រាជធានីភ្នំពេញ ៖ យោងលិខិតលេខ២០៦ អយក.កឡ ចុះថ្ងៃទី១៦ មករា ឆ្នាំ២០១២ របស់ក្រសួងអប់រំ យុវជន និងកីឡាក្រសួងអប់រំ យុវជន និងកីឡា សូមជូនដំណឹងដល់សមាគម ក្លិបកីឡាប្រណាំងទូក ក្រសួងនានា មន្ទីរអប់រំ យុវជន និងកីឡារាជធានី-ខេត្តទាំងអស់ឱ្យបានជ្រាបថា ការប្រកួតកីឡាទូកប្រពៃណី (ខ្នាតអន្តរជាតិ) និងទូកកានូ-កាយ៉ាក់ ជ្រើសរើសជើងឯកប្រចាំឆ្នាំ២០១២ នឹងប្រព្រឹត្តទៅចាប់ពីថ្ងៃទី២៤ ដល់ថ្ងៃទី៣០ កញ្ញា ឆ្នាំ២០១២ នៅក្រុងតាខ្មៅ ខេត្តកណ្តាល ។
ចំពោះវិញ្ញាសាប្រកួតរួមមាន ១.០០០ម៉ែត្រ បុរស-នារី (ទូកប្រពៃណី «ខ្នាតអន្តរជាតិ» ចំណុះ២២នាក់), ៥០០ម៉ែត្រ បុរស-នារី (ទូកប្រពៃណី «ខ្នាតអន្តរជាតិ» ចំណុះ២២នាក់), ១.០០០ម៉ែត្រ បុរស-នារី (ទូកប្រពៃណី «ខ្នាតអន្តរជាតិ» ចំណុះ១២នាក់), ៥០០ម៉ែត្រ បុរស-នារី (ទូកប្រពៃណី «ខ្នាតអន្តរជាតិ» ចំណុះ១២នាក់), ២០០ម៉ែត្រ បុរស (C1, K1 និង K2), 500 ម៉ែត្របុរស (C1, K1 និង K2) ។ ចំណែកសំណុំបែបបទនៃការចូលរួមប្រកួតមាន ពាក្យស្នើសុំចូលរួមប្រកួតចំនួន៣ច្បាប់, បញ្ជីរាយនាមប្រតិភូចំនួន៣ច្បាប់, បញ្ជីរាយនាមកីឡាករ ឬកីឡាការិនីចំនួន៣ច្បាប់, អាល់ប៊ុមបិទរូបថតប្រតិភូ កីឡាករ និងកីឡាការិនីចំនួន៣ច្បាប់, កិច្ចសន្យាចំនួន៣ច្បាប់ និងរូបថត (ថ្មី) ប្រតិភូ កីឡាករ-កីឡាការិនីទំហំ 3cm x 4cm ម្នាក់ៗចំនួន២សន្លឹក ។
សម្រាប់កាលបរិច្ឆេទនៃការទទួលពាក្យគឺចាប់ទទួលពីថ្ងៃជូនដំណឹងនេះតទៅរហូតដល់ថ្ងៃទី២០ កញ្ញា ឆ្នាំ២០១២ វេលាម៉ោង៥ល្ងាចរៀងរាល់ម៉ោងធ្វើការនៅការិយាល័យកីឡាទំនើបនៃនាយកដ្ឋានអប់រំកាយ និងកីឡា ស្ថិតនៅក្នុងពហុកីឡដ្ឋានជាតិ រាជធានីភ្នំពេញ ។ ការប្រជុំចាប់ឆ្នោតប្រកួតនឹងប្រព្រឹត្តទៅនាថ្ងៃទី២៤ កញ្ញា ឆ្នាំ២០១២ វេលាម៉ោង៨ និង៣០នាទីព្រឹកនៅសាលប្រជុំមន្ទីរអប់រំ យុវជន និងកីឡាខេត្តកណ្តាល ។
ចំពោះព័ត៌មានលម្អិតសូមទាក់ទងនៅការិយាល័យកីឡាទំនើបនៃនាយកដ្ឋានអប់រំកាយ និងកីឡា ស្ថិតនៅក្នុងពហុកីឡដ្ឋានជាតិ រាជធានីភ្នំពេញ ឬទូរស័ព្ទលេខ ០១២ ៨៥៦ ៦២៣/ ០១៧ ៤៥៥ ១២៧/ ០២៣ ២២៤ ៥៩៥, E-mail: bkimtor20012@yahoo.com ៕
ចែករំលែកព័តមាននេះ