រាជធានីភ្នំពេញ ៖ ទីបំផុតកីឡាករជើងខ្លាំង ឯម ខ្លឹមខ្មៅ ដែលធ្លាប់សន្លប់ក្រោមដៃកីឡាករ ផុន ផាន់ណា រួចម្តងនោះ នៅតែទទួលបរាជ័យក្រោមដៃគូប្រកួតចាស់របស់ខ្លួនសាជាថ្មី ពោលគឺទោះជាលោកអាចទប់ជំហរបានដល់ចប់ទឹកទី៥ ប៉ុន្តែអ្នកណាក៏ឃើញដែរថា ឯម ខ្លឹមខ្មៅ ទក់សាច់ ហើយហើបមាត់មិនរួចក្រោមដៃ ផុន ផាន់ណា ក្នុងជំនួបលើកទី២ នៅសង្វៀនបាយ័នបឹងស្នោ កាលពីថ្ងៃទី១៤ កញ្ញា នោះ ។
សិស្សគុនមកពីក្លិបគ្រុឌមានជ័យ កីឡាករ ឯម ខ្លឹមខ្មៅ មិនអាចធ្វើបានល្អឡើយ បើទោះជាលោកអះអាងនៅពេលឡើងរេញថានឹងបំបាក់ជើងខ្លាំងលោក ផុន ផាន់ណា មកពីក្លិបអប្សរាគុនខ្មែរ ជាការសងសឹក ។ ប៉ុន្តែនៅពេលការប្រយុទ្ធឈានចូលមកដល់កីឡាករ ផុន ផាន់ណា បានវាយកីឡាករឯម ខ្លឹមខ្មៅ ឱ្យដួលផ្ងារជើង ហើយទទួលលទ្ធផលឈ្នះដូចការគ្រោងទុកដដែល បើទោះបីជាឯម ខ្លឹមខ្មៅ មិនសន្លប់ក្នុងទឹកទី៤ ដូចនៅសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ កាលពីឆ្នាំ ២០១១នោះក៏ដោយ ។
គ្រាន់តែទឹកទី២ចូលមកដល់ ផុន ផាន់ណា ប្រើស្នៀតជើងទាត់ឱ្យ ឯម ខ្លឹមខ្មៅដួល និងបោកផ្ទប់់ទៅនឹងខ្សែរេញញឹកញយណាស់ ទើបធ្វើឱ្យកីឡាករសប្បុរខ្មៅរូបនេះឆាប់បាក់កម្លាំងទ្រមខ្លួន ហើយកាន់តែយ៉ាប់នៅអំឡុងទឹកទី៤ និងទី៥ ។ ជាក់ស្តែង ដោយសារតែកម្លាំងវាយសម្រុករបស់កីឡាករ ផុន ផានណា នេះ ទើបបណ្តាលឱ្យកីឡាករ ឯម ខ្លឹមខ្មៅ ប៊ិះនឹងធ្លាក់ពីលើរេញបាក់ក ប្រសិនបើគ្មានការអន្តរាគមន៍ពីសំណាក់គ្រូៗនៅខាងក្រោម និងអាជ្ញាកណ្តាលទាន់ពេលទេ នៅទឹកទី៤ ។ ទោះយ៉ាងណា ឯម ខ្លឹមខ្មៅ ក៏វាយចូលផុន ផាន់ណា នូវកែង ម៉ាត់ និងឡើងជង្គង់បានញឹកញយផងដែរ ប៉ុន្តែអាចថាមកពី ឯម ខ្លឹមខ្មៅ ទន់ជើងក្រោមហើយដួលញឹកពេក ទើបផុន ផាន់ណា មានប្រៀបជាងតាំងពីទឹកទី២រហូតទៅ ។
អ្នកទស្សនាជាច្រើនស្រែកហ៊ោកញ្ជ្រៀវចំពោះការវាយសម្រុករបស់កីឡាករគូសងសឹកទាំងពីររូប បើទោះជាអ្នកគាំទ្ររបស់កីឡាករ ឯម ខ្លឹមខ្មៅ បានសម្តែងអារម្មណ៍ខកចិត្តនឹងលទ្ធផលដួលផ្ងារជើងញឹកស្អេក ដែលកីឡាកររូបនេះបានទទួលពី ផុន ផាន់ណានោះក៏ដោយ ។ កីឡាករផុន ផាន់ណា បានដឹងខ្លួនឯងថា ឈ្នះតាំងពីមុនការប្រកាសលទ្ធផលម៉្លេះ ទើបលោកលោតកញ្ជ្រោលលើកដៃស្វាគមន៍អ្នកទស្សនានៅលើរេញតាំងពីស្នូរជួងទឹកទី៥ត្រូវបញ្ចប់ ដែលផ្ទុយពីឯម ខ្លឹមខ្មៅ ដែលប្រែជាមុខស្អុយ ហើយឈរស្ងៀមរង់ចាំគេប្រកាសថា ចាញ់ម្តងទៀតនោះ ។
កីឡាករ ផុន ផាន់ណា អះអាងថាស្វាគមន៍ជានិច្ចចំពោះសំណើសុំសងសឹករបស់ឯម ខ្លឹមខ្មៅ ខណៈដែលឯម ខ្លឹមខ្មៅ មិននិយាយអ្វីទាល់តែសោះ ថាលោកចង់សងសឹកកីឡាកររូបនេះ បែបតក់ក្រហល់ម្តងទៀត ដូចកាលចាញ់ វង្ស ណយ លើកទី១ហើយក៏សុំឡើងរេញជួបវង្ស ណយ សាជាថ្មីតែមួយអាទិត្យក្រោយភ្លាមនោះ។
ការបរាជ័យនេះ កំពុងធ្វើឱ្យកីឡាករ ឯម ខ្លឹមខ្មៅ បាត់បង់ទំនុកចិត្តមួយផ្នែកធំពីអ្នកគាំទ្រ ខណៈដែលបីប្រកួតចុងក្រោយ គឺធ្វើមិនបានល្អ ទាល់តែសោះ ដោយពីរលើកជាប់ៗគ្នា ចាញ់ក្រោមដៃ វង្ស ណយ និងលើកនេះចាញ់ពិន្ទុកីឡាករ ផុន ផាន់ណា ទៀត ។ ទោះយ៉ាងណា ឯម ខ្លឹមខ្មៅ មិនបានរងការបន្ទោសណាស់ណានោះដែរ ដ្បិតគេដឹងដូចគ្នាថា គូប្រកួតដែលលោកស៊ូមិនរួចក្នុងការឡើងរេញចុងក្រោយៗនេះ គឺសុទ្ធតែជាជើងខ្លាំង ដែលធ្លាប់គ្រងតំណែងជាម្ចាស់ខ្សែក្រវាត់ ។
ជាក់ស្តែងកីឡាករ ផុន ផាន់ណា អ្នកណាមិនដឹងថា លោកកំពុងគ្រងខ្សែក្រវាត់៣ក្នុងទឹកដីថៃ និងជាកីឡាករប្រដាល់ល្បីឈ្មោះនៅខេត្តកោះកុង ។ ចាំមើលតើ ឯម ខ្លឹមខ្មៅ អាចស្តារមុខមាត់ក្នុងអាជីពប្រដាល់បានដូចដើមវិញទេ ដើម្បីគេចឱ្យផុតពីការរិះគន់ថា លោកឥឡូវអន់ជាងមុន ឡើងរេញពេលណាក៏ស្ពាយតែលទ្ធផលចាញ់ និងសន្លប់យកទៅផ្ទះវិញនោះ ។
ដោយឡែកនៅថ្ងៃសុក្រនេះដែរ កីឡាករឆៃ តុលា មកពីក្លិបបាត់ដំបងពាយ័ព្យ បានចាញ់ពិន្ទុកីឡាករ ឯម សុភាព មកពីក្លិបគ្រុឌមានជ័យ។ កីឡាករ សុខ វីរៈ មកពីក្លិបខេត្តក្រចេះ ចាញ់ពិន្ទុកីឡាករ សិុន សារ៉េត មកពីក្លិបកងពលតូចឆត្រយោង៩១១ ។ កីឡាករ ឈាន រស្មី មកពីក្លិបរតនគិរី ប្រកួតស្មើពិន្ទុគ្នាជាមួយកីឡាករ គង់ សំបូរ មកពីក្លិបបុរីរាជសីហ៍មានប្ញទ្ធិ និងកីឡាករ ម៉ាប់ ឆៃយ៉ា មកពីក្លិបខ្លារខិនមានប្ញទ្ធិ បានយកឈ្នះកីឡាករ រ៉ាក់ វិឆ័យ មកពីក្លិបកងពលតូចលេខ៧០ដោយពិន្ទុ ៕
ចែករំលែកព័តមាននេះ