យោងតាម ប្រភពព័ត៌មាន The sun ចេញផ្សាយកាលពីថ្ងៃទី១៩ កញ្ញា ឆ្នាំ២០១២ ឱ្យដឹងថា តារាចម្រៀងរ៉េបអាមេរិកលោកកានីញេ វែស គ្រោងនឹងចំណាយប្រាក់១លានដុល្លារសម្រាប់រៀបចំខួបកំណើតឱ្យសំណព្វចិត្ត គឹម កាដាសៀន នៅខែក្រោយ ។
ប្រភពព័ត៌មានដដែលនោះបន្តឱ្យដឹងទៀតថា តារាចម្រៀងស្បែកខ្មៅវ័យ៣៥ឆ្នាំរូបនេះបានទាក់ទងជាប្រចាំជាមួយក្រុមគ្រួសាររបស់គឹម កាដាសៀន ដោយនិយាយប្រាប់ពីគម្រោងធ្វើពិធីខួបកំណើតបន្ទាប់ពីពួកគេបានរស់នៅជាមួយគ្នាអស់រយៈពេលជាច្រើនខែកន្លងមកនេះ ។
នេះគឺជាពិធីខួបកំណើតលើកទី១ដែលលោកកានីញេ វែស គ្រោងនឹងចំណាយទឹកប្រាក់ដ៏ច្រើនសន្ធឹកសន្ធាប់បែបនេះទៅលើមនុស្សដែលលោកស្រឡាញ់ ។ ទឹកប្រាក់១លានដុល្លារនេះលោកគ្រោងនឹងចំណាយទៅលើការទិញវត្ថុអនុស្សាវរីយ៍ដូចជាកាបូបដៃម៉ូដល្បីដែលមានឆ្លាក់អក្សរ KK នៅពីលើ ព្រមទាំងការចំណាយទៅលើការទិញខ្សែដៃដាំពេជ្រពណ៌ផ្កាឈូក និងសម្លៀកបំពាក់ថ្លៃៗជូនជាកាដូដើម្បីផ្គាប់ចិត្តម្ចាស់ស្នេហ៍គឹម កាដាសៀន ។
លោកកានីញេ វែស គឺជាមនុស្សចូលចិត្តចាយវាយខ្ជះខ្ជាយនៅចំពោះមុខមិត្តស្រី ។ បច្ចុប្បន្នគេបានជួលមេចុងភៅពីសណ្ឋាគារផ្កាយប្រាំចម្អិនអាហារឱ្យគេក្នុងអំឡុងពេលវិស្សមកាលនៅលើឆ្នេរសមុទ្រ ៕
ចែករំលែកព័តមាននេះ