រាជធានីភ្នំពេញ ៖ គម្រោងបើកការប្រកួតហែលទឹកក្នុងកម្រិតយុវវ័យដែលធ្លាប់លើកឡើងអស់រយៈពេលជាច្រើនខែមកនោះនឹងលេចចេញជារូបរាងក្នុងពេលដ៏ខ្លីខាងមុខ ។ មន្ត្រីជាន់ខ្ពស់ប្រចាំសហព័ន្ធបានអះអាងថា នេះជាព្រឹត្តិការណ៍ដំបូងបំផុតដែលផ្តល់ឱកាសឱ្យតែយុវជនដែលមានអាយុចន្លោះពី១១ឆ្នាំដល់១៧ឆ្នាំប្រកួតដណ្តើមមេដាយ និងប្រាក់រង្វាន់ដោយមិនភ័យរឿងប៉ះជាមួយក្រុមជម្រើសជាតិខ្លាំងដូចការប្រកួតលើកមុនឡើយ ។
លោកហែម ថុន ប្រធានសហព័ន្ធខ្មែរកីឡាហែលទឹកស្ម័គ្រចិត្តបានប្រាប់កោះសន្តិភាពពាក់ព័ន្ធនឹងគម្រោងប្រកួតនេះថា ការប្រកួតនេះមានឈ្មោះថា «ការប្រកួតជ្រើសរើសជើងឯកហែលទឹកយុវជនទូទាំងប្រទេសឆ្នាំ២០១២» ដោយមិនមានលក្ខណៈប្រកួតបែបសេរីចម្រុះដោយកីឡាករ កីឡាការិនីជើងចាស់ដែលមានអាយុចាស់ៗនោះឡើយ ។ ទោះបីជាយ៉ាងណា វេទិកានោះក៏រៀបចំឱ្យមានការប្រកួតដណ្តើមប្រាក់រង្វាន់សម្រាប់កីឡាករ កីឡាការិនីដែលលើសអាយុ១៧ឆ្នាំផងដែរ ដើម្បីលើកទឹកចិត្តដល់ពួកគេឱ្យចូលរួមប្រកួតប្រជែងកុំឱ្យស្ងប់ស្ងាត់សកម្មភាពហែលទឹកក្នុងស្រុក ។ លោករំពឹងថា យុវជនយ៉ាងហោចណាស់ជាង១០០នាក់នៅទូទាំងប្រទេសនឹងចូលរួមក្នុងការប្រកួតបើកឆាកនេះ បើទោះជាមកដល់ពេលនេះនៅមិនទាន់ដឹងពីចំនួនពិតប្រាកដសម្រាប់ការរៀបចំប្រកួតជាផ្លូវការនោះក៏ដោយ ។
ពាក់ព័ន្ធនឹងការចូលរួមប្រកួតនេះវិញ លោកហែម ថុន អះអាងថា ខាងសហព័ន្ធនឹងផ្តល់លទ្ធភាពឱ្យគ្រប់ក្លិបទាំងអស់ដែលមានបំណងចង់បញ្ជូនកីឡាករ កីឡាការិនីរបស់ខ្លួនមកធ្វើការប្រកួតប្រជែងឱ្យទទួលសិទ្ធិជាអាទិភាពតែម្តង ដើម្បីងាយស្រួលស្វែងរកជើងខ្លាំងជាធនធានអ្នកហែលទឹកបែបយុវជនក្មេងៗ ។ ដោយឡែកចំពោះក្មេងៗដែលស្ថិតក្នុងចន្លោះអាយុដែលបានកំណត់នោះហើយមានបំណងចង់ចូលរួមប្រកួតដូចគ្នា ក៏មានសិទ្ធិមកចុះឈ្មោះចូលប្រកួតបានដោយសេរីផងដែរ ដោយពួកគេគ្រាន់តែបញ្ជាក់ការអនុញ្ញាតពីអាណាព្យាបាល ឬឪពុកម្តាយដើម្បីឱ្យខាងសហព័ន្ធបានឃើញប៉ុណ្ណោះ ។ ការប្រកួតនេះនឹងដំណើរការរយៈពេល៤ថ្ងៃ ដោយគ្រោងធ្វើចាប់ពីថ្ងៃទី២៣ រហូតដល់ថ្ងៃទី២៦ ខែតុលា ខាងមុខ ។
ដ្បិតតែពេលវេលាស្ថិតក្នុងរង្វង់១ខែ ប៉ុន្តែលោកអះអាងថា ពេលវេលានេះមិនសល់ច្រើនណាស់ណាឡើយសម្រាប់ការរៀបចំការប្រកួតហែលទឹកកម្រិតយុវជនលើកដំបូងដែលមានទ្រង់ទ្រាយធំបែបនេះ អីុចឹងហើយទើបខាងសហព័ន្ធខ្មែរកីឡាហែលទឹកស្ម័គ្រចិត្តកំពុងដុតដៃដុតជើងយ៉ាងខ្លាំងទាំងក្នុងយុទ្ធនាការត្រៀមទុក និងការផ្តល់ព័ត៌មានពីការប្រកួតនេះឱ្យមានលក្ខណៈទូលំទូលាយទៅគ្រប់ក្លិបហែលទឹកនៅទូទាំងប្រទេស និងយុវជនដែលមានបំណងចង់ក្លាយជាជើងខ្លាំងផ្នែកហែលទឹក ។ ការប្រកួតនេះមានវិញ្ញាសាច្រើនបែបដូចគ្នានឹងការប្រកួតជ្រើសរើសជើងឯកប្រចាំឆ្នាំដែលធ្លាប់ធ្វើជារៀងរាល់ឆ្នាំនោះផងដែរ ដូចជាការប្រកួតហែលទឹក១០០ម៉ែត្រ រហូតដល់១.០០០ម៉ែត្រ និងការប្រកួតហែលបែបសេរី និងហែលបែបកង្កែបជាដើម ។
ទោះជាយ៉ាងណា ការប្រកួតនេះនៅមិនទាន់ប្រាកដថានឹងអាចដំណើរការតាមកាលបរិច្ឆេទកំណត់ខាងលើនៅឡើយទេ ដោយសារតែអ្វីៗនៅមិនទាន់ឆ្លងថ្នាក់លើជាគណៈកម្មាធិការជាតិអូឡាំពិកឱ្យផ្តល់ចំណារឯកភាពបាននៅឡើយ ។ ការប្រកួតនេះមានគោលបំណងតែមួយគត់ គឺស្វែងរកទំពាំងស្នងឫស្សីថ្មីៗដើម្បីត្រៀមយកមកជំនួសកីឡាករ កីឡាការិនីហែលទឹកចាស់ៗដែលនៅថ្ងៃណាមួយពួកគេនឹងចុះខ្សោយថាមពល ឬលាឈប់។ លោកមានប្រសាសន៍ដោយមានការត្រៀមទុកមុនថា កម្មវិធីនេះ ទី១ ខាងសហព័ន្ធមានបំណងបំផុសឱ្យក្មេងៗងាកមកស្រឡាញ់កីឡាហែលទឹក និងទី២ ចង់ឱ្យអ្នកមានទំនោរចិត្តទាំងនោះបានចាប់ឱកាសក្លាយជាធនធានអ្នកហែលទឹកស្រករក្រោយដើម្បីជំនួសអ្នកចាស់ៗ ។ លោកអះអាងថា បើទោះជាកីឡាករ កីឡាការិនី ហែលទឹកជើងចាស់មិនលាឈប់ពីអាជីពនេះក៏ពួកគេនឹងមិនអាចរក្សាភាពខ្លាំងរបស់ខ្លួនបានដែរ ខណៈពេលវេលាចេះតែបន្តទៅមុខ ។
អីុចឹងហេើយទើបលោកត្រូវតែជ្រើសរើសយកធនធានថ្មីៗដើម្បីុកុំឱ្យវិស័យនេះនៅនឹងថ្កល់ ឬអាចនិយាយបានថា ចេញទៅប្រកួតនៅក្រៅស្រុកលើកណាក៏មិនបានមេដាយត្រឡប់មកវិញនោះ ។ លោកយល់ថា ការប្រកួតកម្រិតយុវជនមិនធ្លាប់មានផ្នែកហែលទឹកនេះ នឹងជួយឱ្យខាងសហព័ន្ធសម្រាំងបានជើងខ្លាំងថ្មីៗដើម្បីបង្វឹកពួកគេឱ្យក្លាយជាកីឡាករជម្រើសជាតិខ្លាំងពូក ។ ជាមួយគ្នានោះ លោកមានគម្រោងបើកការប្រកួតនេះឱ្យបានទៀងទាត់រាល់ឆ្នាំ បើទោះជាម្ចាស់ឧបត្ថម្ភលើការប្រកួតនេះមិនទាន់ប្រាកដថានឹងជួយសម្រាប់ការបើកប្រកួតនៅឆ្នាំក្រោយនោះក៏ដោយ ។
មន្ត្រីជាន់ខ្ពស់ប្រចាំគណៈកម្មាធិការជាតិអូឡាំពិកដទៃទៀតបានថ្លែងបញ្ជាក់ពាក់ព័ន្ធនឹងការប្រកួតនេះថា ក្រោយការបើកប្រកួតកម្រិតយុវជនលើកទី១នេះជោគជ័យ នោះខាងសហព័ន្ធ និងគណៈកម្មាធិការជាតិអូឡាំពិកទាំងមូលពិតជាពុះពារស្វែងរកម្ចាស់ឧបត្ថម្ភថ្មីដោយមិនឱ្យកម្មវិធីនេះខកខានសម្រាប់ឆ្នាំក្រោយនោះទេ ដើម្បីលើកទឹកចិត្តយុវជនដែលមានអាយុនៅចន្លោះពី១១ឆ្នាំដល់១៧ឆ្នាំនោះឱ្យកាន់តែមានទឹកចិត្តស្រឡាញ់កីឡាហែលទឹក និងមានការចូលរួមយ៉ាងផុសផុល ៕
ចែករំលែកព័តមាននេះ