រាជធានីភ្នំពេញ ៖ ស្ត្រីម្នាក់ដែលឃាតករមិនស្គាល់អត្តសញ្ញាណសម្លាប់ហើយដឹកសពយកទៅប្លុងចោលនៅគុម្ពស្មៅ ស្ថិតក្នុងភូមិបឹងឈូក សង្កាត់និរោធ ខណ្ឌមានជ័យ កាលពីថ្ងៃអាទិត្យទី៩ កញ្ញា ឆ្នាំ២០១២ កន្លងទៅនេះ ត្រូវបានគេស្គាល់អត្តសញ្ញាណហើយនៅល្ងាចថ្ងៃទី១២ កញ្ញា គឺឈ្មោះទិត្យ វណ្ណៈ អាយុ៦០ឆ្នាំ ស្នាក់នៅក្នុងសង្កាត់ភ្នំពេញថ្មី ខណ្ឌសែនសុខ ។ ទោះជាយ៉ាងណា មិនទាន់មានប្រភពព័ត៌មានណាមួយបញ្ជាក់ថា ស្ត្រីខាងលើនេះត្រូវឃាតករសម្លាប់ដោយសារមូលហេតុអ្វីនៅឡើយទេ តែការស្គាល់អត្តសញ្ញាណអ្នករងគ្រោះគឺជាពន្លឺមួយក្នុងការឈានទៅវែកមុខឃាតករ ព្រោះថាបើស្គាល់អ្នកស្លាប់ហើយនោះហេតុការណ៍នានាដែលបានកើតឡើងមុនពេលធ្វើឃាត អាចជាតម្រុយសម្រាប់ការស្រាវជ្រាវរបស់សមត្ថកិច្ច មិនមែនឃើញផ្សែងហើយរកភ្លើងមិនឃើញនោះទេ ។
តាមប្រភពព័ត៌មានបានឱ្យដឹងថា ស្ត្រីខាងលើនេះមានមុខរបរជាអ្នករកស៊ីរាប់លុយ និងទទួលបញ្ចាំរបស់ទ្រព្យផ្សេងៗ ។ តាមក្រុមគ្រួសារនិយាយថា ស្ត្រីរងគ្រោះបានបាត់ខ្លួនពីផ្ទះតាំងពីថ្ងៃទី៨ កញ្ញា មកម៉្លេះ ដោយពុំដឹងថា គាត់ធ្វើដំណើរទៅណាមកណាឡើយ លុះនៅថ្ងៃទី១២ កញ្ញា កូនចៅបានអានព័ត៌មានតាមកាសែតក៏ឃើញរូបម្តាយរបស់ខ្លួនច្បាស់ ហើយបានមកទាក់ទងសួរនាំសមត្ថកិច្ចខណ្ឌមានជ័យ ក៏ដឹងថាពិតជាសពម្តាយរបស់ខ្លួនប្រាកដមែន ។ ប៉ុន្តែសពត្រូវបានសមត្ថកិច្ចនគរបាលប៉ុស្តិ៍និរោធ និងអាចារ្យវត្តឫស្សីស្រស់ បូជាតាំងពីល្ងាចថ្ងៃទី១០ កញ្ញា មកម៉្លេះ ។ ការសម្លាប់នេះអាចនឹងត្រូវវែកមុខនាពេលខាងមុខនេះ ៕
ចែករំលែកព័តមាននេះ