ែយ៉ែមបានយក នារីស្អាតៗទាំង៤នាក់ទៅដាក់ឱ្យម៉ូយតាមការណាត់ដើម្បីបម្រើផ្លូវភេទ ។
លោកឧត្តមសេនីយ៍ឯកបន្តទៀតថា មុននឹងបង្ក្រាបឃាត់ខ្លួនបានជនសង្ស័យ សមត្ថកិច្ចត្រូវការចំណាយពេលវេលាជាយូរមកហើយដែរ ។ ក្រោយពីឃាត់ខ្លួន ម៉ែយ៉ែមទាំង២នាក់ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធីច្បាប់ ។ ចំណែកនារីរងគ្រោះ៤នាក់ក្នុងនោះមានអនីតិជនម្នាក់ផងបានឱ្យវិលត្រឡប់ទៅផ្ទះវិញ ក្រោយពេលណែនាំអប់រំរួច ។
ក្នុងនាមនាយកដ្ឋានប្រឆាំងការជួញដូរមនុស្ស និងការពារអនីតិជនលោកឧត្តមសេនីយ៍ឯក ប៊ិត គឹមហុង បានអំពាវនាវដល់បងប្អូនប្រជាពលរដ្ឋ សូមឱ្យចូលរួមសហការជាមួយសមត្ថកិច្ចជួយផ្តល់ព័ត៌មាន បើបានដឹងឬរងគ្រោះដូចករណីខាងលើនេះតាមរយៈទូរស័ព្ទលេខ ១២៨៨ឬ០២៣ ៩៩៧ ៩១៩។
នេះជាការបង្ក្រាបមួួយថ្មីទៀតប្រឆាំងនឹងមុខរបរ«ដឹកញីបន្ស៊ីឈ្មោល»បន្ទាប់ពីថៅកែហាងកែសម្ភស្សល្បីមួយនៅរាជធានីភ្នំពេញត្រូវបានចាប់ខ្លួនក្នុងមុខរបរនាំស្រីស្អាតថ្នាក់តារា និងនារីក្រមុំព្រហ្មចារីជូនតាតាតាមការកុម្មង់ ដែលជាអ្នកមានលុយរាប់ពាន់ដុល្លារទិញយកទៅត្រេកត្រអាលផ្លូវភេទរបស់ខ្លួន ។ ថៅកែហាងកែសម្ផស្សមីកាសារូបនេះត្រូវបានចោទប្រកាន់ពីបទសញ្ចារកម្ម ។ ចំណែកស្រ្តី២នាក់នេះជាម៉ែយ៉ែមថ្នាក់ទាប អាចរកនារីធម្មតាៗ មិនអាចទាក់ទងដល់ថ្នាក់តារាបានទេ ហើយក៏មិនអាចមានម៉ូយថ្នាក់ខ្ពស់ៗដែរ ៕
ចែករំលែកព័តមាននេះ